លោកយាយវ័យចំណាស់ម្នាក់ រស់នៅក្នុងខ្ទមម្នាក់​ឯង ត្រចៀកក៏ថ្លង់ ទទួលបាន​​ជំនួយឧបត្ថម្ភ​​សម្រួល​ការ​លំបាក

លោកយាយវ័យចំណាស់ម្នាក់ រស់នៅក្នុងខ្ទមកំសត់តែម្នាក់ឯង គ្មានទីពឹង ត្រចៀកក៏ថ្លង់ សព្វថ្ងៃពឹងផ្អែកលើការដើរបេះបន្លែយកមកលក់នៅផ្សារកន្ទួត ដើម្បីចិញ្ចឹមជីវិតប្រចាំថ្ងៃ។

លោកយាយមានឈ្មោះ ច្រៀត ផូ ភេទស្រី អាយុ ៦៣ ឆ្នាំ មានទីលំនៅភូមិកន្ទួត ឃុំកន្ទួត ស្រុកចិត្របុរី ខេត្តក្រចេះ។

ដោយមើលឃើញអំពីស្ថានភាពការរស់នៅជាក់ស្ដែង នាថ្ងៃទី១២ ខែឧសភា ឆ្នាំ២០២៥ លោក វរសេនីយ​ឯក ប៊ុត នឿន អធិការនគរបាលស្រុកចិត្របុរី បានដឹកនាំកម្លាំងនៃអធិការដ្ឋាននគរបាលស្រុកចិត្របុរី និងមានការចូលរួមពីលោក កន ប៊ុនធី មេឃុំកន្ទួត រួមជាមួយលោកនាយប៉ុស្ដិ៍នគរបាលរដ្ឋបាលកន្ទួត បាននាំយកអំណាយជូនលោកយាយ ច្រៀត ផូ ជាចាស់ជរា និងមានជីវភាពខ្វះខាត។

តាមការឲ្យដឹងពីលោក ប៊ុត នឿន បានឲ្យដឹងថា ដោយមានការរាយកាណ៍អំពីស្ថានភាព ជួបការលំបាក ខ្វះខាត ក្នុងការរស់នៅប្រចាំថ្ងៃរបស់លោកយាយ តាមរយៈលោកនាយប៉ុស្ដិ៍នគរបាលរដ្ឋបាលកន្ទួត លោកក៏បានរៀបចំនូវសម្ភារៈ ថវិកា និងកង់ ១ គ្រឿង ប្រគល់ជូនដល់លោកយាយ។ លោក បន្តថា ទោះបីជាអំណោយសម្ភារៈ និងថវិកាទាំងអស់នេះ តិចតួចក្តី តែនេះគឺជាវប្បធម៌ចែករំឡែក ហើយក៏ជាការចូលរួមចំណែកអាចជួយសម្រាលនូវទុកលំបាករបស់លោកយាយបានមួយរយៈពេលផងដែរ។

ដោយអំណោយទាំងនោះ រួមមាន៖ កង់ជិៈ ចំនួន ១ គ្រឿង ថវិកា ចំនួន ២០០,០០០ រៀល ទឹកផ្លែឈើចំនួន ២ កេះ ភួយ និងក្រម៉ា៕

អត្ថបទ៖ ប្រុញ វិធិន