​នៅ​ចំណត​រថយន្តក្រុង​ខេត្តក្រចេះ មនុស្ស​កកកុញ​ រង់​ចាំ​ជិះ​​រថយន្តក្រុង​ឥត​គិត​ថ្លៃ​របស់រដ្ឋមក​រាជធានី​​ភ្នំពេញវិញ

​រថយន្តក្រុងសាធារណៈ​ជិៈដោយឥតគិតថ្លៃរបស់រដ្ឋ បានជួយសម្រាលបន្ទុកក្នុងការចំណាយថវិកា​បាន​យ៉ាងច្រើនដល់ប្រជាពលរដ្ឋ ពេលធ្វើដំណើរទៅមកនាអំឡុងពេលនៃពិធីបុណ្យចូលឆ្នាំថ្មីប្រពៃណីជាតិខ្មែរ។

ជាក់ស្ដែង ប្រជាពលរដ្ឋក្នុងខេត្តក្រចេះ បានសាទរសប្បាយរីករាយ ពេលមកលេងស្រុកកំណើតម្តងៗ តាមរយៈការជិៈរថយន្តក្រុងរបស់រដ្ឋ ជាពិសេសក្នុងឱកាសបុណ្យចូលឆ្នាំថ្មី ដែលមានរយៈពេល ៣ថ្ងៃ។

នៅព្រឹកថ្ងៃទី១៧ ខែមេសា ប្រជាពលរដ្ឋក្នុង​ខេត្តក្រចេះ បាន​នាំគ្នាសម្រុកធ្វើដំណើរត្រឡប់ទៅបំពេញភារកិច្ចការងារនៅរាជធានីភ្នំពេញវិញតាមរថយន្តក្រុងសាធារណៈ​មិនបង់ប្រាក់ ដោយ​មាន​លោក ម៉ែន វណ្ណា នាយករដ្ឋបាលខេត្តក្រចេះ ក៏បានចូលរួមជូនដំណើរប្រជាពលរដ្ឋឡើងរថយន្តក្រុងសាធារណៈដើម្បីត្រឡប់ទៅរាជធានីភ្នំពេញ។

រថយន្តក្រុងសាធារណៈ រៀបចំឡើងដោយរាជរដ្ឋាភិបាលកម្ពុជា បានរៀបចំសម្រាប់ខេត្តក្រចេះចំនួន ២៥ គ្រឿងដើម្បីសម្រួលដល់ការធ្វើដំណើរដល់ប្រជាពលរដ្ឋដែរមកលេងស្រុកកំណើតក្នុងខេត្តក្រចេះនិងត្រឡប់ទៅបំពេញភារកិច្ចការងារនៅរាជធានីភ្នំពេញវិញ៕

អត្ថបទ៖ ប្រុញ វិធិន