​​ព្រែកជីកហ្វូណនតេជោ បន្ត​​ការងារ​បោះ​បង្គោល​ព្រំដី​ក្នុង​ភូមិសាស្រ្តខេត្តកំពត និងកែបចាប់​ពីថ្ងៃទី២ ខែកក្កដា​នេះទៅ

មន្រ្តីបច្ចេកទេស​នៃ​ក្រសួង​សាធារណការ​និង​ដឹកជញ្ជូន កាលពីម្សិលមិញនេះ​បាន​បើកកិច្ចប្រជុំពី​ដំណើរការ​ចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ ក្នុងភូមិសាស្រ្តខេត្តកំពត និងខេត្តកែប។

កិច្ចប្រជុំដឹកនាំ​ដោយ​លោក តាំង សាមឿន អនុរដ្ឋលេខាធិការ និងជាប្រធានក្រុមការងារបច្ចេកទេសសម្រាប់ចុះពិនិត្យនិយាមកា និងធ្វើការផ្ទៀងផ្ទាត់ផែនទីសម្រាប់ទីតាំងភូមិសាស្ត្រខេត្តកំពត និងខេត្តកែប ដោយមានការ​ចូលរួមពី​មន្រ្តីពាក់ព័ន្ធ និងមន្រ្តីជំនាញក្រុមការងារបច្ចេកទេសសម្រាប់ចុះពិនិត្យនិយាមកា និងធ្វើការផ្ទៀងផ្ទាត់ផែនទីសម្រាប់ទីតាំងភូមិសាស្ត្រខេត្តកំពត និងខេត្តកែប។

កិច្ចប្រជុំនេះធ្វើឡើងក្នុងគោលបំណងដើម្បីពិនិត្យលើផែនការសកម្មភាពចុះបោះបង្គោលព្រំដីតាមបណ្តោយព្រែ​ក​ជីក​ហ្វូណនតេជោសម្រាប់កំណាត់ទី២ ក្នុងភូមិសាស្រ្តខេត្តកំពត និងខេត្តកែប ដោយចាប់ផ្តើមពីព្រំប្រទល់ខេត្តតាកែវ និងខេត្តកំពត រហូតដល់ខេត្តកែប។ ជាមួយគ្នានេះដែរ ក្រុមការងារនឹងបែងចែកជាក្រុមតូចចំនួន ៤ ក្រុម ដោយគ្រោងចុះអនុវត្តការងារបោះបង្គោល ចាប់ពីថ្ងៃទី២ ខែកក្កដា ឆ្នាំ២០២៥ នេះតទៅ។

ព្រែកជីកហ្វូណនតេជោ គឺជាគម្រោងប្រវតិ្តសាស្រ្តរបស់កម្ពុជា ហើយត្រូវបានចាត់ទុកថាការបោះជំហានដ៏សំខាន់មួយក្នុងការកែប្រែមុខមាត់កម្ពុជានៅក្នុងវិស័យនាវាចរណ៍ និងការដឹកជញ្ជូនតាមផ្លូវទឹក និងផ្លូវសមុទ្រ។ ព្រែកជីក​ដែល​មានប្រវែងជាង ១៧៤ គ.ម សាងសង់​ឆ្លងកាត់ខេត្តចំនួន ៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប ហើយដែលអាច​ឲ្យ​នាវាមានទម្ងន់ផ្ទុករហូតដល់ ៣ ០០០ DWT ទៅមកនិងជៀសគ្នាបានដោយសុវត្ថិភាព។

ក្រោយ​ប្រកាស​បិទបញ្ចប់បេសកកម្មផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់ភូមិសាស្ត្រខេត្តតាកែវ ក្រុមការងារបច្ចេកទេស នឹង​បន្ត​សកម្មភាពសម្រាប់ចុះពិនិត្យផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែក​ជីក​ហ្វូណន​តេជោ​ក្នុងភូមិសាស្ត្រខេត្តកំពត និងខេត្តកែបនៅពេល​ខាងមុខនេះ៕