សម្តេចតេជោ អំពាវនាវពលរដ្ឋខ្មែរកុំធ្វើអំពើជ្រុលនិយមបាតុកម្មប្រឆាំងស្ថានទូតថៃប្រចាំកម្ពុជា

សម្ដេចតេជោ ហ៊ុន សែន ក្នុងនាមជាប្រធានគណបក្សកាន់អំណាច បានអំពាវនាវដល់បងប្អូនជនរួមជាតិកុំឱ្យធ្វើ សកម្មភាពជ្រុលនិយម ដូចជាបាតុកម្មប្រឆាំងស្ថានទូតថៃ ក្រុមហ៊ុនថៃ និងជនជាតិថៃប្រចាំនៅកម្ពុជា បើទោះជាកម្ពុជា និងថៃកំពុងមានភាពតានតឹងលើជម្លោះព្រំដែនក៏ដោយ។

ការអំពាវនាវនេះ ធ្វើឡើងដើម្បីឆ្លើយតបទៅនឹងការវិវឌ្ឍថ្មីៗ បន្ទាប់ពីភាគីថៃបានពង្រីកជម្លោះព្រំដែនរីករាលដាលទៅកន្លែងផ្សេង ដូចជា ការបិទព្រំដែនជាឯកតោភាគី បន្ថយចំនួនថ្ងៃស្នាក់នៅ ជាឯកតោភាគី និងការគំរាមកាត់ភ្លើង កាត់អ៊ីនធឺណិត ព្រមទាំងលួចរាយលួសបន្លាថ្មីនៅតាមច្រកព្រំដែនខ្លះដោយធ្វើតាមទំនើងចិត្ត។

សម្តេចតេជោ ហ៊ុន សែន ប្រធានព្រឹទ្ធសភា បានបង្ហោះសារនៅលើបណ្តាញសង្គមហ្វេសប៊ុក នៅព្រឹកថ្ងៃទី ១៣ ខែមិថុនា នេះថា៖«ខ្ញុំសូមអំពាវបងប្អូនជនរួមជាតិ សូមកុំធ្វើអំពើជ្រុលនិយមដូចជាបាតុកម្មប្រឆាំងស្ថានទូតថៃ ក្រុមហ៊ុនថៃ និងជនជាតិថៃនៅកម្ពុជា និងសូមកុំស្អប់ខ្ពើមប្រកាន់ពូជសាសន៍ ចំពោះជនជាតិថៃដែលភាគច្រើនលើសលប់ជាមនុស្សល្អ។ មានតែក្រុមជ្រុលនិយម និងយោធាមួយចំនួនប៉ុណ្ណោះ ដែលបង្ករឿងជាមួយកម្ពុជា ព្រោះជាទម្លាប់រដ្ឋាភិបាលថៃ មិនអាចគ្រប់គ្រងកងទ័ពបានដូចប្រទេសយើងនោះទេ»។

នៅក្នុងជម្លោះព្រំដែននេះ  កាលពីថ្ងៃទី ០៦ ខែមិថុនា ឆ្នាំ ២០២៥ ក្រុមជាតិនិយមថៃដែលរួមមានបណ្តាញក្រុមនិស្សិត និងប្រជាជនថៃ បានប្រមូលផ្តុំធ្វើបាតុកម្មនៅមុខស្ថានទូតកម្ពុជាប្រចាំទីក្រុងបាងកក ដើម្បីបង្ហាញពីការតាំងចិត្តក្នុងការគាំទ្ររដ្ឋាភិបាលថៃលើសំណុំរឿងព្រំដែនជាមួយកម្ពុជា។

បើវិលទៅរកអតីតកា​ល ក្នុងអំឡុងឆ្នាំ ២០០៣ ពលរដ្ឋខ្មែរបានធ្វើបាតុកម្មដុតស្ថានទូតថៃប្រចាំទីក្រុងភ្នំពេញ ដែលជាព្រឹត្តិការណ៍ប្រវត្តិសាស្ត្រមួយនៃទំនាក់ទំនង កម្ពុជា-ថៃ ឈានទៅរកការប្រេះឆាគ្នា ទៅលើបុព្វហេតុជាតិនិយម នៃជាតិសាសន៍ទាំងពីរ ។ មូលហេតុដែលនាំឱមានបាតុកម្មនៅស្ថានទូតថៃប្រចាំនៅកម្ពុជា ដោយសារតែមានតារាសម្ដែងថៃដ៏ល្បីមួយរូប បានមាក់ងាយមកលើជាតិសាសន៍ខ្មែរ ហើយបានអះអាងថាប្រាសាទអង្គរវត្តជារបស់ថៃ។

ក្រុមបាតុករធ្វើបាតុកម្មដុតសំបកកង់ឡាន ទាមទារឱ្យតារាថៃ នាងផ្កាយព្រឹក ចេញមុខសុំទោសប្រជាជនកម្ពុជាជាសាធារណៈ។ យ៉ាងណាមិញ ក្រោយ​ការ​វាយ​ប្រហារ​លើ​ស្ថានទូតថៃ រាជ​រដ្ឋាភិបាល​កម្ពុជា​បាន​ចេញ​មុខ​ទទួល​ខុស​ត្រូវ ដោយ​បង់​ប្រាក់​សំណង​រាប់​លាន​ដុល្លារ​ទៅ​ប្រទេស​ថៃ។ ឧបទ្ទវហេតុនេះបានប៉ះពាល់យ៉ាងខ្លាំងដល់ទំនាក់ទំនងការទូតរវាងប្រទេសទាំងពីរ។

គួរជម្រាបថា ភាពតានតឹងរវាងកម្ពុជា-ថៃ បានកើតឡើងជាថ្មីបន្ទាប់ពីមានការប៉ះទង្គិចគ្នារវាងកងទ័ពនៃប្រទេសទាំងពីរ កាលពីថ្ងៃទី ២៨ ខែឧសភា ដោយយោធិនថៃបានបាញ់មកលើលេណដ្ឋានកម្ពុជា ដែលជាទីតាំងឈរជើងយូរយារណាស់មកហើយ បណ្តាលឱ្យយោធិនខ្មែរមួយរូបបាត់បង់ជីវិត៕