ត្រឹម​ឆ្នាំ២០២៤ រាជធានីភ្នំពេញមាន​សំណង់បណ្តុំ​ផ្ទះលែ្វង ៤៥៣ កន្លែង ខណៈ​អគារខ្ពស់ៗមាន​ ១ ៨៧៧ អគារ

នៅឆ្នាំ២០២៤ នៅរាជធានីភ្នំពេញមាន​សំណង់បណ្តុំផ្ទះលែ្វងចំនួន ៤៥៣ កន្លែង ជាមួយ​អគារខ្ពស់ៗចាប់ពី ៥ ជាន់​ឡើង​ទៅ​មាន​ចំនួន ១ ៨៧៧ អគារ។ ជាមួយ​គ្នានេះ នៅឆ្នាំ២០២៤ រាជធានីភ្នំពេញមានរោង​ចក្រចំនួន ៨១១ រោងចក្រ បើប្រៀបធៀប​រយៈពេលដូចគ្នា​ឆ្នាំ ២០២៣ កើនឡើង ១៨ រោងចក្រ។

នេះបើតាម​លោក ឃួង ស្រេង អភិបាលរាជធានីភ្នំពេញ បញ្ជាក់នៅ​ក្នុងពីធីបើកសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ នៅសណ្ឋាគាររ៉េស៊ីដង់សុខាភ្នំពេញនាព្រឹកថ្ងៃទី២១ ខែមករា ឆ្នាំ២០២៥នេះ។

បន្ថែមពីនេះ​ នៅក្នុង​សន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ លោក ឃួង ស្រេង បាន​លើកឡើង​ថា ឆ្នាំ២០២៤ រដ្ឋបាលរាជធានី​បានផ្តល់សេវាសាធារណៈគ្រប់ប្រភេទ​ជូនប្រជាពលរដ្ឋ តាមរយៈអង្គភាពច្រកចេញចូលតែមួយរបស់រដ្ឋបាលរាជធានីភ្នំពេញបានចំនួន ១០១.៧០០ សេវា ដែលក្នុងមួយថ្ងៃទទួលបាន ២៧៣ សេវា ទទួលបានចំណូលសរុប ៤៨.៣៩៤.៧៣១.៣៥០ រៀល។

ជាមួយ​គ្នានេះ ក៏​ទទួលបណ្ដឹង សំណូមពរ និងធ្វើការសម្របសម្រួលដល់ប្រជាពលរដ្ឋ និងសាធារណជនទូទៅ ដែលមកស្នើសុំប្រើប្រាស់សេវាបានចំនួន ២៧០ នាក់។ ចំនួនភ្ញៀវជាតិ អន្តរជាតិមកចូលទស្សនាតាមរមណីយដ្ឋាននានានៅក្នុងរាជធានីមានចំនួនជាង ១១ លាននាក់ ដែលមានកំណើតកើនឡើងជាង ៦៣ ភាគរយ បើប្រាប់ធៀបឆ្នាំ២០២៣។

លោក ឃួង ស្រេង បានបន្តទៀតថា ដើម្បីបានជាធាតុចូលសំខាន់ៗ ក្នុងអង្គសន្តិបាតនេះ ក្រុមប្រឹក្សានិងរដ្ឋបាលរាជធានីភ្នំពេញ បានលើកយកប្រធានបទចំនួន៦ មកពិភាក្សា ក្នុងនោះរួមមាន៖

១-ពិភាក្សាលើ ចំណុចខ្លាំង និងចំណុចខ្សោយ នៃការផ្ទេរមុខងារវិស័យអប់រំ ៣កម្រិត (ថ្នាក់មត្តេយ្យ ថ្នាក់បឋម និងអប់រំក្រៅប្រព័ន្ធ)។
២-ការពង្រឹងនិយ័តកម្មសេវាសុខាភិបាលឯកជន និងអ្នកប្រកបវិជ្ជាជីវៈសុខាភិបាល នៅតាមមូលដ្ឋានសេវាសុខាភិបាលឯកជន និងលុបបំបាត់សេវាសុខាភិបាលឯកជន ខុសច្បាប់នៅរាជធានីភ្នំពេញ។
៣-ការគ្រប់គ្រងសណ្តាប់ធ្នាប់ការលក់ដូរតាមចិញ្ចើមផ្លូវសាធារណៈ។
៤-ការគ្រប់គ្រងប្រព័ន្ធសុវត្ថិភាពសំណង់អគារខ្ពស់ៗ សំណង់ដែលផ្អាកការ សាងសង់និងសំណង់ទ្រុឌទ្រោមហួសការកំណត់ស្នាក់នៅ ដើម្បីលើកជាសំណើរទៅក្រសួង ដោយសារតែភ្នំពេញយើងជាទីក្រុងដែលមានវ័យចំណាស់។
៥-ការគ្រប់គ្រងសំណល់ប្លាស្ទិចតាមប្រព័ន្ធលូ-ប្រឡាយ និងស្ថានីយបូមទឹក ឈានទៅដល់ការផាកពិន័យចំពោះអ្នកចោលសំណល់ប្លាស្ទិចតាមប្រព័ន្ធលូ-ប្រឡាយ និងស្ថានីយបូមទឹកទាំងនេះ។
៦-ការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ដោយផ្តោតលើ ការ បង្ការ បង្ក្រាប និងលុបបំបាត់ល្បែងស៊ីសងខុសច្បាប់ និងការគ្រប់គ្រងជនអន្តោប្រវេសន៍ សំដៅធ្វើយ៉ាងណាឱ្យប្រជាពលរដ្ឋមានភាពកក់ក្តៅ៕

អត្ថបទ៖ ស្រីរ័ត្ន