រដ្ឋមន្ត្រីមហាផ្ទៃប្រាប់ក្រុមការងារចុះមូលដ្ឋានបញ្ឈប់កិច្ចអន្តរាគមន៍យកមន្ត្រីក្រៅមូលដ្ឋានមកកាន់តំណែង

នៅរសៀលថ្ងៃទី១៣ ខែកុម្ភៈ ឆ្នាំ២០២៥នេះ លោកឧបនាយករដ្ឋមន្ត្រី ស សុខា បានប្រាប់ទៅកាន់ក្រុមការងារចុះតាមមូលដ្ឋានឱ្យបញ្ឈប់ការអន្តរាគមន៍យកមន្ត្រីពីក្រៅមូលដ្ឋាន ដើម្បីឱ្យទៅកាន់តំណែងណាមួយក្នុងមូលដ្ឋានផ្សេងទៀត។

ការលើកឡើងរបស់លោក ស សុខា ធ្វើឡើងក្នុងឱកាសអញ្ជើញជាអធិបតីតំណាងសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២៤ និងលើកទិសដៅបន្ដរបស់ក្រសួងមហាផ្ទៃ និងបូកសរុបលទ្ធផលប្រឡងប្រណាំងចលនា «ភូមិ ឃុំសង្កាត់ មានសុវត្ថិភាព»។

ដើម្បីពង្រឹងលើកិច្ចការចាំបាច់មួយចំនួន លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងអំពីសារៈសំខាន់នៃការប្ដេជ្ញាចិត្តធ្វើឱ្យបានជោគជ័យក្នុងការជំរុញកំណែទម្រង់វិមជ្ឈការ និងវិសហមជ្ឈការ រួមទាំងការសម្របសម្រួលតាមយន្តការគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ គ.ជ.អ.ប ដើម្បីផ្ទេរមុខងារមួយចំនួនទៅឱ្យរដ្ឋបាលថ្នាក់ក្រោមជាតិឱ្យមានភាពជាម្ចាស់។

ក្នុងន័យនេះ ដើម្បីជំរុញឱ្យគ្រប់អង្គភាពពង្រឹងការបណ្តុះបណ្តាលផ្ទៃក្នុង ប្រមុខក្រសួងមហាផ្ទៃ បានស្នើឱ្យក្រុមការងាររាជរដ្ឋាភិបាល ឬក្រុមការងារពាក់ព័ន្ធចុះមូលដ្ឋាន ដកខ្លួនពីកិច្ចអន្តរាគមន៍យកមន្រ្តីពីកន្លែងផ្សេង ឬមូលដ្ឋានផ្សេងឱ្យទៅកាន់មុខតំណែងណាមួយក្នុងមូលដ្ឋាន។ លោកឧបនាយករដ្ឋមន្ត្រី បានសង្កត់ធ្ងន់ពីភាពចាំបាច់នៃការអនុវត្តតាមយន្តការដែលមានស្រាប់ គឺទុកលទ្ធភាពឱ្យថ្នាក់ដឹកនាំមូលដ្ឋាននោះ ជាអ្នកសម្រេចតាមនីតិវិធី ក្នុងការស្នើផ្ដល់មុខតំណែងណាមួយឱ្យមន្រ្តីដែលមានក្នុងមូលដ្ឋាននោះស្រាប់។

ជាការរម្លឹក ថ្លែងក្នុងពិធីបើកសន្និបាត កាលពីថ្ងៃទី១២ ខែកម្ភៈ ឧបនាយករដ្ឋមន្ត្រី ស សុខា បានគូសរំលេចលើកិច្ចការអាទិភាពចំនួន៣ ដើម្បីឱ្យអង្គសន្និបាតរកវិធីសាស្រ្តពង្រឹងគុណភាពបន្ថែមលើភារកិច្ចស្នូល។ នៅក្នុងចំណោមកិច្ចការអាទិភាពទាំង៣ ដែលប្រមុខក្រសួងមហាផ្ទៃ លើកឡើង ក៏បានផ្ដោតផងដែរទៅលើការអភិវឌ្ឍធនធានមនុស្ស។

ការអភិវឌ្ឍធនធានមនុស្ស លោកឧបនាយករដ្ឋមន្ត្រី បានសង្កត់ធ្ងន់អំពីគោលដៅនៃយុទ្ធសាស្រ្តបញ្ចកោណរបស់រាជរដ្ឋាភិបាល ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដែលបាននិងកំពុងយកចិត្តទុកដាក់ធ្វើកំណែទម្រង់ធនធានមនុស្សក្នុងចំណោមមន្រ្តីរាជការស៊ីវិល កងកម្លាំង និងមន្រ្តីកិច្ចសន្យាជាដើម ដោយផ្ដោតលើការពង្រឹងសមត្ថភាពមន្រ្តីដែលមានស្រាប់។ លោក បានលើកឡើងអំពីភាពចាំបាច់នៃការពង្រឹងការបណ្តុះបណ្តាលកម្រិតផ្ទៃក្នុង និងការបណ្តុះបណ្តាលទូទៅ ដើម្បីធានាប្រសិទ្ធភាពនៃការបំពេញការងារបម្រើសេវាសាធារណៈ ទាំងថ្នាក់ជាតិ និងរដ្ឋបាលថ្នាក់ក្រោមជាតិ៕

ដោយ៖ ធឿន វ៉ាន់សុង