រយៈពេល ៥ ថ្ងៃ សមាគមសុខាភិបាលខ្មែរនៅអាមេរិក ចុះព្យាបាលជំងឺ និងផ្តលវែនតា ជូនពលរដ្ឋដោយឥតគិតថ្លៃ

ក្រុមគ្រូពេទ្យស្ម័គ្រចិត្តសមាគមសុខាភិបាលខ្មែរនៅអាមេរិក (CHPAA) សហការជាមួយក្រុមគ្រូពេទ្យនៃមន្ទីរសុខាភិបាល​​ខេត្តក្រចេះ ចុះពិនិត្យព្យាបាលជំងឺ ជូនពលរដ្ឋ ដោយឥតគិតថ្លៃ​នៅក្នុងមន្ទីរពេទ្យបង្អែកខេត្តក្រចេះ ។

ការចុះពិនិត្យ និងព្យាបាលជំងឺជូនពលរដ្ឋនេះធ្វើឡើងរយៈពេល ៥ ថ្ងៃ ចាប់ពីថ្ងៃទី ១០ ដល់ ថ្ងៃទី ១៥ ខែកុម្ភៈ ឆ្នាំ ២០២៥ ដោយពិនិត្យទៅលើ-ជំងឺទូទៅ -វះកាត់រោគស្ត្រី -វះកាត់ភ្នែក -ព្យាបាលមាត់ធ្មេញ -ចាក់ម្ជុលវិទ្យាសាស្ត្រ និងចែកវ៉ែនតាជូនចាស់ៗ រួមនិងវ៉ែនតាការពារកម្ដៅថ្ងៃ។ នេះ​បើ​តាមឲ្យដឹងពីលោកវេជ្ជបណ្ឌិត តាន់ សុង ប្រធានក្រុមការងារនៃសមាគម។

គោលបំណងដែល​ក្រុមគ្រូពេទ្យស្ម័គ្រចិត្តសមាគមសុខាភិបាលខ្មែរនៅអាមេរិក ចុះពិនិត្យនិងព្យាបាលជំងឺជូនពលរដ្ឋនៅខេត្តក្រចេះ គឺដោយសារ រូបលោកនឹករលឹក និងស្រឡាញ់ទឹកដីកំណើតដែលធ្លាប់រស់នៅ ទោះបីជាបច្ចុប្បន្នរូបលោករស់នៅលើទឹកដីសហរដ្ឋអាមេរិកក៏ដោយ។ ជាមួយ​គ្នានេះ ក៏​ចង់ជួយប្រជាពលរដ្ឋ ដែលជួបការលំបាកបញ្ហាសុខភាព ទើបលោកធ្វើការប្រកាសដល់សប្បុរសជន និងក្រុមគ្រូពេទ្យខ្មែរនៅអាមេរិកឲ្យជួយជាថវិកា ថ្នាំពេទ្យ វ៉ែនតា។

ក្នុងនាមអាជ្ញាធរខេត្តក្រចេះ លោក សួស សេរីសួរស្ដី អភិបាលរងខេត្តបាន​ឲ្យ​ដឹង​ថា ការ​ចុះមកពិនិត្យ និងព្យាបាលជំងឺជូនដល់ប្រជាពលរដ្ឋ​របស់​ក្រុមគ្រូពេទ្យស្ម័គ្រចិត្តសមាគមសុខាភិបាលខ្មែរនៅអាមេរិក នាពេលនេះបង្ហាញការរួមចំណែកកាត់បន្ថយលើការចំណាយរបស់ប្រជាពលរដ្ឋ សម្រាប់ការថែទាំសុខភាពប្រចាំថ្ងៃ។

ជាងនេះទៅទៀត ក៏​បានរួមចំណែកបន្ថែមក្នុងការបំប៉ន លើកកម្ពស់សុខុមាលភាព កាត់បន្ថយភាពក្រីក្រជូនប្រជាពលរដ្ឋ នៅតាមជនបទ ដោយមិនប្រកាន់និន្នាការនយោបាយ សាសនា ពណ៌សម្បុរ ក្នុងបំណងជួយជាមនុស្សធម៌សុខភាពសាធារណៈ និងសូមឲ្យសកម្មភាពនេះ នៅតែបន្តកើតមានសម្រាប់ប្រជាពលរដ្ឋគ្រប់រូបនៅក្នុងខេត្តក្រចេះ៕

អត្ថបទ៖ ប្រុញ វិធិន