នៅ​ភ្នំពេញ​ចុះបញ្ជី​ដីធ្លី​ជា​ប្រព័ន្ធ​ សម្រេច​​បាន​ជាង ៤៥ ម៉ឺនក្បាល​ដី ក្នុងចំណោម ៥០ ម៉ឺន ក្បាលដី ផែនការ​បញ្ចប់​ត្រឹមឆ្នាំ ២០២៥

ដំណើរការនៃការចុះបញ្ជីដីធ្លីជាលក្ខណៈប្រព័ន្ធនៅក្នុងទូទាំងរាជធានី​ភ្នំពេញ​សម្រេច​បានប្រមាណ​ ៤៥ ម៉ឺន​ក្បាលដី ក្នុងចំណោមក្បាលដីសរុប ៥០ ម៉ឺនក្បាលដី។

លោក ប៊ិន សូឈី អនុប្រធានមន្ទីររៀបចំដែនដី រាជធានីភ្នំពេញបានបញ្ជាក់ថា រហូតមកដល់ពេលនេះ ដំណើរការនៃការចុះបញ្ជីដីធ្លីជាលក្ខណៈប្រព័ន្ធទូទាំងរាជធានី​ភ្នំពេញ បានចំនួនជាង ៤៥ ម៉ឺនក្បាលដី ក្នុងចំណោមក្បាលដីសរុបប្រមាណ ៥០ ម៉ឺនក្បាលដី។ ក្នុងនោះបានបិទផ្សាយសាធារណៈបាន​ជាង ៤៣ ម៉ឺន ក្បាលដី និងចែកបណ្ណបានជាង ២៩ ម៉ឺនក្បាល​ដី លើសង្កាត់​ចំនួន ៩៧ ក្នុងចំណោមសង្កាត់សរុប ១០៥ នៅ​រាជធានីភ្នំពេញ។

លោក ប៊ិន សូឈី បាន​បញ្ជាក់ថា នៅ​រាជធានីភ្នំពេញ​ដែល​មាន ១៤ ខណ្ឌ បានចុះបញ្ជីនិងចែកប័ណ្ណបញ្ចប់បានចំនួន ៧ ខណ្ឌ និងគ្រោងបញ្ចប់បន្តបន្ទាប់ ខណៈផែនការត្រូវបញ្ចប់ទាំងស្រុងត្រឹមដំណាច់ឆ្នាំ ២០២៥។

សម្រាប់ខណ្ឌ ៧ មករា បើតាម​លោក ប៊ិន សូឈី មិនទាន់អាចបញ្ចប់បានទេ ដោយសារត្រូវរកនីតិវិធីបន្ថែម ខណៈខណ្ឌ​នេះមានអគារ និងលំនៅឋានជាច្រើន​ជាប់សហកម្មសិទ្ធិច្រើននាក់។ ក្រៅពីនេះ ក៏នៅមានក្បាលដីប្រមាណ​ ១០% ទៀតដែល​ត្រូវចុះបញ្ជីបន្ត ដោយសារកន្លងមកម្ចាស់ដីមិនបានចូលរួមសហការ​ជាមួយមន្ត្រីជំនាញ៕