ហ្វូង​កុករាប់រយក្បាល សម្រុកមកជ្រកលើភ្នំធិបតីភ្ញាក់ផ្អើលដល់អ្នកស្រុកនាំគ្នាទស្សនារាល់ល្ងាច

នៅរាល់ពេលថ្ងៃបាក់រសៀលចន្លោះពីម៉ោង ៤ ដល់ ៥ ល្ងាច អ្នកស្រុកគាស់ក្រឡក្នុង​ខេត្ត​បាត់ដំបង តែងបាននាំគ្នាមកទស្សនាកម្សាន្តហ្វូកកុកហោះ ហើរក្រវែលរកទ្រនំថ្មី ឡើងសព្រាតពាសពេញអាកាស ដែលជាចំណីចក្ខុរបស់មនុស្សម្នា បាន​មកទស្សនាកម្សាន្តយ៉ាងច្រើន។

ខណះហ្វូងសត្វកុកនេះ ប្រជាពលរដ្ឋនិងអាជ្ញាធរនៅទីនោះថា នៅមិនទាន់ដឹងថាពួកវា​មកពីតាមតំបន់ណាខ្លះនោះនៅ​ឡើយ ហើយការមករស់នៅលើភ្នំធិបតីរបស់សត្វកុកនេះ ត្រូវបានអ្នកភូមិសង្កេតឃើញមានចំនួនកាន់តែច្រើន នៅក្នុង​រយះ​ពេល​ជាងកន្លះខែមកនេះ។

បើតាមអាជ្ញាធរស្រុកគាស់ក្រឡ​បាន​បញ្ជាក់ថា ការបម្លាស់​ទីរបស់សត្វកុក មករកជម្រកនៅជើងភ្នំធិបតីនេះ ដោយសារតែមានដើមឈើតូចធំក្រាស់ ហើយនៅទីតាំងនោះក៏មានប្រភពទឹកផងដែរ។ តែចំនួនកុកយ៉ាងច្រើនបែបនេះ អាជ្ញាធរនៅមិនទាន់ដឹងប្រភពរបស់សត្វកុកទាំងនោះនៅឡើយ។

យ៉ាងណាមិញ បើ​តាម​មន្រ្តីមូលដ្ឋានយល់​ឃើញ​ថា​ នេះជាការល្អប្រសើរ​សម្រាប់ការទស្សនាកម្សាន្តរបស់អ្នកស្រុក ខណះនៅក្នុងស្រុកគាស់ក្រឡ នៅមិនទាន់មានទីតាំងទេសចរណ៍ខ្នាតលំដាប់ខេត្តនៅឡើយ។ បើមន្ទីរជំនាញបានយកទីតាំងនោះដាក់បញ្ចូលជាគោលដៅទេសចរណ៍ អាចនឹងប្រសើស្របពេលមានសត្វកុកមករស់នៅយ៉ាងច្រើនបែបនេះ នឹងបានលើកកម្ពស់សេដ្ឋកិច្ចគ្រួសាររបស់ប្រជាព លរដ្ឋនៅតំបន់នោះ ឲ្យមានភាពប្រសើឡើងផងដែរ។

លោក ហម អរុណ អនុប្រធាននៃ​មន្ទីរ​ទេសចរណ៍ខេត្តបាត់ដំបង​បាន​ឲ្យកម្ពុជា​ថ្មីដឹង​ថា លោកមានការភ្ញាក់ផ្អើលពេលឃើញមានចំនួនសត្វកុកមករកជម្រកនៅទីតាំងនោះ ស្របពេលខាងមន្ត្រីជំនាញ​នៃមន្ទីរទេសចរណ៍​ខេត្តបានគ្រោងនឹងរៀបចំតំបន់នោះឲ្យក្លាយជាតំបន់ទេសចរណ៍។

លោកថា ការគ្រោងដាក់ទីតាំងភ្នំធិបតីឲ្យក្លាយជាគោលដៅទេសចរណ៍ដ៏បន្ថែមសម្រាប់ខេត្តបាត់ដំបងនេះ បានធ្វើឡើងកាលពីថ្ងៃទី ៤ ខែកញ្ញាឆ្នាំ២០២៤ ហើយក៏មាន​វត្តមាន​លោក អ៊ុន វ៉ាល់ឡឺរ៉ូ រដ្ឋលេខាធិការក្រសួងទេសចរណ៍ និង​លោក ឆាយ ម៉ាទីណាល់ អភិបាលរង​ខេត្ត​បាត់ដំបង រួមនិងមន្ត្រីអាជ្ញាធរពាក់ព័ន្ធជាច្រើនផងដែរ ដែលបានចុះពិនិត្យលើទីតាំងនោះ ស្ថិតក្នុងឃុំធិបតី ស្រុកគាស់ក្រឡ ខេត្តបាត់ដំបង។

បន្ទាប់​ពី​ចុះ​ពិនិត្យទី​តាំង​ជាក់ស្ដែងបានមួយថ្ងៃ ក្រុមការងារ​បាន​ដឹក​នាំ​កិច្ចប្រជុំ​ពិភាក្សា​អំពី​សក្តានុពល និងព័ត៌មានពាក់ព័ន្ធ​ស្តី​ពី​តំបន់​ភ្នំ​ធិបតី​ដើម្បី​ជំរុញ​ការរៀបចំ​​ភ្នំធិបតីឲ្យក្លាយ​ជាគោលដៅ​ទេសចរណ៍​បែប​ធម្មជាតិ សាសនា និង វប្បធម៌នាពេលខាងមុខ ហើយ​ក៏​នឹងបាន​ពង្រីក​នូវវិសាល​ភាព​សេដ្ឋកិច្ច​គ្រួសារ​ដល់ប្រជាពលរដ្ឋ​ជា​ច្រើនដែល​រស់​នៅទីនោះ​​បាន​យ៉ាង​​ល្អប្រសើរ តាមរយៈ​ការ​លក់​ដូរ​ចំណី​អាហារ និង​របស់​របរ​ផ្សេងៗទៅតាមការ​ច្នៃប្រឌិត​​របស់ពលរដ្ឋក្នុង​មូលដ្ឋាន។

ស្របពេលមានវត្តមានសត្វស្លាបយ៉ាងច្រើននេះ បើតាមមន្រ្តីទេសចរណ៍ខេត្ត​បាត់ដំបង បច្ចុប្បន្នខាងមន្ទីរកំពុងប្រជុំពិភាក្សាដើម្បីជំរុញក្នុងការរៀបចំនៅទីតាំងខាងលើនេះ ឲ្យក្លាយជាគោលដៅទេសចរណ៍ឲ្យបានឆាប់ៗខាងមុខនេះ។

ភ្នំធិបតីគឺជា​តំបន់ភ្នំប្រវត្តិសាស្ត្រ និង វប្បធម៍ ដែល​មាន​រូប​ព្រះពុទ្ធ​បដិមា​ដ៏ធំ​​មួយ​នៅ​លើភ្នំលាតសន្ធឹងលើផ្ទៃ​ដី​ ២៥០​ហិតា គ្របដណ្ដប់​ដោយ​ព្រៃ​ព្រឹក្សា​ដ៏​ធំ​ល្វឹងល្វើយ និង​មាន​សត្វ​ក្ងោក​ជាង ៣០០ ក្បាលរស់នៅ។

ភ្នំធិបតីបច្ចុប្បន្ន មានវត្តចំនួន ​១ ដែលមានឈ្មោះវត្តសុវណ្ណគិរីហៅ “វត្តភ្នំធិបតី” បានសាងសង់នៅខាងលើភ្នំតាំងពីឆ្នាំ​១៩៣០ និងមានព្រះវិហារ ហេដ្ឋារចនាសម្ព័ន្ធ​ក្នុង​បរិវេណ​វត្ត និង​ព្រះអង្គធំ​កម្ពស់​ប្រមាណ ៣០ ម៉ែត្រ នៅ​លើកំពូលភ្នំ ដោយ​មាន​ធ្វើផ្លូវបេតុង​ឡើងទៅ​ដល់​ព្រះអង្គធំ​ ក៏​បាន​ក្លាយ​ជា​ទី​ចាប់​​អារម្មណ៍​សម្រាប់​ប្រជាពលរដ្ឋ​ពុទ្ធបរិស័ទ​ក្នុង​ការ​មក​បំពេញ​បុណ្យកុសល​តាម​ប្រពៃណី​ព្រះពុទ្ធសាសនាដល់បច្ចុប្បន្ន៕

អត្ថបទ÷សៅ សារិទ្ធ