ព័ត៌មានជាតិ

ទូកងវែងជាងគេក្នុងខេត្តបាត់ដំបងប្រវែងជាង ៣០ ម៉ែត្រ រំកិលចុះស្ទឹងសង្កែ ត្រៀមប្រកួតប៉ុន្មានថ្ងៃទៀតនេះ

បានផុស

២ years មុន

នៅ

ថ្ងៃសុក្រ ១១ តុលា ២០២៤

ដោយ

នៅព្រឹកថ្ងៃទី ១១ ខែតុលា ឆ្នាំ២០២៤ នេះ ទូកងក្នុងខេត្តបាត់ដំបងដែលវែងជាងគេ ចាប់ផ្ដើមលូនរំកិលចុះក្នុងស្ទឹងសង្កែ ដើម្បីត្រៀមលក្ខណៈប្រកួតជាមិត្តភាពនាប៉ុន្មានថ្ងៃខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូកងដ៏វែងជាងគេក្នុងខេត្តបាត់ដំបងដែលជាទូករបស់រដ្ឋបាលក្រុងមានឈ្មោះថា “សុវណ្ណភេត្រាបាត់ដំបងសជ័យ” នៅព្រឹកនេះ បានលូនរំកិលខ្លួនចុះក្នុងស្ទឹងសង្កែ បន្ទាប់ពីតម្កល់ទុកអស់រយៈពេលមួយឆ្នាំពេញ នៅក្នុងទីអារាមវត្តពោធិវង្ស ស្ថិតក្នុងសង្កាត់ជ្រៃកោង ក្រុងបាត់ដំបង។

ទូករបស់រដ្ឋបាលក្រុងបាត់ដំបងដែលមានឈ្មោះ «សុវណ្ណភេត្រាបាត់ដំបងសជ័យ» មានប្រវែងជាង ៣០ ម៉ែត្រ និងមានចំណុះកីឡាករចំនួន ៧៤ នាក់ បានរំកិលខ្លួនលូនចុះទៅក្នុងស្ទឹងសង្កែមុនគេបង្អស់ ដើម្បីត្រៀមហ្វឹកហាត់ក្នុងការប្រកួតយកជ័យជំនះនាប៉ុន្មានថ្ងៃខាងមុខនេះ ដោយមានការចុះពិនិត្យតាមដានពីលោក លាង វាសនា អភិបាលក្រុងបាត់ដំបងផងដែរ។

គួរបញ្ជាក់ថា រដ្ឋបាលខេត្តបាត់ដំបងបានជ្រើសរើសយកថ្ងៃទី១៦ និងទី១៧ ខែតុលា ឆ្នាំ២០២៤ គឺជាថ្ងៃរៀបចំពិធីប្រណាំងទូកនៅតាមបណ្ដោយដងស្ទឹងសង្កែកណ្ដាលក្រុងបាត់ដំបង។ ខណៈនៅខ្វះតែប៉ុន្មានថ្ងៃទៀតនឹងដល់ថ្ងៃរៀបចំពិធី រដ្ឋបាលខេត្តក៏បានរៀបចំផ្កាភ្ញីលម្អក្នុងក្រុង និងមានតូបលក់ទំនិញគ្រប់ប្រភេទរៀបចំនៅប៉ែកខាងកើតដងស្ទឹងសង្កែ ដើម្បីទទួលបងប្អូនមកទស្សនាកម្សាន្ត៕