ព័ត៌មានជាតិ

ក្រសួងការងារ អំពាវនាវពលរដ្ឋខ្មែរ ទៅធ្វើការនៅក្រៅប្រទេសដោយស្របច្បាប់ តាមរយៈទីភ្នាក់ងារជ្រើសរើសឯកជនចុះបញ្ជិកាជាមួយក្រសួង

បានផុស

២ years មុន

នៅ

ថ្ងៃចន្ទ ៣០ កញ្ញា ២០២៤

ដោយ

នៅថ្ងៃទី ៣០ ខែកញ្ញា ឆ្នាំ ២០២៤ នេះ លោក កត្តា អ៊ន រដ្ឋលេខាធិការ និងជាអ្នកនាំពាក្យ នៃក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ប្រជាពលរដ្ឋខ្មែរមានបំណងទៅធ្វើការនៅក្រៅប្រទេស ជាពិសេសប្រទេសថៃ សូមទៅធ្វើការងារដោយស្របច្បាប់តាមរយៈភ្នាក់ងារជ្រើសរើសពលករឯកជនដែលបានចុះបញ្ជិកានៅក្រសួងការងារ និងបណ្ដុះបណ្ដាលវិជ្ជាជីវៈដោយស្របច្បាប់។

លោករដ្ឋលេខាធិការ ក៏បានក្រើនរំលឹកដល់ប្រជាពលរដ្ឋខ្មែរ ជៀសវាងការទៅធ្វើការនៅក្រៅប្រទេសដោយខុសច្បាប់តាមរយៈមេខ្យល់ដែលគ្មានច្បាប់គាំពារត្រឹមត្រូវ នាំឲ្យបាត់បង់អត្ថប្រយោជន៍ ឬមានការរំលោភបំពានផ្លូវច្បាប់ ជាពិសេសនោះប្រឈមនឹងការចាប់ខ្លួនពីសំណាក់អាជ្ញាធរបរទេសទៀតផង។

ទន្ទឹមនេះ លោករដ្ឋលេខាធិការ ស្នើឲ្យពលរដ្ឋឈប់ជាបន្ទាន់ក្នុងការចេញទៅធ្វើការងារនៅក្រៅប្រទេសដោយខុសច្បាប់។ ករណីមានការបបួល ឬលួងលោមពីសំណាក់មេខ្យល់ដើម្បីចេញទៅធ្វើការដោយខុសច្បាប់ សូមរាយការណ៍ជូនសមត្ថកិច្ច ឬអាជ្ញាធរមូលដ្ឋានជាបន្ទាន់ ដើម្បីមានវិធានការច្បាប់ចំពោះជនល្មើសទាំងនោះ។

លោករដ្ឋលេខាធិការ បានសង្កត់ធ្ងន់ថា បច្ចុប្បន្ននេះនៅប្រទេសកម្ពុជាមានតែភ្នាក់ងារជ្រើសរើសឯកជនដែលបានចុះបញ្ជិកាជាមួយក្រសួងការងារ និងបណ្ដុះបណ្ដាលវិជ្ជាជីវៈ មានសិទ្ធិបញ្ជូនពលករខ្មែរទៅធ្វើការនៅក្រៅប្រទេសដោយស្របច្បាប់បាន ក្រៅពីនោះគឺជាការបញ្ជូនពលករដោយខុសច្បាប់។ ទន្ទឹមនេះ អាជ្ញាធរក៏ព្រមានពីវិធានការផ្លូវច្បាប់យ៉ាងតឹងរ៉ឹងប្រសិនបើរកឃើញថា មានបុគ្គល ឬទីភ្នាក់ងារណាមួយដែលបានបញ្ជូនពលករទៅធ្វើការនៅក្រៅប្រទេសដោយខុសច្បាប់។

លោករដ្ឋលេខាធិការ បន្ថែមថា ជុំវិញព័ត៌មានផ្សេងៗ ពាក់ព័ន្ធនឹងការទៅធ្វើការងារនៅក្រៅប្រទេសដោយស្របច្បាប់ ពលរដ្ឋអាចទាក់ទងផ្ទាល់មកក្រសួង ឬមន្ទីរការងារ និងបណ្ដុះបណ្ដាលវិជ្ជាជីវៈរាជធានី ខេត្ត ឬ ទូរសព្ទមកលេខ ១២៩៧ ឬ ១២៨៦។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា និងជាអ្នកជំនាញវិទ្យាសាស្ត្រនយោបាយ បានគាំទ្រទៅដល់ការអំពាវនាវរបស់អ្នកនាំពាក្យក្រសួងការងារ ក្នុងនោះ លោកបណ្ឌិត ក៏បានលើកទឹកចិត្តឲ្យប្រជាពលរដ្ឋខ្មែរមានបំណងចង់ទៅធ្វើការនៅក្រៅប្រទេស ត្រូវមានការស្វែងយល់ឲ្យបានត្រឹមត្រូវពីក្រុមហ៊ុនដែលបញ្ជូននោះ ជៀសវាងទៅធ្វើការដោយខុសច្បាប់។

លោកបណ្ឌិត យង់ ពៅ បានគូសបញ្ជាក់បន្ថែមថា «បងប្អូនប្រជាពលរដ្ឋរបស់យើង ត្រូវជៀសវាងឲ្យផុតពីការទៅធ្វើការនៅក្រៅប្រទេសតាមរយៈមេខ្យល់ ព្រោះវាជាការបញ្ជូនពលករទៅធ្វើការនៅក្រៅប្រទេសដោយខុសច្បាប់។ កាលណាយើងទៅតាមរយៈមេខ្យល់នោះ យើងនឹងមានបញ្ហាហើយ ដូចជា ការរំលោភបំពានកម្លាំងពលកម្ម ការរំលោភសិទ្ធិ និងអំពើខុសច្បាប់ផ្សេងៗ ទៀត»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្ឌិតរូបនេះ បន្ថែមថា ការទៅធ្វើការនៅក្រៅប្រទេសតាមរយៈក្រុមហ៊ុនដែលបានចុះបញ្ជិកាជាមួយរដ្ឋាភិបាល ដែលមានក្រសួងការងារ និងបណ្ដុះបណ្ដាលវិជ្ជាជីវៈ ពលករនឹងទទួលបានអត្ថប្រយោជន៍ជាច្រើនដូចជា ប្រាក់បៀវត្សរ៍ល្អ ទទួលបានអត្ថប្រយោជន៍ពេញលេញពីនិយោជកបរទេស និងទទួលបានចំណេះជំនាញត្រឹមត្រូវនៅពេលត្រលប់មកកាន់ប្រទេសកម្ពុជាវិញ បន្ទាប់ពីអស់អាណត្តិ។

លោកបណ្ឌិត យង់ ពៅ បានវាយតម្លៃខ្ពស់ចំពោះយន្តការរបស់រាជរដ្ឋាភិបាលកម្ពុជាដែលជានិច្ចកាលតែងតែបានអំពាវនាវ និងដាក់ចេញនូវវិធានការថ្មីៗ ដើម្បីទប់ស្កាត់កុំឲ្យប្រជាពលរដ្ឋទៅធ្វើការនៅក្រៅប្រទេសដោយខុសច្បាប់។ ជាងនេះទៅទៀត រាជរដ្ឋាភិបាលកម្ពុជា ដែលមានក្រសួងការងារ តែងតែស្វែងរកដៃគូជាក្រុមហ៊ុនជ្រើសរើសឯកជនដោយស្របច្បាប់ ដើម្បីបញ្ជូនពលករខ្មែរទៅធ្វើការនៅក្រៅប្រទេសដោយស្របច្បាប់ទទួលបានអត្ថប្រយោជន៍ពេញលេញ។

ទន្ទឹមនឹងការអំពាវនាវឲ្យប្រជាពលរដ្ឋទៅធ្វើការងារនៅក្រៅប្រទេសដោយស្របច្បាប់នេះផងដែរ ក្រសួងការងារ និងបណ្ដុះបណ្ដាលវិជ្ជាជីវៈ ដែលមានទីភ្នាក់ងារជាតិមុខរបរ និងការងារ (NEA) ក៏តែងរៀបចំឱកាសការងារក្នុងស្រុកជាច្រើនម៉ឺនកន្លែងរៀងរាល់សប្ដាហ៍ សម្រាប់ប្រជាពលរដ្ឋមានបំណងធ្វើការងារក្នុងវិស័យសំខាន់ៗ ដូចជា វិស័យឧស្សាហកម្ម វិស័យសេវាកម្ម និងសេវាកសិកម្ម៕