ព័ត៌មានជាតិ

ក្រសួងការងារ នាំឱកាសការងារជាង ២ ពាន់កន្លែង ជូនអតីតពលករ និងយុវជន ក្នុងស្រុកមង្គលបូរី ខេត្តបន្ទាយមានជ័យ

បានផុស

៤ ខែ មុន

នៅ

ថ្ងៃចន្ទ ២៦ មករា ២០២៦

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បាននាំយកឱកាសការងារជាង ២ ពាន់កន្លែង ជូនដល់អតីតពលករ និងយុវជន ក្នុងស្រុកមង្គលបូរី ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ២៥ ខែមករា ឆ្នាំ ២០២៦ ម្សិលមិញ ក្រោមប្រធានបទ “ខ្មែរជួយរកការងារ និងផ្ដល់ការងារឲ្យខ្មែរ” ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវៈ នៅស្រុកមង្គលបូរី ខេត្តបន្ទាយមានជ័យ ដើម្បីនាំយកឱកាសការងារដោយផ្ទាល់ជូនដល់អតីតពលករ និងយុវជនក្នុងមូលដ្ឋាន។

ក្នុងឱកាសអញ្ជើញជាអធិបតីក្នុងពិធីនោះ លោក សាន គឹមហុង អនុរដ្ឋលេខាធិការ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បាននាំមកនូវដំណឹងដ៏រីករាយ ដោយបញ្ជាក់ថា បច្ចុប្បន្ន មានក្រុមហ៊ុន សហគ្រាស និងរោងចក្រ ចំនួន ៥ កំពុងផ្ដល់ឱកាសការងារសរុបចំនួន ២ ៦៥០ កន្លែង លើមុខជំនាញផ្សេងៗ គ្នា។ វេទិកានេះបានទាក់ទាញប្រជាពលរដ្ឋ និងយុវជន ចូលរួមប្រមាណ ៥០០ នាក់ ដើម្បីស្វែងរកការងារធ្វើភ្លាមៗ និងចុះឈ្មោះចូលរៀនជំនាញ TVET។

ទន្ទឹមនឹងការផ្ដល់ការងារ លោកអនុរដ្ឋលេខាធិការ បានសង្កត់ធ្ងន់ពីសារៈសំខាន់ នៃការធ្វើការងារក្នុងស្រុកដែលផ្តល់អត្ថប្រយោជន៍យ៉ាងច្រើនតាមរយៈរបបសន្តិសុខសង្គម (ប.ស.ស) រួមមាន ៖ ការថែទាំសុខភាពផ្នែកសោធននិវត្តន៍ និងផ្នែកហានិភ័យការងារជាដើម។ ការងារក្នុងស្រុក មិនត្រឹមតែជួយឲ្យពលរដ្ឋបានរស់នៅជួបជុំក្រុមគ្រួសារ មើលថែទាំកូន និងឪពុកម្ដាយ ប៉ុណ្ណោះទេ ប៉ុន្តែថែមទាំងជួយការពារពួកគាត់ចៀសផុតពីការកេងប្រវ័ញ្ចកម្លាំងពលកម្មខុសច្បាប់នៅក្រៅប្រទេស និងរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចជាតិទៀតផង។

ជាមួយគ្នានេះ លោកក៏បានលើកទឹកចិត្តយ៉ាងមុតមាំដល់យុវជន និងពលករ ឲ្យចាប់យកឱកាសការបណ្ដុះបណ្ដាលជំនាញបច្ចេកទេសតាមរយៈកម្មវិធីបណ្ដុះបណ្ដាលជំនាញ ១,៥ លាននាក់ (TVET 1.5M) ដើម្បីបង្កើនសមត្ថភាព និងទទួលបានប្រាក់ចំណូលខ្ពស់នាពេលអនាគត។ នេះគឺជាគោលនយោបាយចម្បងរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ក្នុងគោលបំណងផ្តល់ជំនាញ TVET យ៉ាងតិចមួយដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។

សម្រាប់ប្រជាពលរដ្ឋដែលមានបំណងសាកសួរព័ត៌មានបន្ថែមអំពីឱកាសការងារ និងអត្ថប្រយោជន៍ផ្សេងៗ សូមទាក់ទងមកកាន់លេខទូរស័ព្ទ Hotline ១២៩៧ សម្រាប់ផ្នែកការងារ និងលេខ ១២៨៦ ដើម្បីទទួលបានព័ត៌មានលម្អិតអំពីអត្ថប្រយោជន៍ ប.ស.ស៕