សម្ដេច ហ៊ុន ម៉ាណែត៖ ឪពុកម្ដាយ និងគ្រូត្រូវ សហ​ការ​គ្នា ទើបការអប់រំរបស់កូនមាន​លទ្ធផលល្អ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃកម្ពុជាមានប្រសាសន៍ថា ការអប់រំ​បណ្ដុះបណ្ដាលទាល់តែភាគីឪពុម្ដាយ អាណាព្យាបាល និងគ្រូបង្រៀន រួមគ្នាអប់រំទើបប្រសិទ្ធ​ភាព​នៃការអប់រំរបស់កូនៗ ទទួលបានល្អ។

សម្ដេចធិបតី ហ៊ុន ម៉ាណែត មានប្រសាសន៍នៅក្នុងឱកាសអញ្ជើញ​ចុះពិនិត្យមើលសាលារៀន​មួយ​កន្លែង នៅក្រុងឧដុង្គម៉ែជ័យ ខេត្តកំពង់ស្ពឺ នៅព្រឹកថ្ងៃទី២៤ សីហា ២០២៤។

សម្ដេចធិបតី ហ៊ុន ម៉ាណែតបញ្ជាក់ថា៖ «ព្រោះអប់រំបណ្ដុះបណ្ដាល ទាល់តែ២ ភាគី ឪពុកម្ដាយ តាមយាយ អាណាព្យាបាលនៅផ្ទះ ហើយលោកគ្រូ អ្នកគ្រូ នៅសាលា ពីរនាក់ហ្នឹងរួម​គ្នាអប់រំ​ទៅ គាត់សល់ម៉ោង គាត់ដើរក្នុងសង្គមលែងមានឥទ្ធិពលហើយ តែបើសិនឪពុកម្ដាយ លោកគ្រូ​អ្នកគ្រូទុកពេលច្រើន ហើយយើងអប់រំគាត់អត់បានសហការគ្នាល្អ គាត់សល់ម៉ោង ទី១ គាត់​សល់​​ម៉ោងដើរលេង ទី២ កន្លែងខ្លះគាត់អាង ដោយសារឪពុកម្ដាយខ្លះកាន់ជើងកូន គ្រូអត់​ហ៊ានអប់រំ ខ្លាចយល់ច្រលំ»។

សម្ដេចធិបតី ហ៊ុន ម៉ាណែត សង្ឃឹមថា ការអនុវត្តវិធានការគន្លឹះក្នុងវិស័យអប់រំ (គវអ) នឹងជួយ​ដោះស្រាយបញ្ហា និងមានប្រសិទ្ធិភាពក្នុងការអប់រំ ដែលនឹងជួយដល់ការបង្កើន​សមត្ថភាព​ធន​ធាន​មនុស្សនៅពេលអនាគត៕