មន្ទីរកសិកម្មខេត្តស្ទឹងត្រែង រៀបចំដាក់បញ្ចូលផ្លែម៉ាក់ប្រាង ជាភូមិមួយផលិតផលមួយ

ប្រធានមន្ទីរកសិកម្មខេត្តស្ទឹងត្រែង បានជំរុញកសិករឱ្យបង្កើនការដាំដំណាំឈើហូបផ្លែ ម៉ាក់ប្រាងឱ្យបានច្រើនដើម្បីផ្ដល់លទ្ធភាពឱ្យគណៈកម្មាធិការតម្រង់ទិស នៃគម្រោងបន្លែផ្លែឈើកម្ពុជា វាយតម្លៃដាក់បញ្ចូលជាភូមិមួយមានផលិតផលមួយ ប្រចាំរដូវកាលនៅក្នុងខេត្ត។

ក្នុងឱកាសពិនិត្យវាយតម្លៃគុណភាពផ្លែម៉ាក់ប្រាង របស់មន្ទីរកសិករនៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង កាលពីថ្ងៃទី៩ ខែមីនា ឆ្នាំ២០២៥ លោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានបញ្ជាក់ថា នេះជាដំណាំឈើហូបផ្លែមួយប្រភេទដែលមានឈ្មោះបោះសំឡេងតាំងពីបុរាណកាលមក ហើយនៅពេលយើងដាំដុះបាន វាផ្លែទៅតាមរដូវកាលក្នុងមួយឆ្នាំម្តងតែប៉ុណ្នោះ។

លោកបន្តថា នៅដំណាក់កាលនេះទាមទារឱ្យកសិករសហការជាមួយមន្ត្រីជំនាញកសិកម្ម ខិតខំរិះរកបទពិសោធន៍ថែទាំ ឱ្យផ្លែបណ្តាក់គ្នាបានផលច្រើន និងមានជាប្រចាំ ហើយមានរស់ជាតិឆ្ងាញ់ ដើម្បីលើកកម្ពស់កេរ្តិ៍ឈ្មោះ និងឈានទៅដាក់បញ្ចូលជាភូមិមួយផលិតផលមួយ ហើយមន្ទីរកសិកម្មរុក្ខាប្រមាញ់ និងនេសាទខេត្ត បានពិចារណា និងមានមហិច្ឆតាមួយជំរុញឱ្យប្រជាពលរដ្ឋពង្រីកដំណាំម៉ាកប្រាងនេះឱ្យបានច្រើននៅក្នុងខេត្តស្ទឹងត្រែង ដើម្បីសេដ្ឋកិច្ចក្នុងគ្រួសាររបស់ពួកគាត់ផង ក៏ដូចជាឈានឆ្ពោះទៅកំណត់ភូមិមួយផលិតផលមួយនៅពេលខាងមុខ។

លោក ថៃ ប៉ាក់លិ កសិករដាំដំណាំម៉ាក់ប្រាងនៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង បានគាំទ្រគោលបំណងនេះ ព្រោះពេលដំណាំបានផលល្អ ជាចំណែកមួយបានជួយផ្នែកជីវភាពរស់នៅ និងបានជំរុញលើកកម្ពស់ដំណាំឈើហូបផ្លែឱ្យមានជាប្រចាំនៅក្នុងខេត្ត។

លោកស្រីបន្តថា ឈើហូបផ្លែម៉ាក់ប្រាងនេះដើមធំ ផ្តល់ផលចាប់ពី៥០០ទៅ៦០០គីឡូក្រាម ចំពោះដើមតូចបានផលប្រមាណ៣០០គីឡូក្រាមក្នុងមួយដើម ហើយផ្លែវាអតិថិជននិយមទិញទៅបរិភោគ ព្រោះជាផ្លែឈើធម្មជាតិ ក្នុងមួយឆ្នាំមានម្តង។

សូមបញ្ជាក់ថា ម៉ាក់ប្រាងម៉ាក់ព្រេង ជាឈើហូបផ្លែមួយមុខ មានឈ្មោះនៅក្នុងបញ្ជីកសិកម្មតាំងពីដើមតរៀងមកហើយ​កាលពីសម័យដើមច្រើនព្រះសង្ឃដាំនៅក្នុងទីអារាម។ បច្ចុប្បន្នកសិករដាំដុះតាមចំការជាលក្ខណៈគ្រួសារចាប់ពី​១០០​ទៅ៣០០ដើម នឹងបានផលនាំចេញទៅលក់នៅទីផ្សារ ក្នុងតម្លៃ៨.០០០ទៅ១៥.០០០រៀលក្នុងមួយគីឡូក្រាម ហើយនៅឆ្នាំ២០២៥នេះ មានបរិមាណច្រើនជាងរាល់ឆ្នាំ៕

អត្ថបទ៖ ហុង វិនជូ