យុទ្ធនាការចុះបញ្ជីដីធ្លីបង្ហើយ​សម្រេច​ជិត​​ ៩ លានក្បាល​​ដី សល់​ ១១ ម៉ឺនក្បាលដី​​​នឹង​បញ្ចប់​ឆាប់ៗ

ក្នុងកិច្ចប្រជុំការងាររបស់គណៈកម្មការសុរិយោដីថ្នាក់ជាតិនៅទីស្តីការក្រសួងរៀបចំដែនដី នគរូបនីយកម្ម​ និង​សំណង់​កាល​ពី​រសៀលថ្ងៃទី១៤ ខែសីហា ឆ្នាំ២០២៥ បាន​បង្ហាញពី​លទ្ធផលនៃ​ដំណើរការ​ចុះបញ្ជីដីធ្លីបង្ហើយ​ទូទាំង​ប្រទេស ខណៈដែល​​​ក្រសួង​បានដាក់ផែនការ​​ជំរុញ​ការងារ​​វាស់វែងដីធ្លី​​ឲ្យ​បញ្ចប់នៅ​ត្រឹម​ឆ្នាំ ២០២៥។

នៅក្នុងកិច្ចប្រជុំរបស់គណៈកម្មការសុរិយោដីថ្នាក់ជាតិនៅទីស្តីការក្រសួងរៀបចំដែនដី នគរូបនីយកម្ម​ និង​សំណង់ ដែលមានការ​ចូលរួមពី​​ថ្នាក់ដឹកនាំក្រសួងពាក់ព័ន្ធ អភិបាលនៃគណៈអភិបាលខេត្ត ប្រធានមន្ទីររៀបចំដែនដីនគរូបនីយកម្ម សំណង់និងសុរិយោដីរាជធានី-ខេត្ត លោក សាយ សំអាល់ ឧបនាយករដ្ឋមន្ត្រី និង​រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ និងជាប្រធានគណៈកម្មការ សុរិយោដីថ្នាក់ជាតិ បាន​បង្ហាញ​ពីលទ្ធផលនៃយុទ្ធនាការចុះបញ្ជីដីធ្លីបង្ហើយគិត​មកដល់ពេលនេះ​ឈានដល់ការបញ្ចប់ការ​វាស់វែង​ក្បាលដីសរុបចំនួនជិត ៩ លានក្បាល និង ក្បាលដីមិនទាន់វាស់វែងសរុបចំនួន ១១ ម៉ឺនក្បាលដី ដែល​កំពុង​បន្ត​នីតិវិធីឈាន​ទៅ​បញ្ចប់​នៅ​ពេល​ខាងមុខ។

លោក​ឧបនាយករដ្ឋមន្រ្តី​បាន​ថ្លែង​ថា ​មកដល់ចំណុចនេះ​ ត្រូវចែកបណ្ណកម្មសិទ្ធិដីធ្លីបង្ហើយនិង​ឈានទៅរៀបចំប្លង់គោល​ប្រើប្រាស់ដីធ្លីបង្ហើយនៅក្នុងព្រះរាជាណាចក្រកម្ពុជា។

«នេះគឺជារបត់មួយក្រោយរយៈពេល ៤០ ឆ្នាំ ដែលយើង​បានចាប់ផ្ដើមចេញបណ្ណសម្គាល់ម្ចាស់ អចលនវត្ថុលើកទីមួយនាឆ្នាំ ១៩៨៩ រហូតដល់ឆ្នាំ ២០២៩ ដែល​យើង​នឹងប្រារព្ធខួបលើកទី ៤០ ជាប្រវត្តិសាស្ត្រនៃការចុះបញ្ជី ដីធ្លីជូនប្រជាពលរដ្ឋ​»។ លោក​រដ្ឋមន្រ្តីបានគូស​បញ្ជាក់។

តាមរយៈយន្តការដោះស្រាយបញ្ចប់វិវាទដីធ្លី ករណីបណ្តឹងវិវាទដីធ្លីដែលមានសរុបចំនួន ៣,៥៤៩ករណី ក្នុងឆ្នាំ ២០២៣ ត្រូវបានពិនិត្យ និងដោះស្រាយនៅសល់ត្រឹម ៣៨៥ ករណី ប៉ុណ្ណោះ និង​បន្តដោះស្រាយបើទោះជាមានការប្រឈមស្ថានភាព​នៃការឈ្លានពានពីកងទ័ពថៃមកលើកម្ពុជាតាមបណ្ដោយព្រំដែនយ៉ាងណាក្តី។

លោក សាយ សំអាល់ បាន​​បញ្ជាក់បន្ថែមថា «លទ្ធផលនៃការចុះបញ្ជីដីធ្លីបង្ហើយគឺជាមោទនភាពសម្រាប់យើងទាំងអស់គ្នា មិនមែនសម្រាប់តែក្រសួងរៀបចំដែនដីនគរូបនីយកម្ម និង សំណង់នោះឡើយ»។

បើតាមលោករដ្ឋមន្រ្តី ការដោះស្រាយបញ្ចប់វិវាទដីធ្លី និងការចុះបញ្ជីដីធ្លីបង្ហើយគឺជាវិធានមួយក្នុងការបង្កើតបរិយាកាសគ្មាន​វិវាទ ដោយប្រើយុទ្ធសាស្ត្រនៃការសំអាត កែតម្រូវនិងកែសម្រួល រួមយុទ្ធសាស្ត្រផ្សេងៗជាច្រើនទៀត។ ដោយឡែកចំពោះប្លង់គោលនៃការប្រើប្រាស់ដី នឹងត្រូវប្រគល់ជូនអាជ្ញាធរខេត្ត ប្រធានមន្ទីររៀបចំដែនដី នគរូបនីយកម្ម សំណង់និង សុរិយោដីរាជធានីខេត្តទាំងអស់ និងអាជ្ញាធរមូលដ្ឋានគ្រប់ឃុំ ដើម្បីពិនិត្យមើលលទ្ធភាពក្នុងការរៀបចំទីក្រុង ទីប្រជុំជន ឲ្យ​បានល្អ មានលំហសាធារណៈនិងមានសណ្តាប់ធ្នាប់ របៀបរៀបរយត្រឹមត្រូវ សំដៅបង្កើនគុណភាពជីវិតរស់នៅ របស់ប្រជាពលរដ្ឋ ដោយប្រែក្លាយទីក្រុងនិងទីប្រជុំជន នៅតាមបណ្ដាខេត្តនានាទូទាំងប្រទេសឲ្យទៅជាបុរីជនបទ និងជាភូមិឋានក្សេមក្សាន្ត ឆ្លើយតបទៅនឹងគោលបំណងរបស់ប្រមុខរាជរដ្ឋាភិបាល៕