ខេត្តមណ្ឌលគិរី ប្រកាសតំបន់វិនិច្ឆ័យសម្រេច​បាន​លើភូមិទាំង ៩២ ភូមិ ទូទាំងខេត្ត

មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី រៀបចំសន្និបាតបូកសរុបលទ្ធផលការងារឆ្នាំ​២០២៥ និងលើកទិសដៅការងារឆ្នាំ២០២៦ ក្រោមវត្តមាន លោក សុ ខនឬទ្ធីគុណ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក​ស៊ន សារុន សមាជិកក្រុមប្រឹក្សាខេត្តមណ្ឌលគិរី ដែល​ពិធីនេះធ្វើឡើងនៅថ្ងៃទី២៤ ខែតុលា ឆ្នាំ២០២៥ ស្ថិតនៅសាលាខេត្តមណ្ឌលគិរី។

លោក សុ ខនឬទ្ធីគុណ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែងថា នៅក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល មានការងារអាទិភាពមួយក្នុងចំណោម ការងារអាទិភាពដទៃទៀត នៅក្នុងមុំទី៤ នៃបញ្ចកោណទី៤ គឺការបន្តដំណើរការ កែទម្រង់ដីធ្លី ដោយជម្រុញការចុះបញ្ជីដី, ការដោះស្រាយវិវាទដីធ្លីក្រៅប្រព័ន្ធ​តុលាការ, និងការកសាងផែនការរៀបចំដែនដី និងនគរូបនីយកម្ម ទាំងថ្នាក់ជាតិ និងថ្នាក់ក្រោមជាតិក្នុងគោលដៅ គ្រប់គ្រង និងអភិវឌ្ឍន៍វិស័យដីធ្លីអោយបានត្រឹមត្រូវចំទិសដៅ និងមានប្រសិទ្ធិភាព។

បន្ថែមពីនេះលោកក៏បានក្រើនរំលឹកជម្រុញដល់មន្រ្តីជំនាញ ត្រូវពង្រឹងគុណភាពនៃការចុះបញ្ជីដីរដ្ឋ និងដីសមូហភាពរបស់សហគមន៍ជនជាតិដើមភាគតិច ការចុះបញ្ជីដីមានលក្ខណៈដាច់ដោយដុំ និងការចុះបញ្ជីបន្តដើម្បីធានាដល់ចរន្ត ការឯកសារគ្រប់គ្រងបច្ចុប្បន្នភាពព័ត៌មានដី និងចូលរួមចំណែកប្រមូលសេវាសុរិយោដី និងពន្ធប្រថាប់ត្រាជូនរដ្ឋ និងជំរុញការដោះស្រាយវិវាទដីធ្លីក្រៅប្រព័ន្ធតុលាការ ដើម្បីអាចបង្កើតបាននូវបរិយាកាសគ្មានវិវាទ។

ជាមួយគ្នានេះ លោក អ៊ុក ភ័ក្ដ្រា អភិបាលរងខេត្តក៏បានលើកឡើងថា ក្នុងរយៈពេល ១ឆ្នាំ ដើមអាណត្តិទី៧ នៃរដ្ឋសភា រដ្ឋបាលខេត្តមណ្ឌលគិរី បានខិតខំប្រឹងប្រែងយកចិត្តទុកដាក់ជម្រុញការអនុវត្តការងារសំខាន់ៗ មួយចំនួនជាអាទិភាពស្រប តាមគោលនយោបាយដាក់ចេញដោយក្រសួងរៀបចំដែនដី នគរូបនីយកម្ម និងសំណង់រួមមាន បានកំណត់យកការចុះបញ្ជីដីបង្ហើយដែលជាការងារអាទិភាពចំពោះមុខ សំដៅបញ្ចប់ការងារវាស់វែងដីធ្លីនៅក្នុងខេត្ដ។

លោកបន្តថា សកម្មភាពទាំងនេះដើម្បីកែសម្រួលភាពមិនច្បាស់លាស់ កាត់បន្ថយជម្លោះលើព្រំដីកាន់កាប់ ផ្ដល់នូវសុវត្តិភាពផ្លូវច្បាប់ សន្តិភាពផ្លូវចិត្ត ដើម្បីពង្រឹងសុវត្ថិភាពនៃការកាន់កាប់ដីធ្លី និងកសាងសង្គមសុខដុម ដូចក្នុងភូមិសាស្ត្រខេត្តមណ្ឌលគិរីស្រាប់ ជាខេត្តមួយត្រូវបានប្រកាសតំបន់វិនិច្ឆ័យ ក្រោមយុទ្ធនាការចុះបញ្ជីដីធ្លីគាំទ្រដោយអន្តរក្រសួងរហូតសម្រេច​បាន​លើភូមិទាំង ៩២ ភូមិ ទូទាំងខេត្ត។

ទន្ទឹមនេះលោក លឹម ចាន់សូភី ប្រធានមន្ទីររៀបចំដែនដីខេត្តបានឲ្យដឹងថា មន្ទីរជំនាញ បានចុះចែកវិញ្ញាបនបត្រសម្គាល់ម្ចាស់អចលនវត្ថុ ដែលនៅសេសសល់ជូនប្រជាពលរដ្ឋ ស្ថិតនៅភូមិសាស្ត្រ ស្រុកកែវសីមា ស្រុកកោះញែក និងស្រុកពេជ្រាដា ខេត្តមណ្ឌលគិរី ចំនួន ២៣ ភូមិ។

ក្នុងនាមមន្រ្តីជំនាញមន្ទីរដែនដី បានស្នើដល់អាជ្ញាធរមូលដ្ឋាន និងមន្រ្តីជំនាញ បន្តចូលរួមសហការគាំទ្រក្នុងដំណើរ បេសកកម្មរបស់មន្ទីរ ឲ្យកាន់តែប្រសើរថែមទៀត ធ្វើយ៉ាងណាដើម្បីធានាសម្រេចបានគោលដៅតាមផែនការ គឺការចុះបញ្ជីបញ្ចប់ និងបន្តចូលរួមសហការ និងផ្តល់ទិន្នន័យក្នុងការកសាង ប្លង់គោលប្រើប្រាស់ដីថ្នាក់ក្រុង/ស្រុក និងផែនការប្រើប្រាស់ដីថ្នាក់ឃុំ/សង្កាត់ ឲ្យបានពេញលេញ៕

អត្ថបទ៖ រៀម សុខហេង