កម្មវិធីផ្តល់អាហារតាមសាលានៅកម្ពុជា ធ្វើឱ្យការចុះឈ្មោះចូលរៀនរបស់សិស្សកើនឡើងដល់ ៩៩ %

ដើម្បីកសាងសង្គមមួយប្រកបដោយភាពធន់ និងលុបបំបាត់ភាពក្រីក្រ, រាជរដ្ឋាភិបាលកម្ពុជា ដៃគូអភិវឌ្ឍន៍ អង្គការមិនមែនរដ្ឋាភិបាល និងភាគីពាក់ព័ន្ធនានា បានធ្វើការរួមគ្នាយ៉ាងសកម្មដើម្បីដាក់ចេញនូវយុទ្ធសាស្ត្រជាច្រើន សំដៅស្វែងរកដំណោះស្រាយនៃបញ្ហាសង្គមដែលកំពុងកើតមានឡើងទាំងនេះ។

ការផ្តល់អាហារតាមសាលារៀន ជាអន្តរាគមន៍សកលដែលមានលក្ខណៈជាយុទ្ធសាស្ត្រក្នុងការរួមចំណែក ដល់ការកាត់បន្ថយភាពអត់ឃ្លាន និងលុបបំបាត់ភាពក្រីក្រ។ អន្តរាគមន៍នេះ មានគោលបំណងផ្តល់អាហារូបត្ថម្ភ ដល់កុមារនៅតាមសាលារៀនឱ្យទទួលបានការអភិវឌ្ឍពេញលេញ និងរួមចំណែកដល់ការអភិវឌ្ឍមូលធនមនុស្សសម្រាប់អនាគត ឆ្ពោះទៅការកសាងសង្គមមួយប្រកបដោយភាពធន់ និងវិបុលភាព។

ជាក់ស្ដែង ភស្តុតាងនៃការសិក្សាស្រាវជ្រាវនៅកម្ពុជាបានបង្ហាញថា ការផ្ដល់អាហារតាមសាលារៀន ជួយបង្កើនការចូលរៀន រក្សាវត្តមានសិក្សា ពង្រឹងការផ្ចង់ស្មារតីក្នុងម៉ោងសិក្សា និងលើកកម្ពស់លទ្ធផលសិក្សារបស់សិស្ស ជាពិសេសសិស្សស្រី។ ការផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ បានរួមចំណែកដល់ការប្រយុទ្ធនឹងការអត់ឃ្លាន និងកង្វះអាហារូបត្ថម្ភរបស់កុមារ និងអាចជួយធានាឱ្យ​កុមារ ទទួលបានអាហារដែលមានសារជាតិចិញ្ចឹមគ្រប់គ្រាន់ និងទៀងទាត់។  នេះបើយោងតាមគោលនយោបាយរាជរដ្ឋាភិបាលកម្ពុជា ស្តីពីការផ្តល់អាហារតាមសាលារៀនឆ្នាំ ២០២៤-២០៣៥។

យោងរបាយការណ៍វាយតម្លៃស្តីពី កម្មវិធីផ្ដល់អាហារតាមសាលារៀន បានចង្អុលបង្ហាញពីការចូលរួមចំណែកក្នុងការផ្លាស់ប្តូរជាវិជ្ជមានលើការ ចុះឈ្មោះចូលរៀនរបស់សិស្សកម្ពុជា ដែលនៅឆ្នាំ២០០១ អត្រាចុះឈ្មោះចូលរៀនមានត្រឹមតែ ៨១% និងកើនឡើង រហូតដល់ ៩៨% នៅឆ្នាំ២០១៩ ជាពិសេសតំបន់ជនបទ និងដាច់ស្រយាល។

បន្ថែមពីនេះ សាលារៀនក្នុងស្រុក ដែលទទួលបានការអន្តរាគមន៍លើកម្មវិធីអាហារតាមសាលារៀន បានបង្ហាញលទ្ធផលជាវិជ្ជមានគួរឱ្យកត់សម្គាល់លើគុណភាពអប់រំ ដូចជាការចុះឈ្មោះចូលរៀនរបស់សិស្សមានការកើនឡើងរហូតដល់៩៩,២% អត្រាបញ្ចប់ការសិក្សាកើនឡើងដល់៨៥,៣% និងការកាត់បន្ថយការបោះបង់ការសិក្សាដល់៤.៥% ខណៈសាលារៀន ដែលមិនបានទទួលការអន្តរាគមន៍កម្មវិធីនេះ មានអត្រានៃការចុះឈ្មោះចូលរៀនត្រឹមតែ៩១,២% ការបញ្ចប់ការសិក្សា ៨១,៩% ហើយអត្រានៃការបោះបង់ការសិក្សាមានរហូតដល់៤,៨%។

ដោយមើលឃើញអំពីសារៈសំខាន់នៃការផ្ដល់អាហារតាមសាលារៀន, ក្រសួងអប់រំ យុវជន និងកីឡា ក្រោមកិច្ចសហការជាមួយកម្មវិធីស្បៀងអាហារពិភពលោករបស់អង្គការសហប្រជាជាតិ បានចាប់ផ្តើមអនុវត្ត កម្មវិធីផ្ដល់អាហារតាមសាលារៀនតាំងពីឆ្នាំ១៩៩៩ នៅសាលាបឋមសិក្សាចំនួន៦៤ ដែលមានអ្នកទទួលផល ៣៧ ៥០០នាក់ និងបន្តពង្រីកជាបន្តបន្ទាប់ដោយប្រើប្រាស់ស្បៀងដែលផ្គត់ផ្គង់ទាំងស្រុងដោយកម្មវិធីស្បៀង អាហារពិភពលោក ក្នុងគោលបំណងផ្ដល់លទ្ធភាពដល់កុមារមកពីគ្រួសារក្រីក្របានចូលរៀន។

បើទោះជាមានបទពិសោធក្នុងរយៈពេល២០ឆ្នាំ ក្នុងការអនុវត្តកម្មវិធីផ្ដល់អាហារតាមសាលារៀននៅកម្ពុជា, បញ្ហាប្រឈមមួយចំនួននៅតែជាកង្វល់ និងឧបសគ្គដល់ការធានាប្រសិទ្ធភាពកម្មវិធី ដែលរួមមាន ភាពមិនពេញលេញនៃយន្តការកំណត់តួនាទី ទំនួលខុសត្រូវ កង្វះសង្គតិភាព ក៏ដូចជាកង្វះការកំណត់ស្តង់ដាជាអប្បបរមាន វិធានអនាម័យ
និងសុវត្ថិភាពម្ហូបអាហារ។ បញ្ហាទាំងនេះ ដែលទាមទារឱ្យរាជរដ្ឋាភិបាលកម្ពុជាដាក់ចេញនូវគោលនយោយសម្រាប់ដោះស្រាយឆ្នាំ ២០២៤-២០៣៥។

គួរជម្រាបថា គោលនយោបាយស្តីពីការផ្តល់អាហារតាមសាលារៀន មានចក្ខុវិស័យរួមចំណែកអភិវឌ្ឍមូលធនមនុស្សដោយបំពាក់នូវវិជ្ជាសម្បទា, បំណិនសម្បទា, ចរិយាសម្បទា, និងកាយសម្បទាពេញលេញសំដៅរួមចំណែក កសាងសង្គមកម្ពុជាឱ្យមានការអភិវឌ្ឍប្រកបដោយវិបុលភាព៕