ទំនេរពីស្រែចម្ការជនជាតិដើមភាគតិច ខេត្តមណ្ឌលគិរី នាំគ្នាជីករំដេងព្រៃ ក្នុងដីសហគមន៍ដើម្បីរកចំណូលបន្ថែម

ជាទម្លាប់បងប្អូនជនជាតិដើមភាគតិច នៅខេត្តមណ្ឌលគិរី តែងតែប្រកបមុខរបរធ្វើស្រែចម្ការ ចិញ្ចឹមសត្វជ្រូកគោមាន់ទា ប៉ុន្តែអ្វីដែលអាចរកប្រាក់ចំណូលបន្ថែមនោះ គឺពួកគេនាំគ្នាសម្រុកទៅជីករំដេង ព្រៃក្នុងដីសហគមន៍របស់ខ្លួនដើម្បីបង្កើនជីវភាពគ្រួសារប្រចាំថ្ងៃ ក្នុងការចិញ្ចឹមជីវិតផងដែរ។

អ្នកស្រី ស្រេវ ច័ន្ទ និងអ្នកស្រី ប៊ុនទិត្យ សារុំ ដែលមានទីលំនៅបច្ចុប្បន្នភូមិពូតាំងសង្កាត់រមនាក្រុងសែនមនោរម្យខេត្តមណ្ឌលគិរីជាជនជាតិដើមភាគតិចព្នង បានឱ្យដឹងថា សព្វថ្ងៃពួកគេមានមុខរបរធ្វស្រែចម្ការ និងចញ្ចឹមជ្រូកមាន់ទារ សម្រាប់ចញ្ចឹមជីវិត និងទំនេពីការងារផ្ទះឆ្លៀតដើរកាប់គាស់រំដេងនៅក្នុងព្រៃសហគមន៍ ក្បែរលំនៅឋាន ដើម្បីអាចរកចំណូលបានខ្លះៗ ទ្រទ្រង់ជីវភាពគ្រួសារ។ ពួកគេបន្ថែមថា ជាទម្លាប់អ្នកភូមិនៅតំបន់នេះ ភាគច្រើនសុទ្ធសឹងតែជាជនជាតិដើមភាគព្នង ពេលទំនេរការងារផ្សេងៗបាននាំគ្នាសម្រុកទៅក្នុងព្រៃនៅ ដើម្បីរុករករំដេងដែលដុះតាមបែបធម្មជាតិ។

ជារៀងរាល់ឆ្នាំ ពួកគេអាចរកប្រាក់កម្រៃបានច្រើនគួរសមដែរពីកាគាស់រំដេងព្រៃនេះ ដោយអាចរកប្រាក់ចំណូលបាន ចន្លោះពី ៣ម៉ឺន ទៅ ៤ម៉ឺនរៀល ក្នុងមួយថ្ងៃ។ យ៉ាងណាមិញកម្រៃនេះ ហាក់មានការថយចុះខ្លាំងបើធៀបនឹងឆ្នាំមុនៗ ដែលគេអាចរកបានចន្លោះពី ៦ម៉ឺន ទៅ ៨ម៉ឺន រៀលឯណោះក្នុងមួយថ្ងៃ ដោយសារពីមុនមួយគីឡូក្រាមឈ្មួញឱ្យជាង ១ ០០០រៀល តែតម្លៃបច្ចុប្បន្ននៅសល់តែ ៨០០រៀលប៉ុណ្ណោះ។ ប៉ុន្តែដោយសារគ្មានមុខរបរអ្វីផ្សេង ត្រូវតែបង្ខំចិត្តបន្តរុករកដើម្បីផ្គត់ផ្គង់ជីវភាពគ្រួសារបន្ថែម៕

អត្ថបទ៖រៀម សុខហេង