អ្នក​ចិញ្ចឹម​ត្រី​នៅ​កម្ពុជា​ស្នើ​រដ្ឋាភិបាល​ចាត់​វិធានការ​នាំ​ចូល​ត្រី​ពី​ប្រទេស​ជិត​ខាង ​ដើម្បី​ជួយ​គាំទ្រ​ការ​ចិញ្ចឹមត្រី​ក្នុង​ស្រុក

អ្នកចិញ្ចឹមត្រីនៅក្នុងប្រទេសកម្ពុជា បានស្នើសុំរាជរដ្ឋាភិបាល ជួយពង្រឹងនិងចាត់វិធានការបិទការនាំចូលត្រីពីប្រទេសជិតខាងដើម្បីជួយគាំទ្រដល់ការចិញ្ចឹកត្រីនៅ​ក្នុង​ស្រុក​ឱ្យ​កាន់​តែ​ប្រសើរ។

លោក ឆាំ សំអាត ជា​អ្នក​ចិញ្ចឹមត្រីនៅក្នុង ភូមិ ពាម ឃុំរកាកោង២ ស្រុកមុខកំពូល ខេត្តកណ្ដាលបានរៀបរាប់នៅក្នុងទំព័រហ្វេប៊ុកថា « សព្វថ្ងៃខ្ញុំចិញ្ចឹមត្រីប្រា ជាង១៥ឆ្នាំមកហើយ កន្លងមកបងប្អូនកសិករ ក៏ដូចជារូបខ្ញុំបានជួបប្រទះបញ្ហាទីផ្សារ ដោយឈ្មួញអ្នកទិញត្រីតែងតែបង្អាប់តម្លៃ លក់បានតម្លៃថោក ដែលជាហេតុធ្វើឱ្យប្រជាកសិករមួយចំនួនបានបោះបង់អាជីវជាអ្នកចិញ្ចឹមត្រី ទៅប្រកបមុខរបបផ្សេង។ ខ្ញុំ​បាទ​គាំទ្រ​យ៉ាង​ពេញ​ទំហឹង នៅគោលការណ៍ដ្ឋាភិបាល ក្នុងការបិទត្រីនាំចូល ដើម្បីលើកកម្ពស់ផលិតផលក្នុងស្រុក ដែលមានគុណភាពល្អ និងសុវត្តិភាព»។

លោកឆាំ សំអាត បាន​សូម​ស្នើ​សុំ​ឱ្យរដ្ឋាភិបាលជួយពង្រឹង និង​ចាត់​វិធានការ​ក្នុងការបិទទាំងស្រុងត្រីនាំចូលមកប្រទេសយើង និងជួយគាំទ្រត្រីក្នុងស្រុកយើង។

ចំណែក អ្នកស្រី ហៀង ពៅណារ៉ែន ជាកសិករចិញ្ចឹមត្រីនិងផលិតកូនពូជ នៅខេត្តតាកែវបានលើកឡើងឱ្យដឹងដែរថា« ខ្ញុំ​មិនគាំទ្រ​ដាច់ខាត​ចំពោះ​សមាគមន៍ផ្គត់ផ្គង់ត្រីនៅកម្ពុជា ដែល​ទទូច​នាំ​ត្រី​ពី​ក្រៅស្រុក នាង​ខ្ញុំ​សុំ​ស្នើ​ដល់សមាគមន៍ផ្គត់ផ្គង់ត្រីនៅកម្ពុជាជួយទិញត្រីកសិករដែលចិញ្ចឹមក្នុងស្រុកយើង។

ជាចុងក្រោយខ្ញុំសូមគាំទ្រយ៉ាងពេញទំហឹង របស់ក្រសួងកសិកម្ម រុក្ខាប្រមាញ់និងនេសាទដែលបានរឹតបន្តឹងការនាំចូលត្រីពីក្រៅស្រុក»។

រីឯ លោកយស់ នូច រស់នៅភូមិពន្លៃ/ឃុំបាបោងស្រុកពាមរក៍ខេត្តព្រៃវែងបានអះអាងថា« ខ្ញុំបានឃើញហ្វេសបុកផ្សាយព្រោងព្រាតថា សមាគមអ្នកផ្គត់ផ្គង់ត្រីបានស្នើសុំនាំចូលត្រីបន្ថែមទៀតដើម្បីបំពេញតម្រូវការក្នុងស្រុក ខ្ញុំមិនឯកភាព និងមិនគាំទ្រទេ ព្រោះកសិករក្នុងស្រុកក៏អាចផលិតបាន ហើយអាចផ្គត់ផ្គង់តម្រូវការហូបចុកបាន។

សូមសមាគមអ្នកផ្គតផ្គង់ត្រីមេត្តាងាកមកជួយទិញត្រីក្នុងស្រុកទៅលក់ចែកចាយបន្តវិញ »។

ទាក់ទិនបញ្ហានេះដែរសមាជិកនៃសមាគមវារីវប្បកនៅកម្ពុជា និងបងប្អូនវារីវប្បករនៅទូទាំងប្រទេសបានគោរពគាំទ្រនូវអនុសាសន៍ដ៏ថ្លៃថ្លារបស់សម្តេចបវរធិបតីដែលបានណែនាំឱ្យអ្នកផ្គត់ផ្គង់ត្រីបង្វែរពីការនាំចូលមកជាការប្រមូលទិញត្រីនៅក្នុងស្រុក។

នៅក្នុងសំណេរដែលបានផ្សាយក្នុងផេកផ្លូវការរបស់ខ្លួនសមាគមវារីវប្បកនៅកម្ពុជាបានលើកឡើងថាសមាគមវារីវប្បករនៅកម្ពុជា សូមគាំទ្រពេញទំហឹងចំពោះចំណាត់ការរបស់ក្រសួងកសិកម្ម រុក្ខាប្រមាញ់ និងនេសាទ ពិសេសរដ្ឋបាលជលផលក្នុងការរឹតបន្តឹងការត្រួតពិនិត្យនៃការនាំចូលត្រីមួយចំនួនពីក្រៅប្រទេសមកបំពេញតម្រូវការត្រីដែលខ្វះខាតនៅក្នុងស្រុក ឬ ប្រភេទត្រីដែលមិនមានចិញ្ចឹមក្នុងស្រុក ឬ ត្រីដែលមានចិញ្ចឹមប៉ុន្តែមិនទាន់បំពេញបានគ្រប់តម្រូវការទីផ្សារ។

សមាគមវារីវប្បករនៅកម្ពុជា សូម​ធ្វើ​ការ​ប្រឆាំង​ចំពោះ​ការ​លើកឡើងរបស់​អ្នក​នាំ​ចូល​ត្រី​ដែល​ទាមទារ​ឱ្យមានការនាំចូលត្រីមកកាន់កម្ពុជាឱ្យកាន់តែច្រើនជាងមុន ដែលនាំឱ្យវារីវប្បករប្រឈមនឹងការខាតបង់ រហូតដល់ក្ស័យធនតែម្តង។

ជាមួយគ្នានេះដែរ ក្រុមវារីវប្បករ កម្ពុជា​បាន​លើក​ឡើង​ពី សកម្មភាព​របស់សមាគម​អ្នកផ្តត់ផ្គង់ត្រីនៅកម្ពុជា នា​កន្លង​មក​ថា បានបង្ក ប៉ះពាល់ដល់វារីវប្បកម្ម និង​ប្រជាពលរដ្ឋ​ចិញ្ចឹម​ត្រី​តាម​លក្ខណៈគ្រួសារ​នៅ​កម្ពុជា​ផ្ទុយ​ពី​រដ្ឋបាលជលផល និង​ក្រសួង​កសិកម្ម​រុក្ខាប្រមាញ់និងនេសាទ នាកន្លងមកនេះ បាន​ជំរុញ​ដល់​សមាគម​អ្នក​ផ្គត់ផ្គង់​ត្រី​នៅ​កម្ពុជា​ត្រូវ​តែ​ធ្វើការទទួលទិញត្រីវារីវប្បកម្ម និងក៏ដូចជាត្រីធម្មជាតិ ដែលមាននៅកម្ពុជាឱ្យបានច្រើន ជៀសវាងការដែលនាំត្រីចូលពីប្រទេសជិតខាងកម្ពុជា។

សមាគមវារីវប្បករ ស្នើសុំយ៉ាងទទូច ឱ្យរដ្ឋបាលជលផល និងក៏ដូចជាក្រសួងកសិកម្មរុក្ខាប្រមាញ់ និងនេសាទ​ធ្វើ​យ៉ាងណា​សម្របសម្រួល​ដើម្បី ក្លាយ​ជាសមាគមរួមដោយផ្តល់នូវផលចំណេញដល់វារីវប្បករ និង​ពលរដ្ឋ​អ្នក​ចិញ្ចឹម​ត្រី​ក្នុង​ស្រុក​នាថ្ងៃ​ខាង​មុខ​កុំបីខានឡើយ៕

អត្ថបទ ៖ សំអឿន