បើមានការផិតក្បត់រវាងប្រពន្ធ ឬ ប្តី តើត្រូវផ្តន្ទាទោសយ៉ាងណា?

មួយរយៈចុងក្រោយនេះ មានករណីប្តីផិតប្រពន្ធ ឬ ប្រពន្ធផិតប្តី មួយចំនួនបានកើតឡើង ហើយភាគីដែលត្រូវបានគេក្បត់ផិតបានតាមទាន់​ ដោយបានជេរបញ្ចោរ វាយតប់ និងថតជាវីដេអូបង្ហោះលើបណ្តាញសង្គមថែមទៀតផង។ ករណីចុងក្រោយនេះ គឺប្រពន្ធបានតាមទាន់ប្តីកំពុងផិតក្បត់ជាមួយនារីវ័យក្មេងម្នាក់ ហើយបានវាយតប់លើនារីនោះ និងបានថតបង្ហោះលើហ្វេសប៊ុក។ ករណីនេះ បង្កឲ្យមានការចាប់អារម្មណ៍យ៉ាងខ្លាំង និងបង្កើតជាទំនាស់មតិនៅក្នុងចំណោមមហាជនកម្ពុជា។ នៅថ្ងៃនេះ «កម្ពុជាថ្មី» សូមលើកឡើងពីទិដ្ឋភាពច្បាប់វិញចំពោះករណីនេះថា តើការផិតក្បត់បែបនេះនឹងត្រូវផ្តន្ទាទោសបែបណាខ្លះ?

ច្បាប់ស្តីពីឯកពន្ធភាព ដែលត្រូវបានរដ្ឋសភាអនុម័តកាលពីឆ្នាំ២០០៦ បានចែងថា ក្នុងមាត្រា៤ ប្រសិនជាប្តី ឬ ប្រពន្ធ មានចំណងអាពាហ៍ពិពាហ៍ពីមុនមិនទាន់បញ្ចប់ ហើយទៅចុះសំបុត្រអាពាហ៍ពិពាហ៍ថ្មីមួយទៀត ត្រូវចាត់ទុកថាមានពិរុទ្ធក្នុងបទទ្វេពន្ធភាព ហើយអ្នកសមគំនិតក៏ត្រូវមានទោសដូចគ្នា។ ជនណាដែលល្មើសនឹងមាត្រា៤នេះ គឺត្រូវផ្តន្ទាទោសដាក់ពន្ធនាគារពី៦ខែ ដល់១ឆ្នាំ និងពិន័យជាទឹកប្រាក់ពី ២សែនរៀល ដល់១លានរៀល។

ចំណែក មាត្រា៧វិញ បានចែងថា រវាងប្តី ឬ ប្រពន្ធ នៅមានចំណងអាពាហ៍ពិពាហ៍ ហើយមិនទាន់លែងលះដាច់ស្រេច រួចរួមសេវនកិច្ច (រួមមេត្រី) ជាមួយជនទី៣ ក្រៅពីប្រពន្ធ ឬ ប្តីរបស់ខ្លួន គឺត្រូវចាត់ទុកថា មានពិរុទ្ធក្នុងបទផិតក្បត់។ ចំពោះជនណាដែលល្មើសនឹងមាត្រានេះ គឺត្រូវផ្តន្ទាទោសដាក់ពន្ធនាគារបី១ខែ ទៅ១ឆ្នាំ និងពិន័យជាទឹកប្រាក់ពី ២សែនរៀល ដល់១លានរៀល។ ប៉ុន្តែ ក្នុងមាត្រ៨ បានចែងថា ប្រសិនជាបណ្តឹងរបស់សហព័ទ្ធណាមួយស្នើសុំកុំឱ្យមានការចោទប្រកាន់ក្នុងមាត្រា៧នេះ គឺព្រះរាជអាជ្ញាអាចសម្រេចមិនធ្វើបណ្តឹងអាជ្ញាតាមការស្នើសុំ។

ច្បាប់ស្តីពី ឯកពន្ធភាពនេះ មានគោលបំណងការពារសេចក្តីថ្លៃថ្នូរ ពង្រឹងសុភមង្គល និងការគោរពសិទ្ធិគ្នារបស់ប្តីប្រពន្ធនៅក្នុងគ្រួសារស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។ ឯកពន្ធភាព គឺជាចំណងអាពាហ៍ពិពាហ៍ដែលបុរសមានប្រពន្ធតែមួយ ឬ ប្រពន្ធមានប្តីតែមួយ ដែលហៅថា ជាកិច្ចសន្យាដ៏ឱឡារិកដែលមិនអាចរំលាយអាពាហ៍ពិពាហ៍តាមទំនើងចិត្តបានឡើយ។ នេះបើតាមសេចក្តីក្នុងច្បាប់ខាងលើ។

ច្បាប់ដដែលបានចែងថា មានករណី៣ ដែលចំណងអាពាហ៍ពិពាហ៍លែងមានប្រសិទ្ធភាព។ ទី១ មានសហព័ទ្ធណាមួយស្លាប់។ ទី២ មានសេចក្តីសម្រេចរលាយចំណងអាពាហ៍ពិពាហ៍ជាស្ថាពររបស់តុលាការ។ ទី៣ សហព័ទ្ធណាម្នាក់បាត់ខ្លួនហួសពី១ឆ្នាំគ្មានដំណឹងអ្វីសោះ ដោយមិនដឹងថារស់ ឬ ស្លាប់៕

ដោយ៖ អុន ស្រីមាន