ព័ត៌មានជាតិ

ក្រុមហ៊ុនចិន មានទុនវិនិយោគរាប់ពាន់លានដុល្លារ ចង់បោះទុនវិនិយោគវិស័យទេសចរណ៍នៅកម្ពុជា

បានផុស

២ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

ក្រុមហ៊ុនដ៏ធំបំផុតមួយរបស់ចិនដែលមានមូលដ្ឋានក្នុងខេត្តយូណាន ដែលមានទុនវិនិយោគរាប់ពាន់លានដុល្លារ បានបង្ហាញការចាប់អារម្មណ៍ក្នុងការបណ្តាក់ទុកវិនិយោគលើវិស័យទេសចរណ៍នៅកម្ពុជា។ ការឱ្យដឹងបែបនេះ នៅក្នុងដំណើរទស្សនកិច្ចរបស់លោក ហួត ហាក់ រដ្ឋមន្ត្រីក្រសួងទេសចរណ៍នៅទីស្នាក់ការកណ្តាលរបស់ក្រុមហ៊ុន Yunnan Investment Holding Group ដែលមានមូលដ្ឋាននៅប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសជួបពិភាក្សាការងារផ្តោតលើការជម្រុញការអភិវឌ្ឍវិស័យទេសចរណ៍នៅកម្ពុជា ពិសេសបង្កើនការវិនិយោគថ្មីៗក្នុងវិស័យទេសចរណ៍នៅខេត្តសៀមរាប លោក Liu Minglin ប្រធានក្រុមហ៊ុន (YIG) បានបង្ហាញការចាប់អារម្មណ៍ក្នុងការបណ្តាក់ទុកវិនិយោគលើវិស័យទេសចរណ៍នៅកម្ពុជា និងគូសបញ្ជាក់បន្ថែមថានឹងចាត់ក្រុមការងារជំនាញក្រុមហ៊ុនរបស់លោក ចុះទៅសិក្សាផ្ទាល់លើសក្តានុពលនៅកម្ពុជាក្នុងពេលដ៏ឆាប់ខាងមុខនេះ។

ជាការឆ្លើយតប លោករដ្ឋមន្ត្រី ហួត ហាក់ បានស្វាគមន៍រាល់ការវិនិយោគលើវិស័យទេសចរណ៍ក្នុងប្រទេសកម្ពុជា និងបានស្នើឱ្យប្រធានក្រុមហ៊ុន រៀបចំគម្រោងវិនិយោគឱ្យបានរួចរាល់ និងបញ្ជូនមករាជរដ្ឋាភិបាលកម្ពុជា ដើម្បីពិនិត្យ និងសម្រេច។ លោករដ្ឋមន្រ្តី ក៏បានស្នើឱ្យប្រធានក្រុមហ៊ុន ពង្រឹងទំនាក់ទំនងជាមួយវិស័យឯកជនកម្ពុជា និងកៀរគរអ្នកវិនិយោគមកបណ្តាក់ទុនលើការអភិវឌ្ឍន៍វិស័យទេសចរណ៍កម្ពុជាឱ្យបានច្រើនថែមទៀត៕