នាយសេនាធិការ​​​របស់លោក ហ្សេលេនស្គី លាលែងតំណែង ក្រោយអង្គភាពប្រឆាំង​អំពើពុករលួយ​​​ចូលឆែកឆេរផ្ទះ

នាយសេនាធិការ​​​របស់​ប្រធានាធិបតី​អ៊ុយក្រែន បានលាលែងពីតំណែងហើយ ស្របពេលមានការស៊ើបអង្កេតជុំវិញរឿងអាស្រូវពុករលួយទឹកប្រាក់​​ប្រមាណ​១០០លានដុល្លារអាមេរិក។

តាមការផ្សាយរបស់ RT កាលពីថ្ងៃសុក្រទី២៨ខែវិច្ឆិកាឆ្នាំ២០២៥ លោក Andrey Yermak ដែលជាជំ​និតរបស់លោក វ៉ូឡូឌីមៀរ ហ្សេលេនស្គី បានលាលែងត្រឹមប៉ុន្មានម៉ោងប៉ុណ្ណោះ បន្ទាប់ពី​​​​​អាជ្ញាធរប្រឆាំ​ង​អំពើពុករលួយ​​អ៊ុយក្រែន ឆ្មក់​ចូលឆែកឆេរផ្ទះផ្ទះរបស់គាត់ ក្នុងប្រតិបត្តិការកម្ចាត់ការលាងលុយកខ្វក់។

ការឆ្មក់ចូលផ្ទះលោក Yermak ត្រូវគេភ្ជាប់ទៅនឹងការស៊ើបអង្កេតលើគ្រោងការណ៍ អំពើពុករលួយ ១០០ លានដុល្លារ ដែលប្រកាសដោយទីភ្នាក់ងារប្រឆាំងអំពើពុករលួយអ៊ុយក្រែន (NABU) និងការិយាល័យរដ្ឋអាជ្ញាប្រឆាំងអំពើពុករលួយពិសេស (SAPO) កាលពីដើមខែនេះ។

គេដាក់ការសង្ស័យថា ក្រុមឧក្រិដ្ឋកម្មមានទំនាក់ទំនងយ៉ាងជិតស្និទ្ធិជាមួយផ្ទៃក្នុងលោក ហ្សេលេនស្គី ហើយត្រូវបានដឹកនាំដោយលោក Timur Mindich ដែលជាអតីតដៃគូអាជីវកម្មរបស់មេដឹកនាំអ៊ុយក្រែន។

គេសង្ស័យទៀតថា ក្រុមនេះបានបង្វែរមូលនិធិចេញពីក្រុមហ៊ុនប្រតិបត្តិការថាមពលនុយក្លេអ៊ែររបស់រដ្ឋគឺ Energoatom ដែលពឹងផ្អែកយ៉ាងខ្លាំងលើ ជំនួយពីលោកខាងលិច ហើយរឿងអាស្រូវកាន់តែរាលដាលដោយសារតែ ស្ថានភាពថាមពលរឹតធ្ងន់ធ្ងររបស់អ៊ុយក្រែន នាំឲ្យមានការចោទប្រកាន់ថា ក្រុមនេះបាន កិបកេងមូលនិធិ ដែលត្រូវចំណាយលើការ ការពារទីតាំងផលិតថាមពល។

សូមជម្រាបជាថ្មី លោក Yermak ត្រូវ​​គេ​មើល​ឃើញ​​ថា ​​ជា​បុរស​មាន​អំណាច​ទីពីរ​របស់​អ៊ុយក្រែន។ លោក​បាន​ដឹកនាំ​គណៈប្រតិភូ​អ៊ុយក្រែន​ក្នុង​អំឡុង​ពេល​​កិច្ច​ពិភាក្សា​ថ្មីៗ​នេះ​នៅ​ទីក្រុង​ហ្សឺណែវ ​ជាមួយ​សហរដ្ឋអាមេរិក​ជុំវិញ​សង្រ្គាម​ជាមួយ​រុស្ស៊ី៕

អត្ថបទ៖ សុខ សុវណ្ណ