អ្នកផលិតពូជត្រី កង្កែប បង្កង ខេត្តតាកែវ ត្អូញត្អែរពីការធ្លាក់ចុះទីផ្សារ

អ្នកផលិតពូជត្រី កង្កែប បង្កង នៅខេត្តតាកែវ លោក ហង់ ហ៊ាង បានត្អូញត្អែរពីការធ្លាក់ចុះទីផ្សារ ចាប់តាំងពីឆ្នាំ ២០២២មក។

លោក ហង់ ហ៊ាង ម្ចាស់កសិដ្ឋានបង្កាត់ពូជត្រីខេត្តតាកែវ បានឱ្យដឹងថា គិតចាប់ពីឆ្នាំ ២០២២ មក ការផ្គត់ផ្គង់ពូជត្រី បង្កង កង្កែប មានការថយចុះជាខ្លាំង ខណៈដែលនៅឆ្នាំ ២០២៣នេះ មានការកើនឡើងបន្តិចក្តី តែជាតម្រូវការ​លក្ខណៈ​គ្រួសារប៉ុណ្ណោះ មិនមានចំនួនធំដូចកាលមុនវិបត្តិកូវីដនោះឡើយ។

លោក ហង់ ហ៊ាង បានបញ្ជាក់ថា បច្ចុប្បន្ននេះ កសិដ្ឋានរបស់លោកមានបង្កាត់ពូជត្រីប្រា ត្រីឆ្ពិន ត្រីអណ្ដែង ត្រីទីឡាប់​យ៉ា កង្កែប និងបង្កង ជាដើម ដែលមានចំនួនរាប់លានក្បាល ក្នុងមួយឆ្នាំៗ។ លោក បានទទួលការបណ្តុះ​បណ្តាល​បច្ចេកកសិកម្មពីនាយកដ្ឋានវារីវប្បកម្ម រដ្ឋបាលជលផល និងខណ្ឌរដ្ឋបាលជលផល ខេត្តតាកែវ​។

សព្វថ្ងៃនេះ លោក ហង់ ហ៊ាង លើកឡើងថា ពូជត្រីនៅក្នុងកសិដ្ឋានរបស់លោក ត្រូវបានផ្គត់ផ្គង់ចែកចាយទៅទូទាំង ២៥ខេត្តក្រុង ដោយខេត្តដែលមានតម្រូវការច្រើនជាងគេ រួមមាន ក្នុងខេត្តតាកែវ ខេត្តកំពង់ស្ពឺ និងកណ្តាលជាដើម។

ម្ចាស់កសិដ្ឋានរូបនេះ បានរំលឹកថា លោកចាប់ផ្តើមប្រឡូកក្នុងវិស័យចិញ្ចឹមត្រីនេះ ចាប់តាំងពីឆ្នាំ ២០០២ មក ដោយដំ​បូង​ធ្វើលើទំហំដីប្រហែលជាង ២០ អា និងបានពង្រីកដល់ ៣ ហិចតានាពេលបច្ចុប្បន្ន។ បើទោះជាសព្វថ្ងៃនេះ ទីផ្សារ​ពូជ​ត្រីធ្លាក់ចុះយ៉ាងណាក្តី លោកនៅតែមានឆន្ទៈក្នុងការបន្តពង្រីអាជីពនេះបន្ថែមទៀត ដើម្បីផ្គត់ផ្គង់តម្រូវ​ការទីផ្សារ​នាពេលខាងមុខ។

លោក ឡែមផូរ សុថាវរិទ្ធិ ប្រធានគណៈ​កម្មការ​ប្រតិបត្ដិ​សមាគមវារីវប្បកម្មនៅកម្ពុជា បានលើកឡើងដែរថា បច្ចុប្បន្ន​វិស័យ​វារីវប្បកម្ម មានដំណើរការមិនសូវល្អនោះទេ ដោយសារតម្លៃថ្លៃដើមកើនឡើងខ្ពស់ ចំណីឡើងថ្លៃ កសិករកាត់​បន្ថយការចិញ្ចឹម ការផលិតក៏មានការធ្លាក់ចុះផងដែរ។ កត្តាទាំងអស់នេះ គឺទទួលរងឥទ្ធិពល​ពីសង្រ្គាម​រវាងរុស្ស៊ី និងអ៊ុយក្រែន។

ចំពោះតម្លៃត្រីដែលចាប់ពីស្រះ រួមមាន ត្រីប្រា មានតម្លៃ  ៤៧០០ ដល់ ៥៥០០ រៀល ក្នុងមួយគីឡូ, ត្រីពោ ៨០០០ ទៅ ៨៥០០ រៀល។ ត្រីឆ្ពិន តម្លៃ ៨០០០ រៀល ដល់ ១២០០០រៀល, ត្រីឆ្តោរ ៩០០០ ដល់ ១២០០០ រៀល, ត្រីអណ្តែង ៤៥០០ ទៅ ៦០០០ រៀល។ តម្លៃត្រីមួយគីឡូ ខុសគ្នា អាស្រ័យលើគុណភាព និងទំហំ នៅពេលចាប់ចេញពីស្រះ។

បើទោះជាវិស័យវារីវប្បកម្មមានមានបញ្ហាទីផ្សារយ៉ាងណាក្តី ក្រសួងកសិកម្ម រុក្ខាប្រមាញ់ និងនេសាទ តាមរយៈ​ដ្ឋបាល​ជលផល នៅតែបន្តជំរុញការបង្រៀននូវបច្ចេកទេសក្នុងការចិញ្ចឹមត្រី និងការសម្របសម្រួល ដោយ​សហការជា​មួយ​សមាគម​វារីវប្បករកម្ពុជា ក្នុងការពង្រឹងដល់អ្នកចិញ្ចឹមត្រី​ទ្រង់ទ្រាយមធ្យម និងធំ ឲ្យស្វែងយល់ពីទីផ្សារ ពោលគឺអ្នក​ផលិត និងអ្នកទិញត្រូវមានការសហការគ្នាឱ្យបានល្អ។ កន្លងមក ​រដ្ឋបាល​ជលផល ក៏ដូចជាក្រុមវារីវប្បករកម្ពុជា បានជំរុញ​ឲ្យអ្នកចិញ្ចឹមត្រីមានឱកាស ក្នុងការទទួលបាននូវឥណទាន​សម្រាបធ្វើវារីវប្បកម្ម ពីធានាគារអភិវឌ្ឍជនបទ និងកសិកម្ម ក្នុងកម្រិតអត្រាការប្រាក់ល្អ ដើម្បីបន្តជំរុញការចិញ្ចឹមត្រីនេះ៕

អត្ថបទ៖ ផល ធារិត