ពលរដ្ឋ ២១៨គ្រួសារទទួលបានអំណោយពីក្រុមហ៊ុន OCIC នាឱកាសពិធីបុណ្យចូលឆ្នាំខ្មែរ

ដើម្បីអបអរសាទរនាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងខិតជិតមកដល់ដ៏ខ្លីខាងមុខនេះ លោក ផន សុភាព ប្រធានការដ្ឋាន ផ្នែកដោះស្រាយដីធ្លី តំណាងអ្នកឧកញ៉ា បណ្ឌិត ពុង ឃាវសែ អគ្គនាយកក្រុមហ៊ុន OCIC បានផ្តល់អំណោយដល់ពលរដ្ឋខ្វះខាត១០០គ្រួសារ តំណាងឲ្យប្រជាពលរដ្ឋ ២១៨គ្រួសារ នាព្រឹកថ្ងៃទី៨ ខែមេសា​​ ​ឆ្នាំ២០២៦។

លោក ផន សុភាព តំណាងអគ្គនាយកក្រុមហ៊ុន OCIC លើកឡើងថា ការចែកអំណោយទៅដល់ប្រជាពលរដ្ឋដែលមានជីវភាពខ្វះខាតនាពេលនេះ មិនមែនជាលើកដំបូងនោះទេ គឺក្រុមហ៊ុនតែងតែគិតគូ និងចែកជូនជាច្រើនលើកច្រើនសារមកហើយ។ ជាក់ស្តែងពលរដ្ឋដែលមកទទួលអំណោយពេលនេះ មានចំនួន ១០០គ្រួសារ តំណាងឲ្យប្រជាពលរដ្ឋ ២១៨គ្រួសារ ដោយក្នុង ១គ្រួសារៗទទួលបានអំណោយ អង្ករ ៣០គីឡូក្រាម និងថវិការ ៥0,000រៀល។ លោក ផន សុភាព បន្ថែមថា ការចំណាយលើកនេះ មានចំនួន ២៧,២៥០,០០០រៀល និងយោងការចំណាយ ៣៦លើក កន្លងទៅចំនួន ១,០២៩,៦៥៤,០០០ រៀល នេះគឺជាកម្មវិធីចែកអំណោយលើកទី៣៧ ដូច្នេះគិតដល់បច្ចុប្បន្នលោកអគ្គនាយក បានឧបត្ថម្ភគិតជាប្រាក់ទាំងអស់ប្រមាណ ១,០៥៦,៩០៤,០០០ រៀល។

លោក ផន សុភាព លើកឡើងទៀតថា បច្ចុប្បន្នក្រុមហ៊ុនបានសហការយ៉ាងជិតស្និតជាមួយអាជ្ញាធរគ្រប់ជាន់ថ្នាក់ ជាពិសេសក្នុងមូលដ្ឋានសង្កាត់ព្រែកតាសេក ​សង្កាត់ព្រែកលៀប សង្កាត់ជ្រោយចង្វារ និងសាលាខណ្ឌ​​​​ជ្រោយ​ចង្វារ​ ក្នុងការចូលរួមថែរក្សាសន្តិសុខ សុវត្ថិភាពជូនប្រជាពលរដ្ឋ។ ក្រៅពីនោះក្រុមហ៊ុនបានសហការយ៉ាងជិតស្និតជាមួយរាជរដ្ឋាភិបាល និងសាលារាជធានីភ្នំពេញ ក្នុងការដោះស្រាយគោលនយោបាយ​ជូនប្រជាពលរដ្ឋ​ដែលទទួលរងផលប៉ះពាល់នៅក្នុងគម្រោងអភិវឌ្ឍន៍ទីក្រុងជ្រោយចង្វារ ប្រកបដោយសន្តិវិធី៕