កីឡា

ពិធីបើកការប្រកួតតេក្វាន់ដូ ITF៖ ឯកឧត្ដម ហ៊ុន ម៉ានី កីឡាជាស្ពានដ៏សំខាន់ក្នុងការរក្សាទំនាក់ទំនង

បានផុស

១០ ខែ មុន

នៅ

ថ្ងៃអាទិត្យ ២៩ មិថុនា ២០២៥

ដោយ

ឯកឧត្ដម ហ៊ុន ម៉ានី បង្ហាញស្នាមញញឹម និងពេញចិត្តចំពោះពិធីបើកការប្រកួតជ្រើសរើសជើងឯកតេក្វាន់ដូ ITF អាស៊ីអាគ្នេយ៍ លើកទី២ បន្ទាប់ពីមើលឃើញពីការរៀបចំ និងសម្ដែងបង្ហាញយ៉ាងល្អប្លែកពីសំណាក់កីឡាករ កីឡាការិនីជម្រើសជាតិកម្ពុជា កាលពីរសៀលថ្ងៃទី២៨ ខែមិថុនា ឆ្នាំ២០២៥ នៅវិមានពហុកីឡដ្ឋានជាតិ។

ឯកឧត្ដម ហ៊ុន ម៉ានី

ឯកឧត្តមឧបនាយករដ្ឋមន្ត្រី ហ៊ុន ម៉ានី មានប្រសាសន៍ថា ព្រឹត្តិការណ៍ប្រកួតកីឡាមិនត្រឹមតែជាការប្រកួតប្រជែង ដើម្បីដណ្តើមជ័យលាភីប៉ុណ្ណោះទេ ប៉ុន្តែក៏ជាវេទិកាដ៏សំខាន់សម្រាប់ការបណ្តុះសីលធម៌ វិន័យ និងស្មារតី និងការទទួលខុសត្រូវផងដែរ។

លោក Ri Yong Son ប្រធានសហព័ន្ធកីឡាតេក្វាន់ដូ ITF ពិភពលោក

តាមរយៈការប្រកួតប្រជែងដោយយុត្តិធម៌ បានធ្វើឲ្យកីឡាករ កីឡាការិនីរៀនសូត្រពីការគោរពគ្នា ការទទួលស្គាល់សមត្ថភាពអ្នកដទៃ និងការចេះអត់ធ្មត់ក្នុងការតស៊ូ។ ទាំងនេះហើយគឺជាគុណតម្លៃដ៏ថ្លៃថ្លា ដែលកីឡាបានផ្តល់ជូនយើងម្នាក់ៗ។

ទិដ្ឋភាពពិធីបើក

គណៈអធិបតីបន្ថែមទៀតថា កីឡាបានរួមចំណែកដល់ការពង្រឹងសហគមន៍ ផ្សារភ្ជាប់ភាពខុសគ្នា និងបណ្តុះវប្បធម៌ នៃការចូលរួមជាមួយគ្នា ដោយមិនគិតពីភាសា ជាតិសាសន៍ ពណ៌ សម្បុរ ឬសាវតា តែផ្តោតជាភាសារួមគ្នា នៃការខិតខំប្រឹងប្រែង ការងារជាក្រុម និងការ គោរពគ្នាទៅវិញទៅមក។ ក្នុងន័យនេះ កីឡា ជាស្ពានដ៏សំខាន់ ក្នុងការរក្សាទំនាក់ទំនង ល្អរវាងប្រជាជន និងប្រជាជន ក្នុងតំបន់អាស៊ីអាគ្នេយ៍ ឱ្យកាន់តែមានភាពស្និទ្ធស្នាល តាម រយៈការលេងកីឡា និងការផ្លាស់ប្តូរវប្បធម៌ប្រពៃណីរវាងគ្នាទៅវិញទៅមក។

ទិដ្ឋភាពពិធីបើក

បញ្ជាក់ដែរថា សហព័ន្ធតេក្វាន់ដូ ITF កាលពីរសៀលថ្ងៃទី២៨ ខែមិថុនា ឆ្នាំ២០២៥ នេះបានធ្វើពិធីបើកការប្រកួតជ្រើសរើសជើងឯកអាស៊ីអាគ្នេយ៍ លើកទី២ នៅវិមានពហុកីឡដ្ឋានជាតិក្រោមអធិបតីភាព ឯកឧត្តមឧបនាយករដ្ឋមន្ត្រី ហ៊ុន ម៉ានី លោក កែវ រ៉េមី លោក Ri Yong Son ប្រធានសហព័ន្ធកីឡាតេក្វាន់ដូ ITF ពិភពលោក និងអង្គទូតនានា កីឡាករ កីឡាការិនី ជាតិ-អន្តរជាតិជាច្រើនរយនាក់។ ការប្រកួតនេះដំណើរការទៅរយៈពេល ៤ថ្ងៃចាប់ពីថ្ងៃទី២៧ ដល់ ៣០ ខែមិថុនា ឆ្នាំ២០២៥ ដែលមាន៦ ប្រទេសចូលរួម កម្ពុជា វៀតណាម ម៉ាឡេស៊ី ហ្វីលីពីន សិង្ហបុរី ឥណ្ឌូណេស៊ី៕