ព័ត៌មានជាតិ

សម្តេច ម៉ែន សំអន ៖ សមាគមមិត្តភាព កម្ពុជា-វៀតណាម បានចូលរួមបង្កើនពង្រឹង កិច្ចសហប្រតិបត្តិការពាណិជ្ជកម្ម និងវិនិយោគ

បានផុស

១ ខែ មុន

នៅ

ថ្ងៃសុក្រ ៦ ធ្នូ ២០២៤

ដោយ

សម្តេចកិត្តិសង្គហបណ្ឌិត ម៉ែន សំអន ប្រធានសមាគមមិត្តភាព កម្ពុជា-វៀតណាម បានថ្លែងថា សមាគមមិត្តភាព កម្ពុជា-វៀតណាម បានចូលរួមយ៉ាងសកម្មក្នុងការបង្កើនពង្រឹងកិច្ចសហប្រតិបត្តិការពាណិជ្ជកម្ម និងវិនិយោគ សម្រាប់ប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ក្នុងពេលជំនួបកិច្ចប្រជុំជាមួយលោកជំទាវ ង្វៀង ធីថាញ់ ប្រធានសមាគមមិត្តភាព វៀតណាម-កម្ពុជា សហប្រធាន បានដឹកនាំកិច្ចប្រជុំ នៃសមាគមប្រទេសទាំងពីរ ដែលភាគីកម្ពុជាធ្វើជាម្ចាស់ផ្ទះ។ ពិធីនេះបានរៀបចំឡើងនៅសណ្ឋាគារវ៉ាការ៉ាកែប នាព្រឹកថ្ងៃសុក្រ ៦ កើត ខែមិគសិរ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី ៦ ខែធ្នូ ឆ្នាំ ២០២៤ នាខេត្តកែប។

សម្តេចកិត្តិសង្គហបណ្ឌិត បានមានប្រសាសន៍ថា ទំនាក់ទំនងការទូតទ្វេភាគីមកដល់ពេលនេះមានរយៈពេល ៥៧ ឆ្នាំ ដែលបានបង្កើតឡើងដោយគោរពស្រឡាញ់គ្នាជា បងប្អូន និងបានរីកចម្រើនយ៉ាងខ្លាំង ជាពិសេស នៅក្នុងដំណាក់កាលថ្មីដែលប្រទេសជាតិមានសន្តិភាព ស្ថិរភាព និងការអភិវឌ្ឍបានស្តែងចេញជាផ្លែផ្កាលើគ្រប់វិស័យ ពីវិស័យនយោបាយ ការពារជាតិ រហូតដល់វិស័យ សេដ្ឋកិច្ច សង្គមកិច្ច ទេសចរណ៍ ពាណិជ្ជកម្ម វប្បធម៌ និងវិទ្យាសាស្ត្រ។ ជាពិសេស ការពង្រឹងនូវចំណងមិត្តភាព, ការទូប្រជាជន, កិច្ចសហប្រតិបត្តិការព្រំដែន នៃប្រទេសទាំងពីរ ដើម្បីរក្សាបានព្រំដែនសន្តិភាព និងការអភិវឌ្ឍលើគ្រប់វិស័យ។

លោកជំទាវ ង្វៀង ធីថាញ់ លើកឡើងថា បន្ទាប់ពីសមាគមមិត្តភាព វៀតណាម-កម្ពុជា បានចុះហត្ថលេខាលើអនុស្សរណៈ នៃការយោគយល់គ្នា ស្តីពីសកម្មភាពសម្របសម្រួលរវាងសមាគមទាំងពីរ ដំណាក់កាលឆ្នាំ ២០២២-២០២៧ បានបង្ហាញថា ប្រទេសទាំងពីរ បានយកចិត្តទុកដាក់លើការផ្លាស់ប្តូរ និងចែករំលែកបទពិសោធលើសកម្មភាពមិត្តភាពរវាងប្រជាជន និងប្រជាជន រវាងខេត្តជាប់ព្រំដែន និងការផ្លាស់ប្តូរមិត្តភាព និងកិច្ចសហប្រតិបត្តិការរវាងធុរកិច្ច និងក្លឹបធុរកិច្ច នៃសមាគមទាំងពីរ។

តាមរយៈកិច្ចប្រជុំនេះបានបង្ហាញអំពីការពង្រឹងនូវចំណង នៃទំនុកចិត្ត និងការយោគយល់គ្នាទៅវិញទៅមក ដោយបានជំរុញការកែលម្អបន្ថែមទៀតនូវគុណភាព និងប្រសិទ្ធភាព នៃការសម្របសម្រួលរវាងសមាគមទាំងពីរ ក្នុងការដើរតួនាទីជាស្ពានជំរុញកិច្ចសហប្រតិបត្តិការពាណិជ្ជកម្ម និងវិនិយោគ និងរួមចំណែកធ្វើឱ្យកាន់តែស៊ីជម្រៅនូវទំនាក់ទំនងប្រពៃណី នៃសាមគ្គីភាព និងមិត្តភាព និងកិច្ចសហប្រតិបត្តិការលើគ្រប់វិស័យរវាងបក្សទាំងពីរ រដ្ឋទាំងពីរ និងប្រជាជន នៃប្រទេសទាំងពីរ៕

អត្ថបទ ៖ វិមាន