​គម្រោង​សាងសង់​រោងចក្រ​ទឹក​ស្អាត​បាក់ខែង ដំណាក់កាលទី៣ ​សម្រេចបានជាង ៧០% គ្រោង​បញ្ចប់​នៅ​ឆ្នាំ​ក្រោយ​

គម្រោង​សាងសង់​រោងចក្រ​ទឹក​ស្អាត​បាក់ខែង ​ដំណាក់កាលទី៣សម្រេចការសាងសង់បានប្រមាណ ៧២%​ និង​គ្រោងបញ្ចប់ការសាងសង់​នៅ​ត្រីមាសទី២​ ឆ្នាំ២០២៧ ដើម្បីពង្រឹង​ការផ្គត់ផ្គង់​ទឹកស្អាត​នៅ​រាជធានីភ្នំពេញ ​និងតំបន់ជុំវិញ​ ស្របតាមតម្រូវការ ការអភិវឌ្ឍសេដ្ឋកិច្ច និង​ការ​លើកកម្ពស់គុណភាពជីវិតរបស់ប្រជាពលរដ្ឋ។​

​លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅថ្ងៃទី ១៥ ​ឧសភា ២០២៦​ បានដឹកនាំគណៈប្រតិភូចុះពិនិត្យវឌ្ឍនភាពគម្រោង​សាងសង់រោងចក្រ​ទឹកស្អាត​បាក់ខែង ​ដំណាក់កាលទី៣​ ដែលជារោងចក្រប្រព្រឹត្តកម្មទឹកស្អាត​ធំជាងគេបំផុត​របស់កម្ពុជា។​

​លោក ហែម វណ្ណឌី បានប្រាប់ឱ្យដឹងថា ក្រោយបញ្ចប់ការសាងសង់ដំណាក់កាលទី៣ រោងចក្រទឹកស្អាតបាត់ខែង នឹងបង្កើន សមត្ថភាព​ផលិតទឹកស្អាតចំនួន ១៩៥.០០០ ម៉ែត្រគូបក្នុងមួយថ្ងៃបន្ថែមទៀត ដែលនឹងធ្វើឱ្យសមត្ថភាពផលិត​សរុប​របស់រោងចក្របាក់ខែងកើនដល់ ៥៨៥.០០០ ម៉ែត្រគូបក្នុងមួយថ្ងៃ និងបង្កើនសមត្ថភាព​ផលិត​សរុបរបស់រដ្ឋាករទឹកស្វយ័តក្រុងភ្នំពេញដល់ ១,២ លានម៉ែត្រគូប ​ក្នុងមួយថ្ងៃ៕