មន្ត្រីជាន់ខ្ពស់ក្រសួងការងារ អំពាវនាវឲ្យពលរដ្ឋបន្តស្មារតីជាតិនិយម ដើម្បីបង្ហាញពីទឹក​ចិត្ត​មោះមុត​​ក្នុងការទប់​ស្កាត់រាល់​សកម្ម​ភាព​ឈ្លាន​ពានរបស់សត្រូវ

លោក ម៉ុល វិបុល អនុរដ្ឋ​លេខា​ធិការ ក្រសួងការងារ និងបណ្តុះបណ្តាលវិជ្ជាជីវៈ បានអំពាវ​នាវឱ្យ​​ប្រជាពលរដ្ឋទាំងអ​ស់ត្រូវបន្តស្មារតីជាតិនិយមចូល​រួមការពារបូរណភាពទឹកដី ដើម្បី​រួម​កម្លាំង​គ្នា​ជា​ធ្លុង​មួយ​នៃមហាសាមគ្គីជាតិដ៏​រឹងមាំក្នុងការទប់​ស្កាត់រាល់​សកម្ម​ភាព​ឈ្លានពានរបស់សត្រូវមកលើបូរណភាពដែនដីកម្ពុជា។ លោកក៏បានស្នើឲ្យពលរដ្ឋគ្រប់រូប ត្រូវមានឧត្តមគតិ មនសិការស្នេហាជាតិ និងបង្ហាញ​ពីទឹក​ចិត្ត​ស្មារតីមោះមុត ដើម្បីបន្តគាំទ្រ​ដល់កង​កម្លាំង​ប្រដាប់​អាវុធដែលកំពុងឈរជើងនៅបន្ទាត់ព្រំដែន​ជួរមុខដើម្បីការពារបូរណភាពទឹកដីកម្ពុជា។

ការអំពាវនាវនេះ ធ្វើឡើងនៅក្នុងឱកាសដែលលោក​អញ្ជើញ​ជា​អធិបតី ក្នុងនាមជាអនុប្រធានក្រុមការងាររាជរដ្ឋាភិបាលចុះមូលដ្ឋានសង្កាត់កាកាបទី១ ខណ្ឌពោធិ៍សែនជ័យ តំណាងលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ​ក្នុង​កម្មវិធី​កាត់​សក់​ឥគិតថ្លៃជូនពលរដ្ឋក្រោម​ប្រធាន​បទ «សក់ និង​សម្រស់ដើម្បី​មិត្តយើង» កាលពីថ្ងៃអាទិត្យ ទី២០ ខែកក្កដា នៅក្នុងបរិវេណវត្តពោធិសត្ថារាម (ហៅវត្តពោធិ៍ចិនតុង) ស្ថិត​នៅ​ភូមិ​ប៉ប្រកខាងជើង សង្កាត់កាកាបទី១ ដើម្បី​កាត់​សក់​ជូន​ប្រជាព​លរដ្ឋ​ក្នុង​មូល​ដ្ឋាន និងផ្សព្វ​ផ្សាយ​ពីគោល​នយោបាយរបស់រាជរដ្ឋាភិបាលដែលបានដាក់ចេញនាពេលកន្លងមក និងមាន​​ប្រជាពលរដ្ឋ​ចូល​រួម​កាត់សក់សរុបចំនួន ២៧៣រូប។

លោក ម៉ុល វិបុល ក៏បានលើកទឹក​ចិត្តឱ្យ​ប្រជា​ពល​រដ្ឋ​ជឿ​ជាក់លើគោលនយោបាយរបស់រាជរដ្ឋាភិបាល ជាពិសេស​សមិទ្ធផលទាំងវិស័យនយោបាយ សេដ្ឋ​កិច្ច និងសង្គមកិច្ច។

លោកក៏បានអំពាវ​នាវឱ្យ​បង​ប្អូន​ប្រជាពលរដ្ឋទាំងអ​ស់ត្រូវបន្តស្មារតីជាតិនិយម ចូល​រួមការពារបូរណភាពទឹកដី ត្រូវមានឧត្តមគតិ មនសិការស្នេហាជាតិ ដើម្បី​រួម​កម្លាំង​គ្នា​ជា​ធ្លុង​មួយ​នៃមហាសាមគ្គីជាតិដ៏​រឹងមាំ និងបង្ហាញ​ពីទឹក​ចិត្ត​ស្មារតីមោះមុត និងបន្ត​គាំទ្រ​កង​កម្លាំង​ប្រដាប់​អាវុធ​ជួរមុខ ក្នុងការទប់​ស្កាត់រាល់​សកម្ម​ភាព​ឈ្លានពានរបស់សត្រូវមកលើបូរណភាពដែនដីកម្ពុជា៕