តំណាងកម្មករសំណង់ នាំយកស្បៀងអាហារមួយចំនួនប្រគល់ជូនអាជ្ញាធរដើម្បីផ្ញើជូនវីរៈកងទ័ព និងជនភៀសសឹក

កាលពីរសៀលថៃ្ងទី១ ខែសីហា ឆ្នាំ២០២៥ អាជ្ញាធរសង្កាត់ផ្សារថ្មីទី២ ទទួលយកមូលនិធីសប្បុរសធម៌ ពីតំណាងកម្មករសំណង់ ចូលរួមរៃអង្គាសថវិកាដើម្បីទិញស្បៀងផ្តល់ជូនតាមរយៈអាជ្ញាធរ ដើម្បីបន្តប្រគល់ជូនកងទ័ពជួរមុខ និងជនភៀស​សឹក ដោយសារការឈ្លានពានពីសំណាក់ប្រទេសថៃ។

លោក អ៊ន ប៊ុន្នី តំណាងក្រុមកម្មករសំណង់បានអោយដឹងថា អំណោយទាំងនេះមាន មីជាតិ ទឹកសុទ្ធ ទឹកក្រូច គុយទាវ នំកញ្ចប់មួយចំនួននេះ គឺបានមកពីការប្រមូលរៃអង្គាសគ្នាពីសំណាក់កម្មករសំណង់ដែលជាទឹកចិត្តបន្តិចបន្តួចដើម្បីប្រគល់ជូនកងទ័ពជួរមុខ និងបងប្អូនភៀសសឹកដែលកំពុងជួបបញ្ហាតាមព្រំដែន ដែលបណ្តាលឱ្យពលរដ្ឋរាប់សែនអ្នក ជម្លៀសចេញពីផ្ទះសម្បែង។

លោកបន្តថា ការនាំយកស្បៀងនេះដែរ គឺបាននាំយកស្បៀងផ្ញើតាមរយៈអាជ្ញាធរខ្លះ និងមួយចំនួនទៀតប្រគល់ជូនធានាគារ វីង ដើម្បីយកចែកជូនកងទ័ពជួរមុខ ដែលកំពុងឈរជើងយ៉ាងរឹងមាំការពារបូរណភាព អធិបតេយ្យភាពកម្ពុជា មិនអោយមានការឈ្លានពានឈានចូលដីកម្ពុជា មិនអោយបាត់បង់។

ជាចុងក្រោយ លោក អ៊ន ប៊ុន្នី បានសំណូមពរពលរដ្ឋខ្មែរទាំងអស់នៅក្នុងពេលវេលានេះ គឺជាដំណាក់កាលដែលយើងទាំងអស់គ្នា ជាខ្មែរដូចគ្នា ត្រូវរួបរួមសាមគ្គី ជួយគ្នា ពេលគ្រាដ៏លំបាកមួយនេះ ជ្រកក្រោមពាក្យស្លោកមួយ « យើងឈរ​យ៉ាងរឹងមាំ យើងឈរជាមួយគ្នាខ្មែរសាមគ្គីខ្មែរ»៕

អត្ថបទ៖ រដ្ឋា