អ៊ីស្រាអែល​បន្ត​សម្លាប់​​មិន​បន្ធូរ​ដៃ បាត់បង់​ជីវិត​​៥១នាក់ទៀត​ហើយ​នៅ​ហ្គាហ្សា

យ៉ាងហោចណាស់ ជនជាតិប៉ាឡេស្ទីន​ចំនួន​ ៥១​នាក់ត្រូវបានសម្លាប់នៅក្នុង​ការវាយប្រហារតាមអាកាសឥត​ឈប់​ឈរ​របស់អ៊ីស្រាអែល​នៅ​ទូទាំង​តំបន់ហ្គាហ្សាស្ទ្រីប ចាប់តាំងពីព្រឹកថ្ងៃសៅរ៍​ទី​២៨​ខែ​មិថុនា។ នេះបើយោងតាមមន្ត្រីសុខាភិបាលក្នុងតំបន់​ហ្គាហ្សា។

ការវាយប្រហារ បានធ្វើ​ឡើង​លើ​តំបន់លំនៅដ្ឋាន សាលារៀន ផ្សារ និងទីជម្រកជាច្រើន បណ្តាលឲ្យជនស៊ីវិលរាប់សិបនាក់​បាត់បង់​ជីវិត និង​រងរបួស។ ក្នុង​ចំណោម​អ្នក​ស្លាប់​ទាំង​នោះ​មាន​ស្ត្រី និង​កុមារ ដែល​ភាគ​ច្រើន​កំពុង​ជ្រក​កោន​នៅ​សាលា​រៀន ឬ​តង់​បណ្ដោះ​អាសន្ន។ នៅក្នុងសង្កាត់ Al-Tuffah ការវាយប្រហារតាមអាកាស បានកើត​ឡើង​​នៅជិតសាលា Yafa ដែលត្រូវ​បាន​ប្រើប្រាស់​ជា​ជម្រកដល់​ក្រុម​គ្រួសារ​ប៉ាឡេស្ទីន​ដែលផ្លាស់ទីលំនៅ។ មនុស្ស​៨​នាក់​បាន​ស្លាប់ ក្នុង​នោះ​មាន​កុមារ​ ៥​នាក់ និង​ស្ត្រី​ម្នាក់ ហើយ​យ៉ាង​ហោច​ណាស់​ ២៧​នាក់​ផ្សេង​ទៀត​រង​របួស។ នៅ​ក្នុង​សង្កាត់​ដដែល ការ​បាញ់​ផ្លោង​កាំភ្លើង​ធំ​លើ​ផ្សារ​ដ៏​មមាញឹក​មួយ​កន្លែង ​បាន​សម្លាប់​ជន​ស៊ីវិល ១១នាក់​បន្ថែម​ទៀត។

នៅ​ភាគ​ខាង​ជើង​តំបន់ហ្គាហ្សា សាលា Adnan Al-Alami ក៏ត្រូវបានវាយប្រហារផងដែរ ដែលបណ្តាល​ឲ្យមនុស្ស​ ២​នាក់ស្លាប់ក្នុងនោះមានកុមារម្នាក់ និងរបួសដល់ទៅ ១២​នាក់ផ្សេងទៀត។ ការស្លាប់និងរបួសបន្ថែមជាច្រើនត្រូវបានរាយការណ៍នៅក្នុង​ទីក្រុង Jabalia al-Balad និង Deir al-Balah ជាកន្លែងដែលតំបន់លំនៅដ្ឋាន​ជា​ច្រើន​ត្រូវបានភ្លើងឆាបឆេះ។

ចំណែក​​នៅ​ភាគ​ខាង​ត្បូង​តំបន់ Khan Younis មនុស្ស ៦​នាក់ត្រូវបានសម្លាប់នៅក្នុងការវាយប្រហារតាមអាកាស​លើ​ជុំរុំ​​បោះ​តង់មួយ​កន្លែង​ក្នុងទីក្រុង Al-Mawasi ដែលជាតំបន់​​ជនភៀសខ្លួន។ ទន្ទឹមនឹងនេះ កងកម្លាំងអ៊ីស្រាអែល តាមសេចក្តីរាយការណ៍បានបើកការបាញ់ប្រហារទៅលើជនស៊ីវិលដែលឈរតម្រង់ជួរសុំជំនួយនៅជិតច្រករបៀង Netzarim និង Rafah ដោយបានសម្លាប់មនុស្ស ៧​នាក់ និងជាង​ ១០​នាក់ផ្សេងទៀតរងរបួស។

ការវាយប្រហារចុងក្រោយបំផុតទាំងនេះ កើតឡើងចំពេលដែល​មាន​យុទ្ធនាការយោធាអ៊ីស្រាអែលកាន់តែខ្លាំង​ ដែលបានបំផ្លិចបំផ្លាញតំបន់ហ្គាហ្សា ចាប់តាំងពីសង្គ្រាមបាន​ផ្ទុះ​​ឡើង​នៅក្នុងខែតុលាឆ្នាំ​២០២៣។ យោងតាមអាជ្ញាធរប៉ាឡេស្ទីន មនុស្សជាង ៥៦ ០០០​នាក់ត្រូវបានសម្លាប់ចាប់តាំងពីការចាប់ផ្តើមនៃជម្លោះ។ ការវាយប្រហារជាច្រើន បានធ្វើ​នៅ​តំបន់ជនស៊ីវិល ដោយបង្កើនការព្រួយបារម្ភជាអន្តរជាតិលើការរំលោភច្បាប់មនុស្សធម៌អន្តរជាតិ៕

ដោយ៖ ឈាង