កម្មវិធីតស់ៗលេងទឹកនៃព្រឹត្តិការណ៍អង្គរសង្ក្រាន្ត ត្រៀមពាងទឹកជាច្រើន សម្រាប់ផ្ដល់ការត្រជាក់ត្រជុំដល់អ្នកទេសចរ

ក្រុមការងារតស់ៗលេងទឹក នៅតំបន់មាត់ស្ទឹងសៀមរាប បានចាប់ផ្តើមដំណើរការសាងសង់ និងរៀបចំតុបតែងលម្អទីតាំង និងរៀបចំកន្លែងសម្រាប់លេងល្បែងកម្សាន្ត ទាំងនៅលើគោក និងនៅលើទឹក ជាមួយគ្នានេះ ពាងទឹកដែលលាបពណ៌អមជាមួយអក្សញញឹមសាទរយ៉ាងស្រស់ស្អាត ត្រូវបានដាក់ពង្រាយនៅតំបន់នេះហើយ នៅរសៀលថ្ងៃទី១ ខែមេសា ឆ្នាំ២០២៥។

លោក ហួត សូនី ប្រធានក្រុមការងារ កម្មវិធីតស់ៗលេងទឹក បានឱ្យដឹងថា តំបន់តស់ៗលេងទឹកនៃព្រឹត្តិការណ៍អង្គរសង្ក្រាន្តឆ្នាំ២០២៥ នេះ គឺបានដំណើរការសាងសង់ និងរៀបចំលម្អផ្សេងៗបានប្រមាណ៣០% ហើយ។ ជាមួយគ្នានេះក្រុមងារតស់ៗលេងទឹក ក៏បានកំពុងតែញាប់ដៃញាប់ជើង ដើម្បីរៀបចំឱ្យរួចទាន់ពេលវេលា។ លោកបានបន្តថា នៅតំបន់ តស់ៗលេងទឹកនេះ គឺជាកន្លែងមួយដែលមានការចាប់អារម្មណ៍ និងមានភាពទាក់ទាញ ភ្ញៀវទេសចរដែលមកកម្សាន្តនៅក្នុងព្រឹត្តិការណ៍នេះជារៀងរាល់ឆ្នាំ​ ពោលកម្រនឹងហួសកន្លែងនេះណាស់ ព្រោះជាកន្លែងត្រជាក់ ហើយប្រជាពលរដ្ឋចូលចិត្ត ជាពិសេសយុវជន គឺតែងតែប្រមូលផ្តុំគ្នានៅតំបន់នេះ។

លោកបានបញ្ជាក់ថា នៅតំបន់តស់ៗលេងទឹកនេះ មានកម្មវិធីលេងកម្សាន្តជាច្រើន ដូចជា ស្ពានញញឹមសាទរនៅដងស្ទឹង ជិះកង់ធ្លាក់ទឹក ប្រដាល់ធ្លាក់ទឹក លេងទឹកជាមួយពពុះសាប៊ូនៅលើតង់ កញ្ញាធ្លាក់ទឹក និងកម្មផ្សេងៗជាច្រើនទៀត ហើយកម្មវិធីទាំងនេះ នឹងចាប់ផ្តើមលេងចាប់ពីថ្ងៃទី១៤-១៦ ក្នុងព្រឹត្តិការណ៍អង្គរសង្កា្រន្ត នៃពិធីបុណ្យចូលឆ្នាំប្រពៃណីជាតិខ្មែរ។

លោកបន្តថា ក្រៅពីការលេងទឹក ដែលក្រុមការងារបានរៀបចំរួច ក៏នឹងមានការបានបាញ់ទឹកពីក្រុមរថយន្តរបស់សមត្ថកិច្ចផងដែរ ដែលនឹងធ្វើឱ្យកម្មវិធីនេះរឹតតែសប្បាយ។ សូមជម្រាបថា កម្មវិធី តស់ៗលេងទឹក មានទីតាំងស្ថិនតនៅតំបន់មាត់ស្ទឹងសៀមរាប និងសួនច្បារក្បែព្រះរាជដំណាក់ក្រុងសៀមរាប៕

ដោយ៖ គឿន វេត