តាមច្បាប់៖ តើប្តីផិតក្បត់ប្រពន្ធ ឬប្រពន្ធផិតក្បត់ប្តី ត្រូវមានទោសទណ្ឌយ៉ាងណា?

មួយរយៈចុងក្រោយនេះ នៅក្នុងសង្គមខ្មែរ មានករណីប្តីផិតក្បត់ប្រពន្ធ ឬប្រពន្ធផិតក្បត់ប្តី កើតមានឡើងគួរឱ្យកត់សម្គាល់។ ជាក់ស្តែង កាលពីពេលថ្មីៗនេះ មានករណីប្រពន្ធលួចផិតក្បត់ប្តី ដោយលួចទៅដេករួមរស់ជាមួយបុរសដទៃទាំងដែលមិនទាន់បានផ្តាច់ចំណងប្តីប្រពន្ធនៅឡើយ។ បើមានបែបនេះ តើអ្នកដែលលួចផិតក្បត់ ត្រូវមានទោសទណ្ឌយ៉ាងណា បើតាមផ្លូវច្បាប់?

មុនឈានដល់ការលើកឡើងពី​បញ្ហាទោសទណ្ឌ គេគួរតោងយល់សិនថា តើដូចម្តេចទៅដែលអាចចាត់ទុកថា ជាអំពើផិតក្បត់រវាងប្តីចំពោះប្រពន្ធ និងរវាងប្រពន្ធចំពោះប្តី? បើតាមច្បាប់ស្តីពីឯកពន្ធភាព ត្រង់មាត្រា ៧ បានបញ្ជាក់ឱ្យដឹងថា ត្រូវចាត់ទុកថា ផិត គឺការរួមសេវនកិច្ច(រួមភេទ)រវាងបុរសដែលមានចំណងអាពាហ៍ពិពាហ៍ពីមុនមិនទាន់រលាយ ជាមួយស្រ្តីដទៃក្រៅពីប្រពន្ធរបស់ខ្លួន ឬការរួមសេវនកិច្ច(រួមភេទ)រវាងស្រ្តីដែលមានចំណងអាពាហ៍ពិពាហ៍មិនទាន់រលាយ ជាមួយបុរសដទៃក្រៅពីប្តីរបស់ខ្លួន។

ចំពោះប្តី ឬប្រពន្ធដែលបានប្រព្រឹត្តអំពើផិតក្បត់ដូចបានលើកឡើងខាងលើនេះ​ គឺត្រូវផ្តន្ទាសទោសដាក់ពន្ធនាគារពី១ខែ ដល់ ១ឆ្នាំ និងពិន័យជាទឹកប្រាក់ពី២០ម៉ឺនរៀល ដល់ ១លានរៀល ឬផ្ទន្ទាទោសណាមួយនៃទោសទាំងពីរនេះ។ នេះបើយោងតាមច្បាប់ស្តីពី ឯកពន្ធភាព ឆ្នាំ២០០៦៕