លោក សៅ សុខា៖ កម្ពុជារីកចម្រើន ជីវភាពពលរដ្ឋប្រសើរពីមួយទៅមួយថ្ងៃ គឺព្រោះតែមានសន្តិភាពពេញលេញ

នាយឧត្ដមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស លើកឡើងថា ដោយសារតែកម្ពុជាមានសុខសន្តិភាពពេញលេញ ទើបប្រទេសកម្ពុជាមានការរីកចម្រើន សាងសង់សមិទ្ធផល ហេដ្ឋារចនាសម្ព័ន្ធស្កឹមស្កៃ ជីវភាពពលរដ្ឋកាន់តែល្អប្រសើរពីមួយថ្ងៃទៅមួយថ្ងៃ ចំណែកក្នុងវិស័យពុទ្ធសាសនា ក៏មានឱកាសសាងសង់សំណង់នានាសម្រាប់ពលរដ្ឋគោរពបូជា ជាពិសេសការសាងសង់ព្រះមហាចេតិយនៅក្នុងវត្តច័ន្ទបុរីវង្ស នាព្រឹកថ្ងៃទី២៨ ខែមីនា នេះតែម្ដង។ មេបញ្ជាការកងរាជអាវុធហត្ថលើផ្ទៃប្រទេស សៅ សុខា និងជាអគ្គមេបញ្ជាការរងនៃកងយោធពលខេមរភូមិន្ទថ្លែងដូច្នេះ ក្នុងពិធីបញ្ចុះបឋមសិលាសាងសង់ព្រះមហាចេតិយ នៅវត្តច័ន្ទបុរីវង្ស ស្ថិតនៅខណ្ឌព្រែកព្នៅ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយឧត្ដមសេនីយ៍ សៅ សុខា  ថ្លែងសង្កតធ្ងន់ដូច្នេះ៖«យើងអាចកសាងសមិទ្ធផល ជីវភាពរស់នៅកាន់តែល្អប្រសើរពីមួយថ្ងៃទៅមួយថ្ងៃ ពិសេសការសាងសង់ព្រះមហាចេតិយដ៏ធំស្កឹមស្កៃដូចពេលនេះឡើងបាន គឺអាស្រ័យដោយព្រះរាជាណាចក្រកម្ពុជារបស់យើង មានសុខសន្តិភាព »។

ដើម្បីឱ្យកម្ពុជាកាន់តែរីកចម្រើនបន្ថែមទៀត នាយឧត្ដមសេនីយ៍ សៅ សុខា អំពាវនាវជនរួមជាតិទាំងអស់ បន្តចូលរួម ការពារសន្តិភាព គាំទ្រការអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧ នៃរដ្ឋសភា ដែលបាននិងកំពុងដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។

ថ្លែងចេញពីវត្តច័ន្ទបុរីវង្ស នៅចំពោះមុខពុទ្ធសាសនិកជាច្រើនរយនាក់ អគ្គមេបញ្ជាការរងនៃកងយោធពលខេមរភូមិន្ទ លោក សៅ សុខា រម្លឹកពីថា  វិស័យសាសនាក៏ដូចជាវិស័យផ្សេងៗទៀត រួមទាំងអាយុជីវិតប្រជាជនកម្ពុជា ស្លូតត្រង់រាប់លាននាក់ ត្រូវបានរបបប្រល័យពូជសាសន៍ កាប់សម្លាប់ ហេដ្ឋារចនាសម្ព័ន្ធសង្គមជាតិ ត្រូវបានលុបបំបាត់ចោល។

លោក សៅ សុខា បន្ថែមថា ក្នុងកាលៈទេសៈប្រទេសកម្ពុជាប្រឈមមុខជាមួយនឹងគ្រោះមហន្តរាយ ដែលបង្កឡើងដោយរបបប្រល័យពូជសាសន៍ដឹកនាំដោយបនប៉ុលពត។ នៅថ្ងៃទី២០ មិថុនា ១៩៧៧ សម្តេចតេជោ បានសម្រេចចិត្តចាកចេញពីមាតុភូមិ ស្វែងរកមាគ៌ាសង្គ្រោះជាតិ ដោយបានការគាំទ្រពីប្រទេសជាមិត្ត គឺបានបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា នៅថ្ងៃទី១២ ឧសភា ១៩៧៨ ដែលជាកម្លាំងស្នូលនៃការបង្កើត រណសិរ្សសាមគ្គីសង្គ្រោះជាតិកម្ពុជា នៅថ្ងៃទី២ ធ្នូ នាឆ្នាំដដែល។ បន្ទាប់ពីមហាជ័យជម្នះជាប្រវត្តិសាស្ត្រ ថ្ងៃទី៧ មករា ១៩៧៩ សម្តេចតេជោ រួមជាមួយឥស្សរយជនស្នេហាជាតិដទៃផ្សេងទៀត បានដឹកនាំ ស្តារ និងកសាងឡើងវិញ នូវរាល់ហេដ្ឋារចនាសម្ព័ន្ធសង្គម ក្នុងនោះក៏មានវិស័យព្រះពុទ្ធសាសនាផងដែរ។

នាយឧត្ដមសេនីយ៍ សៅ សុខា បន្ថែមថា ចាប់ពីពេលដែលប្រទេសជាតិកម្ពុជាទទួលបាននូវសន្តិភាព ពេញលេញ តាមរយៈនយោបាយឈ្នះឈ្នះ នាថ្ងៃទី២៩ ធ្នូ ១៩៩៨មក សម្តេចតេជោ ហ៊ុន សែន  បានបន្តដឹកនាំប្រទេសជាតិឱ្យមានការអភិវឌ្ឍ ជីវភាពរស់នៅរបស់ប្រជាជន ពីមួយថ្ងៃទៅមួយថ្ងៃ កាន់តែត្រូវបានលើកកម្ពស់កិត្យានុភាពព្រះរាជាណាចក្រកម្ពុជា នៅលើឆាកអន្តរជាតិ ត្រូវបានលើកតម្កើង៕

ដោយ៖ ង៉ិល ណារ៉ាត់