កសិករងាកមកដាំដំណាំម្នាស់ច្រើន​ឡើង ​ធៀប​​ការ​ដាំដំឡូង ដាំស្រូវ​បាន​ចំណូលច្រើន​ជាង

ដើម្បីឆ្លើយតបតាមតម្រូវការទីផ្សារធំទូលាយ កសិករមួយចំនួនក្នុង​ខេត្ត​បាត់ដំបង​បានងាកមកដាំដំណាំម្នាស់វិញ ខណះដាំណាំដំឡូងមី និងពោតក្រហម តែងប្រឈមទីផ្សារគ្រប់រដូវកាល ឲ្យ​តែ​ដល់រដូវកាលប្រមូលផលម្តងៗ​មិន​សូវ​បាន​ចំណេញក្រៅពីបង្វិលសងទៅមីក្រូឬនាយទុនផ្សេងៗមួយចំនួន។

នៅលើទំហំដីប្រហែលជិតមួយហិកតា លោក ម៉ម កាត់ រស់នៅភូមិតានួត ឃុំរការ ស្រុកគាស់ក្រឡ ខេត្តបាត់ដំបង​បានឲ្យ​​ដឹងថា លោកបានងាកមកដាំម្នាស់ប្រភេទទឹកឃ្មុំជំនួសដំឡូងមីវិញ ខណះការផ្លាស់ប្តូរនេះលោកថា ប្រាក់ចំណូលបានច្រើនជាង ស្របពេល​ទីផ្សារនៅភ្នំពេញមានតម្រូវការគ្រប់រដូវកាលសម្រាប់ផ្លែម្នាស់។

លោក ម៉ម កាត់ បាន​បន្ត​ថា លោកបានដាំម្នាស់ប្រភេទម្នាស់ទឹកឃ្មុំ ហើយដល់ពេល​រដូវប្រមូលផលលោកមិនបារម្ភទីផ្សារ​នោះទេ គឺខាងភ្នំពេញគេរង់​ចាំទទួលទិញយកទាំងអស់ ក្នុងតម្លៃគិតជាផ្លែ ក្នុងមួយផ្លែលក់បានចន្លោះពី ៨០០ ទៅ ៩០០ រៀល។

“ក្រោយពីខ្ញុំបានសម្រេច ចិត្តងាកមកដាំម្នាស់ ក្រុមគ្រួសារខ្ញុំក៏មានកម្រិតជីវភាពគ្រាន់បើដែរ ហើយបានសល់លុយកាក់មួយចំនួនផង”។ នេះបើតាមលោក ម៉ម កាត់​។

មិនខុសគ្នានេះដែរ កសិកររស់នៅ​ភូមិរបស់មង្គល ឃុំរបស់មង្គល ស្រុកមោងឫស្សី ខេត្តបាត់ដំបង​អ្នកស្រី នឿន បានរៀបរាប់ថា កន្លងមកអ្នកស្រីបានដាំម្នាស់នៅលើផ្ទៃដី ១៥ អា ដែលកាលនោះតម្លៃផ្លែម្នាស់នៅលើទីផ្សារគឺមួយផ្លែ ១០០០រៀល ហើយដល់រដូវប្រមូលផល អ្នកស្រីអាចរកចំណូលបានប្រមាណ ១២ លានរៀល។

អ្នកស្រីបន្តថា”ប្រាក់ចំណូល នេះ ខ្ញុំអាចទ្រទ្រង់ទៅលើការចាយវាយនៅក្នុងគ្រួសារ ហើយអាចសល់ចំណេញខ្លះទៀត​ផង។ បើនិយាយទៅគ្រាន់បើជាងខ្ញុំដាំស្រូវ ហើយខ្ញុំបានពង្រីកទំហំផ្ទៃដីជិត ៥០ អា ហើយឥឡូវនៅក្នុងឃុំខ្ញុំរស់នៅ មានអ្ន​កភូមិដាំច្រើនផងដែរ”។

ចំណែកកសិករម្នាក់ទៀតរស់នៅក្នុង ភូមិកែវមុន្នី ឃុំបាសាក់ ស្រុករុក្ខគីរី ខេត្តបាត់ដំបង ដែលគេស្គាល់ថា ជាកសិករដាំម្នាស់ចាស់វស្សាគឺ លោក ឡាយ ប៉ក់ មានវ័យ ៥២ ឆ្នាំ បានឲ្យដឹងដែរថា លោកបានជ្រើសរើសមុខរបរដាំដំណាំនេះជាង ២០ ឆ្នាំកន្លងមកហើយ និង​បានពង្រីកផ្ទៃដីជាបន្តបន្ទាប់រហូតដាំបានលើផ្ទៃដី ៤០ ហិកតារហូតបច្ចុប្បន្ន។

លោក​ថា ពេលនេះចំណូលបានថយចុះខ្លះៗ ដោយសាតែកសិករបាននាំគ្នាដាំច្រើនជាងគ្រាមុន ជាពិសេសក្នុងស្រុកមោងឫស្សី។

លោកបានបន្តថា “តែបើទោះបីមានកសិករដាំច្រើន សម្រាប់ទីផ្សារក៏មិនមានការប្រឈមសម្រាប់ខ្ញុំ ហើយដំណាំម្នាស់នេះ គឺ ចាប់ដាំពីខែ ៣ ទៅខែ ៤ រយះពេល ១ ឆ្នាំទៅ ១ ឆ្នាំជាងទើបអាចប្រមូលផលម្តង ហើយខ្ញុំមានមធ្យោបាយខ្លួន​ឯង​ផ្ទាល់ដើម្បីដឹកជញ្ជូនទៅលក់នៅរាជធានីភ្នំពេញ ព្រោះខ្ញុំមានស្តង់នៅទីនោះស្រាប់ផង”។

លោកថា បើគិតជាចំនួនផ្លែ ក្នុង ១ ហិកតា លោកទទួលបានចន្លោះពីបីម៉ឺនជាង ទៅបួនម៉ឺនជាងផ្លែ គិតជាចំណូបានចន្លោះពី ៣៤ លានរៀលទៅ ៤០ លានរៀល បើសរុបទាំង ៤០ ហិកតា ក្នុងមួយឆ្នាំៗលោកអាចរកចំណូលបានជាង ២០ ម៉ឺនដុល្លារ ក្រៅពីទូទាត់លើកម្មករ ក៏បានសល់គ្រាន់បើដែរ។

បើតាមមន្ត្រីរដ្ឋបាលស្រុកមោងឫស្សីខេត្តបាត់ដំបង​​បាន​បញ្ជាក់ថា បច្ចុប្បន្នប្រជាកសិករនៅឃុំរបស់មង្គល ស្រុកមោងឫស្សី ខេត្តបាត់ដំបង បាននាំគ្នាងាកមកពង្រីកការដាំដុះដំណាំម្នាស់ច្រើនឡើងៗជំនួសការដាំដុះស្រូវ។

ពលរដ្ឋ​និយមចូលចិត្តដាំម្នាស់ជាយូរយារណាស់មកហើយដែរ តែជាលក្ខណៈគ្រួសារគ្រាន់ទទួលទាន ប៉ុន្តែបច្ចុប្បន្ន បានយកដីស្រែមកធ្វើជាចម្ការម្នាស់ ដើម្បីប្រមូលផលលក់ទៅក្រៅស្រុក ដើម្បីឲ្យមានការរីកចម្រើនដល់សេដ្ឋកិច្ចគ្រួសារជាង​ដាំណាំស្រូវ គឹតមកដល់បច្ចុប្បន្ននេះ មានប្រជាកសិករដាំម្នាស់ប្រមាណជា ៥០០ គ្រួសារ លើផ្ទៃដីចំនួន ៦០៥ ហិកតាទូទាំងស្រុក ក្នុងនោះមាននៅក្នុងឃុំរបស់មង្គលច្រើនជាងគេ។

ចំណែកលោក ហេង សិទ្ធ មន្ត្រីនៃមន្ទីរកសិកម្មខេត្តបាត់ដំបង​បានប្រាប់កម្ពុជាថ្មីថា ដំណាំម្នាស់នៅទូទាំងខេត្តបាត់ដំបង មាននៅលើស្រុកចំនួន ៣ ដែលប្រជាកសិករបានដាំដុះច្រើនជាងបណ្តាស្រុកមួយចំនួនទៀត គ្នុងនោះមាន ស្រុកមោងឫស្សី ស្រុករុក្ខគីរី និងស្រុកគាស់ក្រឡ ក្នុងនោះស្រុកមោងឫស្សីច្រើនជាងគេ។

លោកថា ផ្ទៃដីកសិករដាំម្នាស់លោកមិនទាន់បានគណនាបាននៅឡើយទេ រងចាំរដូវកាលប្រមូលផលរួចទើបធ្វើការគណនាបាន៕

អត្ថបទ÷សៅ សារិទ្ធ