ក្រសួងវប្បធម៌ នឹងរៀបចំព្រឹត្តិការណ៍វប្បធម៌តាមតំបន់លើកទី២ ក្នុងខេត្តកំពត នៅថ្ងៃទី២-៣ ខែវិច្ឆិកា ខាងមុខ

ក្រសួងវប្បធម៌ និងវិចិត្រសិល្បៈ​ នឹងរៀបចំប្រារព្ធ “ព្រឹត្តិការណ៍វប្បធម៌តាមតំបន់” លើកទី២ ឆ្នាំ២០២៤ ក្រោមប្រធានបទ «មរតកយើង» ចាប់ពីថ្ងៃទី២-៣ ខែវិច្ឆិកា ឆ្នាំ២០២៤ ខាងមុខ ក្នុងបរិវេណវិទ្យាល័យទូកមាស ស្រុកបន្ទាយមាស ខេត្តកំពត។ ព្រឹត្រ្តិការណ៍នេះ មានកិច្ចសហការយ៉ាងយកចិត្តទុកដាក់ពីរដ្ឋបាលស្រុកបន្ទាយមាស និងវិទ្យាល័យទូកមាស។

នៅក្នុងព្រឹត្តិការណ៍ មានកម្មវិធីសំខាន់ៗជាច្រើន ដូចជា កម្មវិធីស្វែងយល់អំពីបេតិកភណ្ឌវប្បធម៌ខ្មែរ ការបង្ហាញទេពកោសល្យសិល្បៈរបស់យុវជន កម្មវិធីដាល់អំបុក និងការបង្ហាញសិល្បៈចម្អិនម្ហូបអាហារខ្មែរ ពិព័រណ៍បង្ហាញកម្មវិធីបណ្តុះបណ្តាលជំនាញសិល្បៈ ពិព័រណ៍វត្ថុសិប្បកម្មប្រពៃណី។ ព្រមទាំងមានការសម្តែងសិល្បៈទស្សនីយភាពចម្រុះជាច្រើនទម្រង់ដូចជា ការសម្តែងចាប៉ីដងវែង ការសម្តែងល្ខោនបុរាណ (ខេត្តកណ្តាល) ការបង្ហាញគុនល្បុក្កតោ (ខេត្តកំពត) ការសម្តែងសៀករបស់អង្គការហ្វាពន្លឺសិល្បៈ (ខេត្តបាត់ដំបង) ការបង្ហាញទេពកោសល្យរបស់ក្រុមសិល្បៈអង្គការអេពិកអាត (ខេត្តកំពត) និងការសម្តែងយីកេអង្គឃ្លៃ (ស្រុកឈូក ខេត្តកំពត) រួមទាំងកម្មវិធីសិល្បៈវប្បធម៌ជាច្រើនទម្រង់ទៀត។

សម្រាប់ព្រឹត្តិការណ៍រយៈពេល ២ថ្ងៃនេះ លោកអ្នកអាចចូលរួមទស្សនាដោយសេរី ចាប់ពីម៉ោង ៨៖០០នាទីព្រឹក ដល់ម៉ោង ១១៖០០នាទីយប់៕