​ក្រុមហ៊ុន​ចំនួន ៦ ចូលរួម​ដេញថ្លៃគម្រោង​សាងសង់ផ្លូវបេតុង​​ក្នុងឃុំកន្ទួត ក្នុងតម្លៃប៉ាន់ស្មាន ២៩៣ លាន​រៀល

រដ្ឋបាលឃុំកន្ទួត ស្រុកចិត្របុរី ខេត្តក្រចេះ បានបើកដំណើរការដេញថ្លៃគម្រោងសាងសង់ផ្លូវបេតុងអាមេ ប្រវែង ០,៣២ គីឡូម៉ែត្រ ទទឹង ៦ ម៉ែត្រ កម្រាស់ ២០០ មីលីម៉ែត្រ និងសង់លូទោលកាត់ផ្លូវ ១ កន្លែង ក្នុងតម្លៃប៉ាន់ស្មាន ២៩៣,២៧១,៧៧១រៀល និងមានក្រុមហ៊ុនចូលរួមដាក់ដេញថ្លៃចំនួន ៦ ក្រុមហ៊ុន។

ការបើកដំណើរការដេញថ្លៃគម្រោងខាងលើនេះ ធ្វើឡើងនាព្រឹកថ្ងៃទី ៣ ខែកក្កដា ឆ្នាំ២០២៦ ដោយមានការចូលរួមពី​លោក ឥម ធីរិន អភិបាលរងស្រុកចិត្របុរីនិងលោក កង ប៊ុនធី មេឃុំកន្ទួត និងមាន​ការចូលរួមពីមន្ត្រីទីចាត់ការផែនការនិងវិនិយោគខេត្ត និងសមាជិក ក្រុមប្រឹក្សាឃុំផងដែរ។

មុនពេលចាប់ផ្ដើមបើកនៃគម្រោងដេញថ្លៃ គេសង្កេតឃើញមានក្រុមហ៊ុនជា​ច្រើនបានចូលរួម នៅក្នុងបរិវេណសាលាឃុំកន្ទួត។

ដោយឡែក នៅពេលដល់ម៉ោងដេញថ្លៃមានតែក្រុមហ៊ុនចំនួន ៦ តែប៉ុណ្ណោះ ដែលបានសម្រេចចិត្តដាក់សំណើ​ដេញថ្លៃ ហើយចំពោះក្រុមហ៊ុនដែលបានទទួលជ័យជំនះនៅក្នុងការដេញថ្លៃបានទៅលើក្រុមហ៊ុន វ៉េង លាប ដែលបានដាក់តម្លៃដេញថ្លៃ ១៤៥.០០០.០០០ រៀល។

លោក ឥម ធីរិន អភិបាលរងស្រុកចិត្របុរី បានថ្លែងអំណរគុណ និងអបអរសាទរ ដល់ក្រុមហ៊ុនអ្នកទទួលការដែលបានឈ្នះការដេញថ្លៃគម្រោងនេះ។

ជាមួយគ្នានោះ លោកអភិបាលរងស្រុក​ក៏បានក្រើនរំលឹកដល់ក្រុមហ៊ុនដេញថ្លៃ​បាន​ ត្រូវតែអនុវត្ត គម្រោង​ឲ្យបានល្អ ធានាឲ្យបាននូវគុណភាព និងត្រឹមត្រូវតាមបច្ចេកទេស ព្រោះនេះជាថវិការបស់រដ្ឋ (ថវិការបស់ប្រជាពលរដ្ឋ) មិនមែនជាថវិកាឯកជនឡើយ។

លោកក៏បាន សម្តែងការសោកស្តាយក្រុមហ៊ុនផ្សេងទៀតដែលមិនបានឈ្នះនៅក្នុងគម្រោងនេះ ដោយលោកបានបញ្ជាក់ថា នៅក្នុងស្រុកចិត្របុរី មានរហូតដល់ ១០ ឃុំ ហើយមានប្រហែល ៧ឃុំ ដែលនឹងមានគម្រោងដេញថ្លៃបន្តបន្ទាប់ទៀត ក្នុងមួយឃុំៗ មិនមែនមានតែមួយគម្រោងនោះទេ គឺអាចមាន ២ ឬ ៣ គម្រោង។ ដូច្នេះ លោកបាន អញ្ជើញពួកគេឲ្យចូលរួមដេញថ្លៃនៅឱកាសក្រោយៗទៀត នៅពេលមានការជូនដំណឹង ពីថ្នាក់ជាតិ៕

អត្ថបទ៖ ប្រុញ វិធិន