លោក លី សាម៉េត, ដួង តារា និងពីរនាក់ទៀត ត្រូវបានចោទប្រកាន់ពីបទ ប៉ុនប៉ងក្នុងបទសូកប៉ាន់

តំណាងអយ្យការ​អមសាលាដំបូងរាជធានីភ្នំពេញ សម្រេចចោទប្រកាន់ លោក លី សាម៉េត លោក ដួង តារា លោក កន សុខកាយ និងលោក ឡាច សំរោង ​ ពីបទ «ប៉ុនប៉ងក្នុងបទសូកប៉ាន់» តាមបញ្ញត្តិមាត្រា ២៧ មាត្រា​ ៦០៥ នៃក្រមព្រហ្មទណ្ឌ និងមាត្រា ៣២ នៃច្បាប់ស្តីពីការប្រឆាំងអំពើពុករលួយ ។ នេះបើតាម លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ បានឱ្យដឹងនៅព្រឹកថ្ងៃទី១៣ ខែ វិច្ឆិកា ឆ្នាំ២០២៤។

សូមជម្រាបថា លោក លី សាម៉េត និងលោក ដួង តារា ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចឃុំខ្លួនជាបណ្តោះអាសន្នកាលពីពេលថ្មីៗនេះ។ ចំណែក លោក កន សុខកាយ អតីតអភិបាលស្រុកល្វាឯម ត្រូវបានអង្គភាពប្រឆាំងអំពើពុករលួយឃាត់ខ្លួននៅថ្ងៃទី១២ ខែវិច្ឆិកា ឆ្នាំ២០២៤ ខណៈ លោក ឡាច សំរោង ដែលត្រូវបានចោទប្រកាន់ពីបទ ប៉ុនប៉ងក្នុងបទសូកប៉ាន់ ដូចគ្នា កំពុងរត់គេចខ្លួន។

ជុំវិញសំណុំរឿងពុករលួយនេះដែរ លោក ឡាយ វិសិដ្ឋ អភិបាលរងខេត្តពោធិ៍សាត់ ក៏ត្រូវបានឃុំខ្លួនជុំវិញសំណុំរឿងសូកប៉ាន់ក្នុងទំហំទឹកប្រាក់ចំនួន ៥៧ ម៉ឺនដុល្លារ ក្នុងគោលបំណងទទួលបានតំណែងជាអភិបាលខេត្ត៕