សម្តេចមហាមន្ត្រី គុយ សុផល ចែកអំណោយជូនគ្រួសារវីរៈកងទ័ពជួរមុខ ១៥៣គ្រួសារ នៅស្រុកបរិបូណ៌

កំពង់ឆ្នាំង៖ នៅថ្ងៃទី០៩ ខែឧសភា ឆ្នាំ២០២៦ សម្តេចមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង បានអញ្ជើញចុះជួបសំណេះសំណាល សាកសួរសុខទុក្ខ និងនាំយកអំណោយមនុស្សធម៌ មានទាំងគ្រឿងបរិភោគ និងថវិកាមួយចំនួន ចែកជូនគ្រួសារវីរៈកងទ័ពដែលកំពុងបំពេញភារកិច្ចនៅសមរភូមិជួរមុខ ចំនួន១៥៣គ្រួសារ ស្ថិតនៅឃុំចំនួន១០ ក្នុងស្រុកបរិបូណ៌ ខេត្តកំពង់ឆ្នាំង។

ក្នុងឱកាសនោះ សម្តេចមហាមន្ត្រី គុយ សុផល បានពាំនាំនូវការផ្តាំផ្ញើសាកសួរសុខទុក្ខ និងការយកចិត្តទុកដាក់ពីថ្នាក់ដឹកនាំ ជាពិសេសចំពោះគ្រួសារកងកម្លាំងប្រដាប់អាវុធ ដែលបានលះបង់កម្លាំងកាយចិត្ត ក្នុងការការពារបូរណភាពទឹកដី សន្តិសុខ និងសុខសន្តិភាពជូនប្រជាពលរដ្ឋ។

សម្តេចមហាមន្ត្រី ក៏បានលើកទឹកចិត្តដល់ក្រុមគ្រួសារវីរៈកងទ័ពទាំងអស់ ឱ្យបន្តថែរក្សាសាមគ្គីភាព រស់នៅដោយអនាម័យ និងខិតខំប្រកបរបរចិញ្ចឹមជីវិត ដើម្បីលើកកម្ពស់ជីវភាពគ្រួសារ ឱ្យកាន់តែប្រសើរឡើង។

ប្រជាពលរដ្ឋដែលទទួលអំណោយ បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅ ចំពោះការយកចិត្តទុកដាក់ និងការជួយឧបត្ថម្ភពីសម្តេចមហាមន្ត្រី គុយ សុផល ដែលតែងតែគិតគូរដល់សុខទុក្ខរបស់ប្រជាពលរដ្ឋ និងគ្រួសារកងកម្លាំងនៅតាមមូលដ្ឋាន៕

ដោយ ៖  វ៉ាន់ សេដ្ឋា