ព័ត៌មានជាតិ

រដ្ឋបាលសង្កាត់វាលវង់ បន្តអនុវត្តគម្រោងមូលនិធិសង្កាត់ ដោយកាយដាក់លូរំដោះទឹក

បានផុស

១ year មុន

នៅ

ថ្ងៃពុធ ៨ មករា ២០២៥

ដោយ

ដោយមានការយកចិត្តទុកដាក់ពីរដ្ឋបាលរាជធានីភ្នំពេញ ក៏ដូចជារដ្ឋបាលខណ្ឌ ៧ មករា ដែលមានលោក ថេង សុថុល អភិបាលខណ្ឌ ៧ មករា ដូច្នេះ រដ្ឋបាលសង្កាត់វាលវង់ ជាសង្កាត់មួយក្នុងចំណោមសង្កាត់ទាំង ៨ រដ្ឋបាលខណ្ឌ បានបន្តអនុវត្តគម្រោងអភិវឌ្ឍន៍នៅក្នុងមូលដ្ឋាន ដោយកាយផ្លូវដាក់លូ ដើម្បីរំដោះទឹកនារដូវវស្សា ដើម្បីឲ្យប្រជាពលរដ្ឋរស់នៅស្របតាមផ្លូវបេតុងងាយស្រួលជាងមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា ផ្លូវទីតាំងការដ្ឋានកាយផ្លូវ ដើម្បីដាក់លូរំដោះទឹក និងចាក់បេតុងនេះ ស្ថិតនៅក្បែរតំបន់បុរីកីឡា ភូមិ ១២ សង្កាត់វាលវង់ ខណ្ឌ ៧ មករា រាជធានីភ្នំពេញ។

លោក ប៉ែន ធឿន ប្រធានការិយាល័យសាធារណការខណ្ឌ ៧ មករា បានឲ្យ កម្ពុជាថ្មី ដឹងថា គម្រោងនេះ ជាគម្រោងមូលនិធិអភិវឌ្ឍន៍របស់សង្កាត់ ហើយសង្កាត់បានបន្តអភិវឌ្ឍន៍នៅក្នុងមូលដ្ឋានជាបន្តបន្ទាប់។ ទីតាំងការដ្ឋាននេះ គឺកន្លងមកមានលូរំដោះទឹក ប៉ុន្តែទំហំមានសភាពចាស់ទ្រុឌទ្រោម បាក់ខូច ស្ទះផ្លូវទឹក ដូច្នេះសង្កាត់បានបើកការដ្ឋានដាក់លូទំហំមុខកាត់ ៨ តឹក រួចនឹងចាក់បេតុងថ្មីនៅកំណាត់ផ្លូវនេះផងដែរ ដើម្បីបម្រើផលប្រយោជន៍ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរផ្សេងៗ ទៀតផងដែរ។

លោក ប៉ែន ធឿន បន្តថា ការដ្ឋាននេះមិនមែនជាការដ្ឋានទី ១ ទេ កន្លងទៅរដ្ឋបាលសង្កាត់បានធ្វើគម្រោងផ្សេងៗ ជាច្រើន នៅក្នុងមូលដ្ឋាន រួមមានការអុតកៅស៊ូ ផ្លូវខូចជង្ហុកមាន់ ផ្លាស់ប្ដូរការ៉ូឡា ចាស់ចេញដាក់ថ្មី តាមបណ្ដោយផ្លូវមួយចំនួនក្នុងមូលដ្ឋាន ដើម្បីឲ្យតាមមុខផ្ទះប្រជាពលរដ្ឋមានភាពល្អប្រសើរ និងសោភ័ណភាពទីក្រុងស្អាត។

ប្រជាពលរដ្ឋមានលំនៅឋានស្របតាមផ្លូវបើកការដ្ឋានដាក់លូ និងត្រៀមចាក់បេតុងនេះ បានសម្តែងក្ដីរីករាយ និងសប្បាយចិត្ត សាទរដល់អាជ្ញាធរមូលដ្ឋានដែលតែងតែយកចិត្តទុកដាក់ពីផលលំបាករបស់ប្រជាពលរដ្ឋ។

ប្រជាពលរដ្ឋបានបន្តទៀតថា ទោះបីការដ្ឋានកំពុងតែដំណើរការមានផលលំបាកចូលទៅផ្ទះបន្តិចមែន ប៉ុន្តែយ៉ាងណាពេលការដ្ឋានរួចរាល់នោះ ប្រជាពលរដ្ឋ នឹងងាយស្រួលក្នុងការធ្វើដំណើរ។

ចុងក្រោយអាជ្ញាធរបានសំណូមពរដល់ប្រជាពលរដ្ឋដែលមានលំនៅឋានជាប់នៅនឹងការដ្ឋានកំពុងសាងសង់ សូមមេត្តាជួយទុកដាក់សំរាមឲ្យបានត្រឹមត្រូវ ជៀសវាងមានភ្លៀង ឬក៏ខ្យល់បក់ផាត់ ហើយសំរាមធ្លាក់ចូលទៅក្នុងការដ្ឋានកំពុងសាងសង់ដាក់លូនេះផងដែរ។ ជាពិសេសនោះ អាជ្ញាធរសំណូមពរឲ្យមានការយោគយល់ដែលមានផលប៉ះពាល់ក្នុងដំណាក់កាលការដ្ឋានកំពុងសាងសង់៕

អត្ថបទ ៖ សុភា