សាកលវិទ្យាល័យពាណិជ្ជសាស្ត្រ អេស៊ីលីដា ជំរុញឱ្យនិស្សិតចូលរួមសិក្សាស្រាវជ្រាវ និងសរសេររបាយការណ៍ ដើម្បីពង្រឹងសមត្ថភាពស្របតាមនវានុវត្តន៍ 

ភ្នំពេញ ៖​ សាកលវិទ្យាល័យ ពាណិជ្ជសាស្ត្រ អេស៊ីលីដា ជំរុញឱ្យនិស្សិត ចូលរួមសិក្សាស្រាវជ្រាវនិងសរសេររបាយការណ៍ ដើម្បីពង្រឹងនូវសមត្ថភាពស្របតាមនវានុវត្តន៍ ។

នេះជាការលើកឡើងរបស់ លោកបណ្ឌិត ផុន ណារិន សាកលវិទ្យាធិការ សាកលវិទ្យាល័យ ពាណិជ្ជសាស្ត្រ អេស៊ីលីដា និងជាប្រធានគណៈកម្មការដឹកនាំ ការសរសេរសារណាបញ្ចប់ការសិក្សាក្នុងកម្មវិធីការពារសារណាបញ្ចប់ការសិក្សា និស្សិតថ្នាក់បរិញ្ញាបត្រ ជំនាញហិរញ្ញវត្ថុ និងធនាគារ ជំនាន់ទី៥ និងជំនាញពាណិជ្ជកម្មអន្តរជាតិ ជំនាន់ទី២ សម្រាប់ឆ្នាំសិក្សា ២០២៣-២០២៤ ។

កម្មវិធីនេះមានការចូលរួមពី ឯកឧត្ដមសាន វឌ្ឍនា រដ្ឋលេខាធិការ ក្រសួងអប់រំយុវជននិងកីឡា និងជាប្រធានគណៈកម្មការទទួលបន្ទុករួម ព្រមទាំងនិស្សិតចំនួន ១០រូបក្នុងនោះ ស្រី ៥នាក់ដែលជាបេក្ខជន ការពារសារណាបញ្ចប់ការសិក្សា។

លោកបណ្ឌិត ផុន ណារិន មានប្រសាសន៍ថា ប្រធានបទចំនួន១០ ដែលនិស្សិតទាំង ១០រូប បានសរសេរជារបាយការណ៍ ដើម្បីធ្វើការការពារសារណាបញ្ចប់ការសិក្សានេះ គឺត្រូវជាមួយនឹងនវានុវត្តន៍ សេដ្ឋកិច្ច ពាណិជ្ជកម្ម នាពេលបច្ចុប្បន្ន ។ អ្វីៗដែលនិស្សិតកំពុងតែសិក្សារៀនសូត្រនៅសាកលវិទ្យាល័យ ហើយឯកសារដែលសិក្សាស្រាវជ្រាវសុទ្ធសឹងតែជាឯកសារនវានុវត្តនាពេលបច្ចុប្បន្ន ដើម្បីឱ្យនិស្សិតទាំងនោះចូលរួមសិក្សាស្រាវជ្រាវ និងសរសេររបាយការណ៍ ក្នុងគោលដៅសាកលវិទ្យាល័យពង្រឹងសមត្ថភាពរបស់និស្សិតឈានឆ្ពោះទៅសាកលវិទ្យាល័យមួយជាលំដាប់អន្តរជាតិ។ សារណារបស់បេក្ខជនដែលជាប់ជាស្ថាពរហើយនោះ នឹងតម្កល់ទុកក្នុងបណ្ណាល័យនៅសាកលវិទ្យាល័យពាណិជ្ជសាស្ត្រអេស៊ីលីដាដើម្បីជាគំរូសិក្សារៀនសូត្របន្ត។

កម្មវិធីការពារសារណាបញ្ចប់ការសិក្សាលើកទី៥នេះ បញ្ជាក់ឱ្យឃើញថា សាកលវិទ្យាល័យពាណិជ្ជសាស្ត្រ អេស៊ីលីដា កំពុងតែយកចិត្តទុកដាក់លើកកម្ពស់គុណភាពអប់រំ និងពង្រឹងសមត្ថភាពធនធានមនុស្ស ដើម្បីគាំទ្រដល់ចក្ខុវិស័យ បេសកកម្មរបស់សាកលវិទ្យល័យ ក៏ដូចជារួមចំណែកគាំទ្រគោលនយោបាយលើកកម្ពស់ការស្រាវជ្រាវនៅតាមគ្រឹះស្ថានឧត្តមសិក្សារបស់ក្រសួងអប់រំយុវជន និងកីឡា ពិសេសដើម្បីចូលរួមចំណែកអនុវត្តយុទ្ធសាស្រ្តបញ្ចកោណដំណាក់កាលទីមួយ របស់រាជរដ្ឋាភិបាលនីតិកាលទី៧ នៃរដ្ឋសភា៕

ដោយ ៖ សុខា