ឃុំដារក្នុង​ស្រុក​ចិត្រ​បុរី បញ្ចប់ការវាស់វែង និងចែកប័ណ្ណជូនពលរដ្ឋមុនគេនៅស្រុកចិត្របុរី

ឃុំដារ គឺជាឃុំមួយក្នុងចំណោមឃុំទាំង ១០ នៅក្នុងស្រុកចិត្របុរី ខេត្តក្រចេះ ដែលបានបញ្ចប់ការវាស់វែងនិងចែកប័ណ្ណកម្មសិទ្ធិកាន់កាប់ដីធ្លីជូនពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈាង វត មេឃុំដារ បានឲ្យដឹងថា បើគិតចាប់តាំងពីចុះអនុវត្តការវាស់វែងដីធ្លីចុះបញ្ជីជាប្រពន្ធ័រហូតមកដល់ពេលនេះ គឺសម្រេចបាន១០០ភាគរយ។ ជាក់ស្ដែងពេលនេះ គឺកំពុងចែកប័ណ្ណកម្មសិទ្ធកាន់កាប់ដីធ្លីជូនប្រជាពលរដ្ឋ ចំនួន ៤​ភូមិ រួមមាន៖ ភូមិសេរីភាព ខ្នងពស់ ជួរជ្រៃ និងភូមិតាងួន។

លោកឱ្យដឹងបន្តថា ការផ្ដល់ប័ណ្ណកម្មសិទ្ធិដីធ្លីនេះ បានធ្វើឱ្យប្រជាពលរដ្ឋក្នុងឃុំទាំងមូលមានភាពជាម្ចាស់ការ មានទំនុកចិត្តលើខ្លួនឯង ពេលទទួលបានប័ណ្ណកម្មសិទ្ធិកាន់កាប់ដីធ្លីស្របច្បាប់ ឬហៅថា ប្លង់រឹងនេះ ដែលទទួលស្គាល់និងផ្ដល់ជូនដោយរាជរដ្ឋាភិបាល។

លោក អ៊ូ សុបុណ្ណការ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ បានឲ្យដឹងផងដែរថា រហូតមកដល់ពេលនេះ សម្រាប់ស្រុកចិត្របុរី មានឃុំ ចំនួន១០ ក្នុងនោះ ឃុំដារ ក្រុមការងារបានបញ្ចប់ការវាស់វែងរួចរាល់ជាស្ថាពរ និងកំពុងចែកជូនប័ណ្ណកម្មសិទ្ធិជូនប្រជាពលរដ្ឋ រីឯឃុំថ្មគ្រែ មន្ទីរក៏កំពុងតែកំណត់ថ្ងៃចុះចែកប័ណ្ណដូចគ្នា ដោយឡែកឃុំ ចំនួន ៦ ផ្សេងទៀត កំពុងធ្វើការបិទប្រកាសផ្សាយតំបន់វិនិច្ឆ័យក្បាលដីជាបន្តបន្ទាប់។

លោក បានបញ្ជាក់ថា ចំពោះ ឃុំថ្មី នៅស្រុកចិត្របុរី ដែលជាឃុំចុងក្រោយ ក្រុមការងារកំពុងតែបន្តការងារវាស់វែងដីធ្លី ហើយនឹងអាចចំណាយពេលយ៉ាងយូរក្នុងរយៈពេល ២សប្តាហ៍ទៀតនឹងបញ្ចប់ការវាស់វែង និងធ្វើការបិទផ្សាយតំបន់វិនិច្ឆ័យក្បាលដីផងដែរ៕

អត្ថបទ៖ ប្រុញ វិធិន