សម្ដេចធិបតី បញ្ជាឱ្យបើកទ្វារទទួលដែលពលករត្រឡប់ពីថៃដោយគ្មានការរើសអើង ទោះគ្មានឯកសារក៏ដោយ ឱ្យតែជាខ្មែរ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បញ្ជាទៅកាន់មន្ត្រីក្រោមឱវាទ ត្រូវជួយសម្របសម្រួលទទួលពលករដែលមានបំណងវិលត្រឡប់ពីប្រទេសថៃ ចូលមកប្រទេសកម្ពុជាវិញដោយគ្មានការរើសអើង ទោះបីជាគ្មានឯកសារចេញចូលក៏ដោយ ឱ្យតែពលករទាំងនោះជាជនជាតិខ្មែរ។ សម្ដេចធិបតី នាយករដ្ឋមន្ត្រី បញ្ជាដូច្នេះ តាមរយៈសារសំឡេងពិសេស ទៅកាន់ក្រសួងស្ថាប័ន កាលពីយប់ថ្ងៃទី១៥ ខែមិថុនា។

តាមរយៈសារសំឡេងពិសេសរយៈពេលជិត២នាទី សម្ដេចធិបតី​ ហ៊ុន ម៉ាណែត នាយករដ្ឋមន្ត្រីកម្ពុជា បញ្ជាដូច្នេះ៖«ឯកឧត្ដមអភិសន្តិបណ្ឌិត ស សុខា ក្រសួងមហាផ្ទៃ ឯកឧត្ដម សុខា វាសនា ខាងអន្តោប្រវេសន៍ និងឯកឧត្ដម លោកជំទាវ អភិបាលខេត្ត គណៈអភិបាលខេត្តជាប់ព្រំដែនទាំង៧ គឺធ្វើយ៉ាងណាដើម្បីសហការក្នុងការសម្រួលប្រជាពលរដ្ឋរបស់យើង ដែលត្រឡប់មកវិញ មានឬគ្មានឯកសារ គឺឱ្យគាត់ចូលមកឱ្យតែជាជនជាតិខ្មែរ។»។

កាលពីថ្ងៃសៅរ៍ ទី១៤ ខែមិថុនា​ សម្ដេ​ចតេជោ ហ៊ុន សែន អតីតនាយករដ្ឋមន្ត្រីកម្ពុជា ក៏ចេញមកអំពាវនាវឱ្យពលករខ្មែរដែលធ្វើការនៅក្នុងប្រទេសថៃ ឆាប់រូតរះវិលចូលមកប្រទេសកម្ពុជាវិញ ព្រោះសម្ដេចមើលឃើញថា  ក្រុមជ្រុលនិយម និងយោធាថៃខ្លះ នឹងធ្វើបាបពលករកម្ពុជាជាមិនខានឡើយ។ សម្ដេចតេជោ ថែមទាំងបានធានាថា ទោះបីរស់នៅទីណាក៏ដោយឱ្យតែជាជនជាតិខ្មែរទោះមានឬ គ្មានឯកសារ ក៏រាជរដ្ឋាភិបាលទទួលយកបានទាំងអស់ដោយគ្មានការរើសអើង។

ជាមួយគ្នា សម្ដេចនាយករដ្ឋមន្ត្រី បញ្ជាឱ្យឧបនាយករដ្ឋមន្ត្រី រដ្ឋមន្ត្រីក្រសួងការបរទេស ប្រាក់ សុខុន ផ្ដល់គោលការណ៍ទៅស្ថានទូតខ្មែរប្រចាំនៅថៃ និងស្ថានកុងស៊ុលនៅខេត្ត​ស្រះកែវ និងទីតាំងផ្សេងទៀតសម្រួលឯកសារ បង្កលក្ខណៈងាយស្រួលដល់ពលករ ដែលមានបំណងចង់វិលមកភូមិឋានកំណើតវិញ។

សម្ដេច ហ៊ុន ម៉ាណែត បញ្ជាឱ្យរដ្ឋមន្ត្រីក្រសួងការងារកម្ពុជា លោក ហេង សួរ ត្រូវ​ផ្ដល់ដំណឹងអំពីឱកាសការងារនៅក្នុងប្រទេសកម្ពុជា ដើម្បីឱ្យពលករទទួលបានការងារធ្វើឆាប់រហ័ស ស្របពេលដែលកម្ពុជាកំពុងខ្វះកម្លាំងពលកម្ម។

សូមរម្លឹកឡើងវិញថា សម្ដេចធិបតី ហ៊ុន ម៉ាណែត កាលពីថ្ងៃសៅរ ទី១៤ ខែមិថុនា បានបញ្ជាទៅក្រសួងសេដ្ឋកិច្ចនិងហិរញ្ញវត្ថុ ក្រសួងស្ថាប័នពាក់ព័ន្ធ ត្រូវត្រៀមកញ្ចប់អន្តរាគមន៍សេដ្ឋកិច្ចនិងសង្គមកិច្ចមួយចំនួន ដើម្បីជួយអន្តរាគមន៍ សម្រួលជីវភាពរស់នៅប្រចាំថ្ងៃពលករខ្មែរដែលត្រឡប់មកវិញ។

សម្ដេច ក៏អំពាវនាវឱ្យសមាគមធនាគារ  និងសមាគមហរិញ្ញវ ត្ថុជួយសម្រាកបន្ទុកការបង់បំណុលរបស់ពលករខ្មែរ ក្នុងករណីពលករខ្មែរត្រូវជម្លៀសមកពីប្រទេសថៃច្រើន។ សម្ដេចចាត់ទុកថា ក្នុងពេលជាតិ និងពលរដ្ឋប្រឈមបញ្ហា ការរួមគ្នាជាធ្លុងមួយ គឺជាចំណុចខ្លាំងរបស់ខ្មែរ។ សំណើររបស់សម្ដេចធិបតី ត្រូវបានសមាគមធនាគារ និងសមាគមហិរញ្ញវត្ថុនៅកម្ពុជា​ សន្យាពិនិត្យឱ្យអស់លទ្ធភាពដើម្បីសម្រប​សម្រួលជូនពលករ។

សម្ដេច បញ្ជាទៅកាន់ក្រសួង-ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និងរដ្ឋបាលខេត្តជាប់ព្រំដែនថៃទាំង៧ ត្រៀមសម្របសម្រួលការឆ្លងកាត់ព្រំដែន ការស្នាក់នៅបណ្ដោះអាសន្ន ការហូបចុក និងថែទាំព្យាបាលសុខភាពបឋម ជូនជនជាតិខ្មែរនៅតំបន់ព្រំដែន ចំណែកក្រសួងការពារជាតិ កងទ័ពជើងគោក សាលារាជធានីភ្នំពេញ ត្រៀមរថយន្ត ដើម្បីដឹកជញ្ជូនពលករជម្លៀសពីព្រំដែន ត្រឡប់ទៅស្រុកកំណើត៕

ដោយ៖ ង៉ិល ណារ៉ាត់