ស្នងការខេត្តក្រចេះ ត្រៀមកម្លាំងជាង ១ ពាន់នាក់ ដើម្បីធានាសណ្តាប់ធ្នាប់ឱកាសបុណ្យចូលឆ្នាំខ្មែរ

ស្នងការដ្ឋាននគរបាលខេត្តក្រចេះ បានត្រៀមកម្លាំងអន្តរាគមន៍ប្រមាណពី ១,០០០ នាក់ ទៅ ១,២០០ នាក់ និងប្រជាការពារជាង ៤ ពាន់នាក់ ដើម្បីធានារក្សាបាននូវសុខសុវត្ថិភាព និងសណ្តាប់ធ្នាប់សាធារណៈជូនប្រជាពលដ្ឋជួបជុំក្នុងឱកាសនៃពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់នាថ្ងៃទី១៤-១៥-១៦ ខែមេសា ឆ្នាំ២០២៥ ខាងមុខនេះ ។

នេះតាមការបញ្ជាក់ឲ្យដឹងពីលោកឧត្តមសេនីយ៍ត្រី ហ៊ន ប៊ូច ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តក្រចេះ បានឲ្យកម្ពុជាថ្មី ដឹងនៅថ្ងៃទី០៧ ខែមេសា ឆ្នាំ២០២៥នេះ។

​លោកឧត្តមសេនីយ៍ត្រី ហ៊ន ប៊ូច ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តក្រចេះ​បាន​ថ្លែង​បញ្ជាក់ថាផែនការ ការពារសន្តិសុខ សណ្តាប់ធ្នាប់ និងសុវត្ថិភាពសង្គម គឺ​មាន​ការ​ដាក់ពង្រាយកម្លាំងនៅតាមចំណុច​គោលដៅសំខាន់​ៗ ប្រមាណជាង ១០០ កន្លែង នៅទូទាំងខេត្ត ក្នុងនោះរួមមានគោលដៅតំបន់រមណីយដ្ឋានធម្មជាតិ រមណីយដ្ឋានកៃឆ្នៃ រមណីយដ្ឋានវប្បធម៌ ទីវត្តអារាម និងកន្លែងកំសាន្តផ្សេងៗ ដើម្បីធានាបានសុខសុវត្ថិភាព និងសណ្តាប់​ធ្នាប់​សាធារណៈ​ឲ្យ​បានល្អប្រសើរ៕

អត្ថបទ ៖ ប្រុញ វិធិន