ក្រសួងអប់រំ នឹងបន្តយកចិត្តទុកដាក់លើកកម្ពស់ការអប់រំភាសាបារាំងនៅកម្ពុជា

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ក្រសួងនឹងបន្តលើកកម្ពស់ការអប់រំភាសាបារាំងនៅកម្ពុជាបន្ថែមទៀត។ នេះបើតាមការផុសលើទំព័រហ្វេសប៊ុករបស់លោកបណ្ឌិត នៅថ្ងៃទី២០ ខែមករា ឆ្នាំ២០២៥។

លោកលើកឡើងបែបនេះ ក្នុងជំនួបជាមួយលោក Ludovic TORO អភិបាលក្រុង Coubron នៃសាធារណរដ្ឋបារាំង ស្តីពី “ការលើកកម្ពស់កិច្ចការហ្វ្រង់កូហ្វូនី និងជំនួយឧបត្ថម្ភនៅវិទ្យាល័យ ហេង សំរិន ព្រៃល្វា” នៅថ្ងៃទី២០ ខែមករា។ បណ្ឌិតសភាចារ្យ ហង់ជួន ណារ៉ុន បានសង្កត់ធ្ងន់ថា៖ “ក្រសួងអប់រំ យុវជន និងកីឡា បាននិងកំពុងបន្តយកចិត្តទុកដាក់ខ្ពស់ក្នុងការលើកកម្ពស់ការអប់រំភាសាបារាំងនៅកម្ពុជា ឆ្លើយតបនឹងចក្ខុវិស័យអភិវឌ្ឍកិច្ចការហ្វ្រង់កូហ្វូនីនៅកម្រិតតំបន់ និងពិភពលោក”។

ក្នុងជំនួបនេះ លោក Ludovic TORO អភិបាលក្រុង បានលើកឡើងពីវឌ្ឍនភាពនៃកិច្ចសហប្រតិបត្តិការភាសាបារាំង ការលើកកម្ពស់ការរៀន និងបង្រៀនភាសាបារាំង និងការផ្តល់ជំនួយផ្សេងៗដល់សិស្សានុសិស្ស និងគ្រូបង្រៀនភាសាបារាំងនៅវិទ្យាល័យ ហេង សំរិន ព្រៃល្វា ខេត្តតាកែវនាពេលកន្លងមក។ ដោយលោកបន្តថា ៖ “តាមរយៈកិច្ចសហប្រតិបត្តិការនេះ សិស្សានុសិស្សនៃវិទ្យាល័យ ហេង សំរិន ព្រៃល្វា ត្រូវបានជំរុញលើកទឹកចិត្តឱ្យធ្វើការទំនាក់ទំនងផ្ទាល់ជាភាសាបារាំងជាប្រចាំជាមួយសិស្សជនជាតិបារាំង ដើម្បីឱ្យពួកគេបានអនុវត្ត និងបន្តអភិវឌ្ឍចំណេះដឹងភាសាបារាំងឱ្យកាន់តែប្រសើរឡើងថែមទៀត”។

ជាមួយគ្នានេះ រដ្ឋមន្ត្រីក្រសួងអប់រំ ក៏បានថ្លែងអំណរគុណ លោកអភិបាលក្រុង ដែលបានគាំទ្រលើវិស័យអប់រំនៅវិទ្យាល័យ ហេង សំរិន ព្រៃល្វា និងផ្តល់ជំនួយចាំបាច់នានាដល់វិទ្យាល័យ ដើម្បីបន្តកែលម្អការរៀននិងបង្រៀនភាសាបារាំងដល់សិស្សានុសិស្ស ដែលជាធនធានដ៏សំខាន់ក្នុងការអភិវឌ្ឍភាសាបារាំងនៅកម្ពុជា ព្រមទាំងបានចែករំលែកពីទិដ្ឋភាពទូទៅនាពេលបច្ចុប្បន្ននៃកម្មវិធីអប់រំភាសាបារាំងនៅកម្ពុជា។

លោកបណ្ឌិត ហង់ជួន ណារ៉ុន ថា៖ “ខ្ញុំសូមវាយតម្លៃខ្ពស់ចំពោះកិច្ចសហប្រតិបត្តិលើកកម្ពស់ការអប់រំភាសាបារាំងដល់សិស្សានុសិស្សនៅតំបន់ជនបទ និងសូមគាំទ្រលើកទឹកចិត្តដល់លោក Ludovic TORO អភិបាលក្រុង Coubron នៃសាធារណរដ្ឋបារាំង ចំពោះរាល់គំនិតផ្តួចផ្តើមពង្រឹង និងពង្រឹងកិច្ចសហប្រតិបត្តិការបន្ថែមទៀត សំដៅចូលរួមជំរុញការអភិវឌ្ឍ និងការបណ្តុះបណ្តាលធនធានមនុស្សនៅកម្ពុជាឱ្យកាន់តែរីកចម្រើន” ៕