ព័ត៌មានជាតិ

បានបទពិសោធន៍ពីឪពុក កសិករម្នាក់ចិញ្ចឹមទានិងច្នៃប្រឌិតបន្ថែម បង្កើតចំណូលដល់គ្រួសារ

បានផុស

១ year មុន

នៅ

ថ្ងៃអង្គារ ១៣ ឧសភា ២០២៥

ដោយ

លោក ទី សុខរើន ជាម្ចាស់កសិដ្ឋានចិញ្ចឹមទា ស្ថិតនៅក្នុងភូមិទួល ឃុំរូងជ្រៃ ស្រុកថ្មគោល ខេត្តបាត់ដំបងបានឲ្យដឹងថា ដោយសារមានបទពិសោធន៍ពីឪពុក ការចិញ្ចឹមទារយៈពេលជាច្រើនឆ្នាំមកនេះមានការរីកចម្រើន ដែលបានជួយឲ្យសេដ្ឋកិច្ចគ្រួសាររបស់លោកបានល្អប្រសើរពីមួយឆ្នាំទៅមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចិញ្ចឹមទាទាមទារឲ្យមានបទពិសោធន៍ និងច្នៃប្រឌិតដើម្បីតម្រូវការលើទីផ្សារ ទើបមិនមានការប្រឈមលើការចិញ្ចឹម។ កសិកររូបនេះបានចែករំលែកបទពិសោធន៍ក្នុងការចិញ្ចឹមទាមាន ២ យ៉ាង។ ទីមួយគឺការចិញ្ចឹមទាភ្ញាស់យកកូន និងមួយទៀតយកពងភ្ញាស់ធ្វើជាពងទាកូន លក់ចែកចាយបន្តដើម្បីទទួលបានចំណូលបន្ថែម។

បើគិតមកដល់ពេលនេះ ទារបស់លោក ទី សុខរើន ដែលចិញ្ចឹមជាង ៤ ឆ្នាំ កើនឡើងដល់ប្រមាណ ៤ ពាន់ក្បាល។

លោក ទី សុខរើន បានឲ្យដឹងថា ឆ្នាំដំបូងពេលលោកចិញ្ចឹមគឺប្រមូលយកតែពងលក់។ តែក្រោយមកលោកច្នៃប្រឌិតពងទាឲ្យមានប្រយោជន៍ ក្នុងនោះពងទាមួយចំនួនលោកបានភ្ញាស់យកកូនលក់ឲ្យអតិថិជនយកទៅចិញ្ចឹមបន្ត ហើយមួយផ្នែកទៀតលោកបានភ្ញាស់ជាពងទាកូន ដែលបច្ចុប្បន្នមនុស្សម្នាពេញនិយមក្នុងការទទួលទាន។

សម្រាប់កូនទាដែលលោកបានភ្ញាស់លក់ ដោយកូនទាញីលក់ក្នុងតម្លៃ ២ ២០០ រៀលក្នុងកូនទា១ ហើយកូនទាឈ្មោលលក់តម្លៃ ៥០០ រៀល ក្នុងកូនទា១។

បច្ចុប្បន្នតម្រូវការពងទាមានការខ្វះខាត លោកក៏បានប្រមូលទិញពងទាពីកន្លែងផ្សេងៗ ដើម្បីតម្រូវការពងទាកូនបន្ថែមនៅលើទីផ្សារ។

កសិកររូបនេះបានបញ្ជាក់ថា មុខរបរចិញ្ចឹមទារយៈពេល ៤ ឆ្នាំមកនេះ មិនសូវជាជួបការលំបាកច្រើននោះទេ ហើយការថែទាំក៏មិនជួបបញ្ហាអីដែរ គឺគ្រាន់តែផ្តល់ចំណី ២ ដងក្នុង១ថ្ងៃ គឺព្រឹកនិងល្ងាចជាការស្រេច។ ចំពោះជំងឺក៏មិនប្រឈមដែរ ព្រោះលោកបានប្រើថ្នាំឲ្យទាគ្រប់គ្រាន់សម្រាប់ថែទាំសុខភាពបញ្ចៀសកើតមានជំងឺផ្សេង។

យ៉ាងណាមិញ ចំពោះការប្រឈមក៏មានខ្លះៗដែរ ក្នុងរដូវក្តៅមានងាប់ខ្លះ តែចំពោះជំងឺគ្មានទេ៕

អត្ថបទ÷សៅ សារិទ្ធ