ខេត្តបន្ទាយមានជ័យជាខេត្តទី ៨ ប្រកាស​បិទបញ្ចប់​ការវាស់វែងក្បាលដី ចុះបញ្ជីដីធ្លីមានលក្ខណៈជាប្រព័ន្ធ

ក្រសួង​រៀបចំដែនដី នគរូបនីយកម្ម និង​សំណង់​បានប្រកាស​ ខេត្តបន្ទាយមានជ័យជាខេត្តទី ៨ ដែលបានបិទបញ្ចប់ការវាស់វែងក្បាលដី ចុះបញ្ជីដីធ្លីមានលក្ខណៈជាប្រព័ន្ធ។

នៅកម្មវិធី​ព្រឹកមិញនេះ ក្រៅពី​​ប្រកាស​ខេត្តបន្ទាយមានជ័យបញ្ចប់ការវាស់វែងដីមានលក្ខណៈជាប្រព័ន្ធ ក៏​មានការ​រៀបចំ​​ពិធី​ចែកវិញ្ញាបនបត្រសម្គាល់ម្ចាស់អចលនវត្ថុចំនួន ៦ ៣៥៥ បណ្ណ ជូនប្រជាពលរដ្ឋស្ថិតនៅភូមិសាស្រ្តខេត្តបន្ទាយមានជ័យ ដោយមានការចូលរួមពី​លោក សាយ សំអាល់ ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ និងជាប្រធានក្រុមការងាររាជរដ្ឋាភិបាល​ចុះមូលដ្ឋានខេត្តបន្ទាយមានជ័យ។

មន្រ្តី​ក្រសួង​រៀបចំដែនដី នគរូបនីយកម្ម និង​សំណង់បានបញ្ជាក់​ថា ការប្រកាសបញ្ចប់ការវាស់វែងនេះ មិនមែន​មាន​ន័យថា ក្រសួងបញ្ឈប់ការវាស់វែងចំពោះក្បាលដីដែលបានរំលងឬដែលមិនទាន់បានសុំចុះបញ្ជីនោះទេ។ ការ​ប្រកាស​នេះគ្រាន់តែជាការបិទបញ្ចប់យុទ្ធនាការវាស់វែងប៉ុណ្ណោះ ប៉ុន្តែការងារប្រចាំថ្ងៃរបស់មន្ទីររៀបចំដែនដី នគរូបនីយកម្ម សំណង់ និងសុរិយោដី នៅតែបន្ត​ធ្វើការជូនពលរដ្ឋ​ជាធម្មតា៕