គ្មានបន្លែនាំចូល​ពីថៃ ជាឱកាស​កសិករ​ដាំដុះបន្លែនាំលក់លើទីផ្សារក្នុងក្រុងបាត់ដំបង​ រកចំណូលបាន​​រាល់ថ្ងៃ

នៅតាមបណ្តាទីផ្សារនានាក្នុងក្រុងបាត់ដំបង អាជីវករនៅតែមមាញឹកក្នុងការលក់ដូរ បន្លែ ត្រី សាច់ ដោយគ្មានការប្រឈមក្នុងការខ្វះខាត បើទោះបីគ្មានការនាំចូលពីប្រទេសថៃយូរអង្វែងក៏ដោយចុះ។ ផ្ទុយទៅវិញគឺជាឱកាសដ៏ល្អបំផុតសម្រាប់កសិករ ដែលប្រកបរបរកសិកម្មនោះទៅវិញ។

កសិករនៅតាមបណ្តាស្រុកដែលជាស្រុកគោលដៅកសិកម្មបានប្រាប់កម្ពុជាថ្មីទាំង​សប្បាយចិត្ត ក្នុងការប្រមូលបន្លែចម្រុះចូលទីផ្សារ ដែលឱកាសនេះពួកគាត់អាចរកប្រាក់ចំណូលបានស្ទើររាល់ថ្ងៃ ចាប់តាំងពីថែបង្កជម្លោះជាមួយកម្ពុជា ហើយ​ថៃក៏បានបិទព្រំដែនដោយឯកតោភាគី ដែលបានជំរុញឲ្យកសិករតាមបណ្តាស្រុករកចំណូលគ្រួសារតាមរយះប្រមូលទិន្នផល​កសិកម្មដូចជាបន្លែគ្រប់មុខ តាមលំនៅដ្ឋានផ្គត់ផ្គង់លើទីផ្សារក្នុងនោះ ប្រជានេសាទជាលក្ខណះគ្រួសារ ក៏ដូចជាអ្នកចិញ្ចឹមត្រី មាន់ ទា ក៏រកចំណូលក្នុងស្រុកសម្រាប់ទ្រទ្រង់គ្រួសារបានយ៉ាងប្រសើរផងដែរ។

ប្រជាពលរដ្ឋរស់នៅក្នុងក្រុងបាត់ដំបង បានលើកឡើងដូចៗគ្នាថា ក្រោយប្រទេសថៃបានបិទព្រំដែន បន្លែ ត្រីសាច់មិនមាន​ការខ្វះខាតនោះទេ ហើយអាជីវករក៏រកចំណូលបានប្រសើរជាងមុនដែរ។

អ្នកស្រី ស្រីម៉ាច ពលរដ្ឋ​រស់នៅក្រុង​បាត់ដំបង​បានប្រាប់​ថា បច្ចុប្បន្ន បន្លែ ត្រីសាច់នៅលើទីផ្សារសម្បូរបែបណាស់។ ពលរដ្ឋ​រូបនេះ​ក៏​កត់សម្គាល់​ បន្លែ ត្រីសាច់ នៅលើទីផ្សារ​ហាក់ខុសប្លែក​ច្រើនត្រង់ថា ទាំងបន្លែ ទាំងត្រីសាច់គ្រប់ប្រភេទ ដែល​អាជីវករលក់លើទីផ្សារសុទ្ធតែនៅស្រស់ៗបំព្រង គួរឱ្យចង់បរិភោគ ជាពិសេសធ្វើជាអន្លក់ អត់ដូចបន្លែ ត្រីសាច់នាំចូលទេ គឺមើលទៅពណ៌ស្លេកៗ។

កសិករនៅក្នុងឃុំចែងមានជ័យ នៃស្រុកបាណន់ លោក ឈាង រុំ បានប្រាប់ថា សប្បាយចិត្ត ពេលដឹកបន្លែទៅផ្សារលក់ឆាប់អស់អីចឹង។ គ្រួសាររបស់លោកមានជីវភាពរាល់ថ្ងៃហ្នឹង ពឹងលើតែបន្លែហ្នឹងហើយ។ លោក​ព្រឹកឡើងដឹងតែដឹកបន្លែដល់​ផ្សារហើយ ព្រោះភ្លឺ​ស្រាងៗលោក​និងប្រពន្ធចាប់ប្រមូល ហើយព្រឹកម៉ោង ៦ ជាងដឹងតែដល់ផ្សារ ហើយតម្លៃនៅតែដដែល មិនឆ្លៀតតម្លើងតម្លៃនោះ ទេ មានតែចុះបន្ថែមផង”។

បើតាមមន្ត្រីពាណិជ្ជកម្មខេត្តបាត់ដំបង​បាន​បញ្ជាក់ថា រាល់ទំនិញនៅលើទីផ្សារនានានៅក្នុងក្រុង អាជីវករលក់ធម្មតា មិនមានការកើនតម្លៃលើទំនិញអ្វីមួយនោះទេ។ ជាពិសេសបន្លែសរីរាង្គ គឺតម្លៃថោកសមរម្យ ទាំងបន្លែប្រមូលពីតាមភូមិ ក៏ដូច​ជាបន្លែក្នុងសហគមន៍ គឺរក្សាតម្លៃនៅដដែល។

ប្រភពដដែលបន្ត​ថា ចំណែកត្រីសាច់ ក៏មិនប្រឈមការខ្វះខាតនៅលើទីផ្សារនោះដែរ ហើយក៏មានតម្លៃសមរម្យ មិនមានការដំឡើងថ្លៃនោះទេ រួមទាំងសាធាតុគីមីក៏ត្រូវបានបំបាត់ស្ទើរទាំងស្រុងផងដែរ។

មន្ត្រីកសិកម្មខេត្ត បានបញ្ជាក់ថា សម្រាប់ខេត្តបាត់ដំបង បន្លែ និងត្រីសាច់ មិនខ្វះទេ ហើយក្រៅពីបម្រើ​ក្នុងខេត្ត ក៏បានចែកចាយតាមបណ្តាខេត្តផ្សេងៗផងដែរ ដូចជាបន្លែសរីរាង្គក្នុងសហគមន៍ជាដើម៕

អត្ថបទ÷សៅ សារិទ្ធ