មន្ទីរធនធានទឹកខេត្តតាកែវ ណែនាំឲ្យពលរដ្ឋធ្វើស្រូវប្រាំងត្រឹមមួយលើក ចៀសវាងបញ្ហាប្រឈមខ្វះទឹកស្រោចស្រព

មន្ទីរធនធានទឹកខេត្តតាកែវ បានណែនាំឲ្យប្រជាកសិករដែលបង្កបង្កើនផលស្រូវប្រាំងនៅឆ្នាំនេះ គួរដាំដុះត្រឹមតែមួយលើក ដើម្បីចៀសវាងបញ្ហាប្រឈមខ្វះខាតទឹកស្រោចស្រពនារដូវប្រាំង។ ការណែនាំនេះ គឺដោយមើលឃើញពីបរិមាណទឹកភ្លៀងនៅឆ្នាំ២០២៤នេះ ទាបជាងឆ្នាំមុន និងកម្ពស់ទឹកទន្លេក៏ទាបជាងឆ្នាំមុនដែរ។ ជាមួយគ្នានេះ មន្ទីរធនធានទឹកខេត្តតាកែវ ក៏ធ្លាប់បានផ្សព្វផ្សាយដល់ប្រជាពលរដ្ឋ និងអាជ្ញាធរមូលដ្ឋានឱ្យរក្សាទឹក និងសន្សំសំចៃទឹកប្រើប្រាស់នារដូវប្រាំងផងដែរ។

តាមរយៈរបាយការណ៍របស់លោក ប៊ុន ហួ ប្រធានមន្ទីរធនធានទឹក និងឧតុនិយម ខេត្តតាកែវ គោរពជូនរដ្ឋមន្ត្រីក្រសួងធនធានទឹក និងឧតុនិយម កាលពីថ្ងៃទី១៦ធ្នូ បានឲ្យដឹងថា តាមផែនការនៅឆ្នាំ២០២៤-២០២៥ ខេត្តតាកែវគ្រោងដាំដុះស្រូវប្រាំងចំនួន៨ម៉ឺនហិកតា គិតមកដល់ថ្ងៃទី១៣ ខែធ្នូ ឆ្នាំ២០២៤ អនុវត្តបានចំនួន ៤៨.៦២៦ហិកតា ស្មើនឹង៦២%នៃផែនការ។

របាយការណ៍ដដែលបញ្ជាក់ថា ខេត្តតាកែវមានប្រព័ន្ធធារាសាស្ត្រចំនួន ១៣០ ប្រព័ន្ធ ក្នុងនោះប្រព័ន្ធធារាសាស្ត្រមានលទ្ធភាពស្រោចស្រពស្រូវរដូវប្រាំងឆ្នាំ២០២៤-២០២៥ ចំនួន ៥៨ប្រព័ន្ធ លើផ្ទៃដីចំនួន ៨៣.៥៥០ ហិកតា (ស្រូវប្រាំងលើកទី១ ឬប្រាំងបណ្តេញទឹក) ចំនួន ៦៤ប្រព័ន្ធ ទឹកសម្រាប់ប្រើប្រាស់ប្រចាំថ្ងៃ និងចំនួន៨ប្រព័ន្ធមិនមានលទ្ធភាពរក្សាទឹក៕

អត្ថបទ៖ សុខុម