ព័ត៌មានជាតិ

ទេសចរទៅលេងខេត្តមណ្ឌលគិរី កើនឡើងជាង ៤០០% ធៀបខែកញ្ញា ឆ្នាំ២០២៤ និងឆ្នាំ២០២៣

បានផុស

៦ ខែ មុន

នៅ

ថ្ងៃចន្ទ ២៣ កញ្ញា ២០២៤

ដោយ

បើតាមការបញ្ជាក់ពីលោក សាន សឿន ប្រធានមន្ទីរទេសចរណ៍ខេត្តមណ្ឌលគិរីបានឱ្យ «កម្ពុជាថ្មី» ដឹងនាព្រឹកថ្ងៃទី២៣ ខែកញ្ញា នេះថា ក្នុងខែកញ្ញា ឆ្នាំ២០២៤ មានភ្ញៀវទេសចរជាតិ និងអន្តរជាតិ បានទៅលេងកម្សាន្តខេត្តមណ្ឌលគិរី សរុបជាង ២ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្ញៀវទេសចរទៅលេងកម្សាន្តខេត្តភាគឦសានក្នុងខែកញ្ញា ឆ្នាំ២០២៤ មានការកើនឡើង ៤០៣,២០% បើធៀបខែកញ្ញា ឆ្នាំ២០២៣។ នេះបើតាមប្រធានមន្ទីរទេសចរណ៍ខេត្តមណ្ឌលគិរី។

លោក សាន សឿន បានបញ្ជាក់ឱ្យដឹងទៀតថា ក្នុងចំណោមភ្ញៀវទេសចរចំនួន ២៩ ៥៥៣ នាក់ ទៅលេងខេត្តមណ្ឌលគិរីក្នុងអំឡុងខែកញ្ញា ក្នុងនោះមានទេសចរជាតិប្រមាណ ២៩ ១៥៥ នាក់ និងទេសចរបរទេសប្រមាណ ៣៩៨ នាក់។ ធៀបខែកញ្ញា ឆ្នាំ២០២៣ មានសរុបចំនួនប្រមាណ ៥ ៨៧៣ នាក់ ក្នុងនោះទេសចរជាតិប្រមាណ ៥ ៧៥៤នាក់ ទេសចរបរទេសចំនួន ១១៩ នាក់ សរុបរួមកើនឡើង ៤០៣,២០% ទេសចរជាតិកើនឡើង ៤០៦,៦៩% និងទេសចរបរទេសកើនឡើង ២៣៤,៤៥%។

លោកប្រធានមន្ទីរ ក៏បានចង្អុលបង្ហាញទីតាំងទេសចរណ៍ ៥ កន្លែងបន្ថែម ដែលទេសចរជាតិ និងអន្តរជាតិ គួរទៅលេងកម្សាន្ត ក្នុងនោះរួមមាន រមណីយដ្ឋានទឹកជ្រោះប៊ូស្រា, រមណីយដ្ឋានទេសចរណ៍វប្បធម៌-ធម្មជាតិ និងប្រវត្តិសាស្ត្រមាន ភ្នំដោះក្រមុំ, ភ្នំណាមលៀរ, រមណីយដ្ឋានសមុទ្រឈើ និងតំបន់ទេសភាពធម្មជាតិស្រុកអូររាំង ដូចជាភ្នំអណ្ដូងស្នេហ៍ជាដើម៕