រដ្ឋមន្ត្រីកសិកម្មអំពាវនាវឱ្យប្រជានេសាទ គោរពច្បាប់ជលផល

លោក ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានស្នើសុំឱ្យប្រជានេសាទ ចូលរួមសហការជាមួយមន្ដ្រីជំនាញ គោរពតាមច្បាប់ស្ដីពីជលផល។

បើតាមលោករដ្ឋមន្ត្រី ការនេសាទដោយប្រើប្រាស់ឧបករណ៍នេសាទស្របតាមច្បាប់ គឺជាការចូលរួមចំណែកយ៉ាងធំធេងរបស់ប្រជានេសាទ​ ក្នុងការធានានិរន្ដរភាពធនធានជលផលធម្មជាតិ ឱ្យស្ថិតស្ថិរគង់វង្ស និងកាន់តែសម្បូរឡើងនៅក្នុង​រយៈពេលប៉ុន្មានឆ្នាំខាងមុខ។

លោករដ្ឋមន្ត្រីបានលើកឡើងក្នុងពេលជួបជាមួយប្រជាពលរដ្ឋជិត ១០០នាក់ នៅឃុំកំពង់ភ្លុក ខេត្តសៀមរាប កាលពីរសៀលថ្ងៃទី ១៣ ខែធ្នូ ឆ្នាំ ២០២៤។

ដំណើររបស់លោករដ្ឋមន្ត្រី និងថ្នាក់ដឹកនាំខេត្ត ទៅតំបន់កំពង់ភ្លុកនាពេលនេះ ធ្វើឡើងដើម្បីស្វែងយល់អំពីជីវភាព ព្រមទាំងស្ដាប់សំណូមពរទាំងឡាយរបស់បងប្អូនប្រជានេសាទ ដែលធ្លាប់បានថ្លែងជម្រាបជូនសម្ដេចមហាបវរធបតី ហ៊ុន ម៉ាណែត រដ្ឋមន្ដ្រីនៃព្រះរាជាណាចក្រកម្ពុជា នាពេលលោកអញ្ជើញមកកាន់តំបន់ទេសចរណ៍កំពង់ភ្លុក កាលពីដើមខែធ្នូ ឆ្នាំ២០២៤កន្លងទៅ៕